ب / جمهورێ زانايان دبێژن: مه‌كروهه مرۆڤ خۆ ب ده‌ستێ راستێ بشۆت و نه‌حه‌رامه، به‌لێ نه ژ ره‌وشتێت جوانه ئه‌م خۆ ب ده‌ستێ راستێ بشۆين، و هه‌كه مه وه‌كر مه سه‌رپێچيا سونه‌تێ كر، نه‌كو مه حه‌راميه‌ك كر، چونكى ئه‌بى قه‌تاده (خودێ ژێ رازي بيت) دبێژيت: پێغه‌مبه‌رێ خودێ (سلاڤێت خودێ لێ بن) گۆت: ((هه‌كه ئێكى ژ هه‌وه ميزت، بلا ب ده‌ستێ راستێ شه‌رمينگه‌ها خۆ نه‌گريت، و ب ده‌ستێ راستێ خۆ پاقژ نه‌كه‌ت))، و پێغه‌مبه‌رێ خودێ (سلاڤێت خودێ لێ بن) هه‌روه‌كى حه‌فسا دايكا مه موسلمانان (خودێ ژێ رازي بيت) ژێ خه‌به‌ر دده‌ت، دبێژيت: پێغه‌مبه‌رێ خودێ (سلاڤێت خودێ لێ بن) ده‌ستێ خۆ يێ راستێ بۆ خوارنا خۆ و ڤه‌خوارنا خۆ و جلكێ خۆ ب كار دئينا، و يێ چه‌پێ بۆ تشتێت ژبلى ڤان بوو. ژ وێ، گۆت: ده‌ستێ راستێ يێ پێغه‌مبه‌رێ خودێ (سلاڤێت خودێ لێ بن) بۆ ده‌ستنڤێژ شويشتنا وى و خوارنا وى بوو، و يێ چه‌پێ بۆ ده‌ستئاڤا وى و هه‌ر تشته‌كێ ب ئه‌زيه‌ت (وه‌كى كفكرنێ... و هۆسا) بوو. ئيمامێ نه‌وه‌وى (خودێ ژێ رازي بيت)، دبێژيت: موسته‌حه‌به و باشه پێشئێخستنا راستێ د هه‌ر تشته‌كێ ژ بابه‌تێ قه‌درگرتنێ بيت وه‌كى: ده‌ستنڤێژێ و ته‌يه‌مومێ و كرنه‌به‌را پێلاڤێ و خوفێ (گۆرێ) و چۆنا مزگه‌فتێ و كارئينانا سيواكى و كلدانانێ و نينۆك برِينێ و كورتكرنا سمبێلا و كێشانا مويێت بن كه‌فشان و سه‌ر تراشينێ و سلاڤدانا نڤێژێ و خوارنێ و ڤخوارنێ و چۆنا ده‌ستى و ده‌ستكرنا به‌رێ ره‌ش و ده‌ركه‌فتن ژ ده‌ستئاڤێ و دان و وه‌رگرتنێ و غه‌يرى ڤان يێت وێ رامانێ دده‌ن، و باشتره چه‌پ بێته پێشئێخستن د هه‌ر تشته‌كێ دژى ڤانادا، وه‌كى كفكرن و تفكرن و چۆنا جهێ ده‌ستئاڤێ و ده‌ركه‌فتن ژ مزگه‌فتێ و ئێخستنا خوفێ (گۆرێ) و پێلاڤێ و شه‌لوالى و كراسى و خۆ پاقژكرنێ و كرنا هه‌ر كاره‌كێ نه‌جوان (وه‌كى راكرنا هه‌ر پيساتيه‌كا ل سه‌ر جلكى هه‌بيت... هتد). ڤێجا هه‌كه تو بشێى خۆ ب ده‌ستێ چه‌پێ بشۆى ئه‌و ب خێرتره، و ياباش ئه‌وه تو خۆ فێركه‌يه ده‌ستێ چه‌پێ و نه‌بێژى ئه‌ز ژ بچويكاتى يێ فێربوويمه راستێ، ئه‌ڤه يا خه‌له‌ته، به‌لێ هه‌كه تو نه‌شياى ب دورستى خۆ ب ده‌ستێ چه‌پێ پاقژكه‌ى چو نينه، دورسته تو ده‌ستێ راستێ ب كار بينى به‌لێ پا بزانه تو يێ سونه‌ته‌كێ ژ خۆ دبه‌ى و خودێ چێتر دزانيت.
