ئاهه‌نگ گێران ب مه‌ولیدا پێغه‌مبه‌ری سلاڤێت خودێ ل سه‌ربن
نڤێسەر:
دكتور: اسماعیل سگێری
حه‌مد و په‌سن هه‌می بۆ خودایێ مه‌زن، هه‌ر وه‌كی ئه‌و هه‌ژی و هه‌روه‌كی ئه‌و رازی، سلاڤ صه‌له‌وات ل سه‌ر گیانێ پێغه‌مبه‌رێ خوشتڤی، سلاڤێت خودێ ل سه‌ربن، و هه‌ڤال و هوگرێت وی یێت ژێگرتی، وهه‌ر كه‌سێ ب باشی رێك و ده‌وسا وان بگریت و بچیت هه‌تا رۆژا قیامه‌تێ و پاشی:
ب راستی ساخكرنا ئاهه‌نگان ب هه‌لكه‌فتنا مه‌ولیدا پێغه‌مبه‌رێ خوشتڤی سلاڤێت خودێ ل سه‌بن، گه‌له‌ك دگێرینن، و هه‌ر ئێك ب ئاوایه‌كێ ڤێ هه‌لكه‌فتێ ساخ دكه‌ت و دگێرینیت، و خودێ هه‌رئێكێ دێ ل دویف نیه‌تا وی ده‌تێ، به‌لێ ئه‌ز دبێژم یێ خه‌مێ ژ ڤێ روژێ بخۆت و یێ بڤێت ئاهه‌نگا ب ڤێ رۆژێ ب گێرینیت دڤێت یێ راست بیت، و ئه‌و د ئاهه‌نگ گێرانا خۆدا یێ راسته یێ ب ساخكرنه‌كا ب گیان ساخ دكه‌ت نه به‌س ب وێنه‌كێ بێ گیان و یێ راست ژی ب ڤی ره‌نگییه:
ـ باوه‌ریه‌كا راست و دورست ب پێغه‌مبه‌رێ خوشتڤی سلاڤێت خودێ ل سه‌ربن هه‌بیت، باوه‌ریه‌كا وه‌سا باوه‌ری ب هه‌می نامه و به‌رنامه و فه‌رمانێت وی هه‌بیت، و بزانیت هه‌رتشتێ ئه‌و پێ هاتی خێر و باشیا مرۆڤایه‌تیێ تێدایه، و ئه‌و چ دین و به‌رنامه و یاسا و فه‌رمانان ب سه‌ر ناما وی نه‌ئێخیت، و بزانیت نامه‌یا پێغه‌مبه‌ری سلاڤێت خودێ ل سه‌ربن یا كێرهاتیه بو هه‌می ده‌م و جهان، و دڤێت ڤێ باوه‌ریێ ره‌نگڤه‌دانا خۆ ل سه‌ر دلێ وی هه‌بیت، ڤیان و حه‌ژ ژێكرن بۆ پێغه‌مبه‌ری سلاڤێت خودێ ل سه‌ربن ژێ ده‌ركه‌ڤیت، دیسا دڤێت ڤێ باوه‌ریێ ره‌نگڤه‌دانا خۆ ل سه‌ر ئه‌زمان و ئه‌ندامێت وی هه‌بیت، گۆتن و كریارێت وی دویف شه‌ریعه‌ت و رێنماییت وی بن، و گوتن و كریارێت وی ژ بازنێ رازیبوونا ویدا ده‌رنه‌كه‌ڤن.
ـ دیسا ئه‌و د ئاهه‌نگ گێرانا خۆدا یێ راسته، یێ د هه‌می كاروبارندا و د هه‌رتشتێ دژیانا ویدا رویدده‌ت بزڤریته فه‌رمان و حوكمێ پێغه‌مبه‌رێ خوشتڤی سلاڤێت خودێ ل سه‌ربن، و پاشی به‌رامبه‌ر حوكم و فه‌رمانا پێغه‌مبه‌رێ خوشتڤی سلاڤێت خودێ ل سه‌ربن دلته‌نگ نه‌بیت، و دلخوشی وه‌رگریت، و پاشی بێ دوودلی كار پێ بكه‌ت.
ـ دیسا ئه‌و یێ راسته یێ جهێ هه‌ژی بێ زێده‌كرن و بێ كێمكرن بده‌ته پێغه‌مبه‌رێ خوشتڤی سلاڤێت خودێ ل سه‌ربن، و بزانیت پێغه‌مبه‌رێ خودێ یه و به‌نده‌یێ وییه، و ول دویف بازنێ شه‌ریعه‌تی بنیاسیت، و وان په‌سن و سالوخه‌تا نه ده‌ته پێغه‌مبه‌رێ خوشتڤی سلاڤێت خودێ ل سه‌ربن یێت وی ژ رێزا هه‌ژی ده‌ربێخن هه‌روه‌كی مه‌سیحیان ل گه‌ل عیسا پێغه‌مبه‌ر سلاڤ ل سه‌ربن كری.
ـ دیسا ئه‌و یێ راسته، یێ خه‌ما به‌لاڤه‌كرنا دینێ پێغه‌مبه‌رێ خوشتڤی سلاڤێت خودێ ل سه‌ربن بخۆت، و ل دویف شیان و هێزا خۆ ب به‌لاڤه‌كرنا دینێ پێغه‌مبه‌رێ خوشتڤی سلاڤێت خودێ ل سه‌ربن رابیت، و هه‌می تشتێت خۆ قوربانی دینێ پێغه‌مبه‌رێ خوشتڤی سلاڤێت خودێ ل سه‌ربن بكه‌ت، و زكێ وی ل سه‌ر دینێ پێغه‌مبه‌رێ خوشتڤی سلاڤێت خودێ ل سه‌ربن بێشیت، كا چاوا زكێ وی ل سه‌ر وی و كه‌س و كارێت وی دئێشێت، و رازی نه‌بیت كه‌س پاڤێژیته دینێ پێغه‌مبه‌رێ خوشتڤی سلاڤێت خودێ ل سه‌ربن و له‌كه‌دار بكه‌ت.
ـ دیسا ئه‌و یێ راسته یێ حه‌ژ هه‌ڤالێت پێغه‌مبه‌رێ خوشتڤی سلاڤێت خودێ ل سه‌ربن بكه‌ت، و به‌ره‌ڤانیێ ژ ژوان بكه‌ت، و رێزگرتنا خه‌لكێ مالا پێغه‌مبه‌رێ خوشتڤی سلاڤێت خودێ ل سه‌ربن بكه‌ت، نه‌خاسمه هه‌ڤژینێت پێغه‌مبه‌رێ خوشتڤی سلاڤێت خودێ ل سه‌ربن، ئه‌وێت د مالێت واندا وه‌حی هاتیه خوار و خودێ پاك و پاقژكرن و خه‌لاتكرین و هه‌ژی دیتین، تایبه‌ت دایكا مه موسلمانان عائیشایێ خودێ ژێ رازی بیت.
ـ دیسا ئه‌و یێ راسته یێ گرنگیا هه‌ژی ب ده‌ته ژیان ناما پێغه‌مبه‌رێ خوشتڤی سلاڤێت خودێ ل سه‌ربن، و ب دورستی بخوینیت، بۆ چاڤلێكرن و چونا ل دویف ده‌وسا پێغه‌مبه‌رێ خوشتڤی سلاڤێت خودێ ل سه‌ربن، و وه‌رگرتنا چامه و ده‌رس و عیبره‌تان، چونكێ ژیانا وی لایێ ل كاره ژ ئیسلامێ.
ـ دیسا ئه‌و یێ راسته یێ بوچون و دیتنا خۆ ب سه‌ر فه‌رمانا پێغه‌مبه‌ری سلاڤێت خودێ ل سه‌ربن نه ئێخیت، و ئاخفتنا خۆ نه دانیته به‌رامبه‌ر ئاخفتنا پێغه‌مبه‌رێ خوشتڤی سلاڤێت خودێ ل سه‌ربن.
ـ دیسا ئه‌و یێ راسته یێ هه‌ر ده‌مێ فه‌رمانا پێغه‌مبه‌رێ خوشتڤی سلاڤێت خودێ ل سه‌ربن گولێ بوو وی چ ئاخفتن نه‌بن ژبلی من بهیست و من گوهداری كر.
ـ دیسا ئه‌و یێ راسته یێ ل دویف رێكا پێغه‌مبه‌رێ خوشتڤی سلاڤێت خودێ ل سه‌ربن بچیت بێ كێمكرن و زێده‌كرن و شه‌ریعه‌ت و فه‌رمان چاوا هاتیه وه‌سا وه‌رگریت.
ـ دیسا ئه‌و یێ راسته یێ شه‌رعه‌تێ پێغه‌مبه‌رێ خوشتڤی سلاڤێت خودێ ل سه‌ربن بۆ خۆ بكه‌ته یاسا و دستور و بجهـ بینیت و ب چو تشتان ژ یاسا و رێبازان نه‌گۆهوریت و ئیسلام به‌رنامه‌یێ ژیانا وی بیت و به‌س.
ـ دیسا ئه‌و یێ راسته یێ پێغه‌مبه‌رێ خوشتڤی سلاڤێت خودێ ل سه‌ربن به‌رز راگریت، و حورمه‌ت و رێزگرتنا هه‌ژی ب ده‌ته پێغه‌مبه‌رێ خوشتڤی سلاڤێت خودێ ل سه‌ربن، وئه‌ڤه ژی ب پێگریا دورست ب فه‌رمانێت وی بجھـ دهێت.
ـ دیسا ئه‌و یێ راسته یێ حه‌ژ پێغه‌مبه‌رێ خوشتڤی سلاڤێت خودێ ل سه‌ربن بكه‌ت پتر ژ خۆ و مالێ خۆ و مالا خۆ و دایبابێت خۆ و ژ مرۆڤان هه‌میان.
ـ دیسا ئه‌و یێ راسته یێ دویڤچوونه كا دورست بۆ پێغه‌مبه‌رێ خوشتڤی سلاڤێت خودێ ل سه‌ربن بكه‌ت، و چاڤ ل وی بكه‌ت، و ئه‌و رێبه‌ر و پێشه‌وا چاڤلێكریێ وی بیبت، و ژ رێكا وی لانه‌دت و ژ گۆهداریا پێغه‌مبه‌رێ خوشتڤی سلاڤێت خودێ ل سه‌ربن ده‌رنه‌كه‌ڤییت، و ژ فه‌رمانێت پێغه‌مبه‌رێ خوشتڤی سلاڤێت خودێ ل سه‌ربن ده‌رنه‌چیت.
ـ ئه‌و یێ راسته یێ گوهداریا پێغه‌مبه‌رێ خوشتڤی سلاڤێت خودێ ل سه‌ربن بكه‌ت و نه‌گۆهداریا پێغه‌مبه‌رێ خوشتڤی سلاڤێت خودێ ل سه‌ربن نه‌كه‌ت، و ژ فه‌رمانێت وی ده‌رنه‌كه‌ڤیت و نه‌ده‌ته سه‌ر، و خۆ ژ نه‌هیێت وی هه‌میان هیروگران گۆتن و كریاران ب ده‌ته پاش و نه‌كه‌ت.
یێ ب ڤی ره‌نگی بیت ئه‌و د ئاهه‌نگ گێرانا خۆدا یێ راسته و خودێ مه ژ ڤان مرۆڤان ب دانیت و ب هه‌ژمێریت و دویماهیك ئاخفتنا مه هه‌ر حه‌مد پاك و پاقژی بۆ خودایێ هه‌می جیهانان بیت.
