ب/ د زمانێ عه‌ره‌بيدا.. سيواك ژ (ساك) هاتيه ئانكو: (دلك)، و رامانا وێ ئينان و برنه، ئه‌ڤه ژ لايێ زمانيڤه، و د ئێديه‌ما زاناياندا كارئينانا داركه‌كيه، يان وه‌كى داركى بۆ پاقژكرنا ددانان ژ زه‌راتى و پيساتيێ، دا پاقژ بمينن و بهێن ژ ده‌ڤى نه‌هێت، ڤێجا هه‌ر تشته‌كێ ڤێ ئارمانجێ ب جهـ بينيت جهێ سيواكى دگريت، به‌لێ دگه‌ل هندێ ژى يا سونه‌ت ئه‌وه ئه‌ڤ داركه ژ دارا (ئاراك)ێ بيت ئه‌وا ل حيجازێ شين دبيت، چونكى ڤێ دارێ گه‌له‌ك مفايێت خۆ يێت ساخله‌مى و زانستى يێت هه‌ين، هه‌روه‌كى زانستێ ئه‌ڤ چه‌نده وه‌كى راستيه‌ك دياركرى، له‌وا دبێژن: باشترين مه‌عجوينێ ددانا ئه‌وه يێ ژ سيواكێ هاتيه وه‌رگرتن، چونكى پارچه‌ك نينه ژ له‌شى هه‌كه مفای بۆ خۆ ژ ڤى داری نه‌بينيت و دبيت فرچه كارتێكرنه‌كا نه‌باش ل سه‌ر پتيان بهێليت، به‌لێ پا سيواكى ئه‌ڤ زيانه نينه، هه‌ر ژبه‌ر ڤێ چه‌ندێ ژى پێغه‌مبه‌رێ خۆشتڤى دبێژيت: ((السواك مطهره للفم مرضاه للرب))، ئانكو: سيواك پاقژكه‌ره بۆ ده‌ڤى، رازيكه‌ره بۆ خودێ.
و پێغه‌مبه‌رێ خۆشتڤى (سلاڤێت خودێ لێ بن) گه‌له‌ك سيواك ب كار دئينا، نه‌خاسمه پشتى ده‌ستنڤێژ شويشتنێ و دگه‌ل نڤێژێ و دگه‌ل خواندنا قورئانێ و ده‌مێ ژ خه‌و رابوونێ. و چه‌ند فه‌رمووده ل سه‌ر كارئينا سيواكێ هاتينه، ژ وان:
ئه‌بى هوره‌يره (خودێ ژێ رازی بيت)، گۆت: پێغه‌مبه‌رێ خودێ (سلاڤێت خودێ لێ بن) گۆت: هه‌كه من ژبه‌ر هندێ نه‌با ل سه‌ر ئوممه‌تا دێ زه‌حمه‌ت كه‌ڤيت، يان ل سه‌ر خه‌لكێ.. دا دگه‌ل هه‌مى نڤێژان فه‌رمانا وان ب سيواكێ كه‌م.
ديسا حوزه‌يفه (خودێ ژێ رازی بيت)، دبێژيت: ده‌مێ پێغه‌مبه‌رێ خودێ (سلاڤێت خودێ لێ بن) ژ خه‌وێ هشيار دبوو دارێ سيواكێ د ده‌ڤێ خۆ ددا.
ديسا عائيشا (خودێ ژێ رازی بيت)، دبێژيت: مه بۆ پێغه‌مبه‌رێ خودێ (سلاڤێت خودێ لێ بن) سيواك و ئاڤا وى به‌رهه‌ڤ دكر، خودێ هشيار دكر وه‌ختێ وى دڤيا ژ شه‌ڤێ هشياركه‌ت، دا سيواكى ب كار ئينيت و ده‌ستنڤێژا خۆ شۆت و نڤێژێ كه‌ت.
هه‌روه‌سا ئه‌نه‌س (خودێ ژێ رازی بيت) دبێژيت: پێغه‌مبه‌رێ خودێ (سلاڤێت خودێ لێ بن) گۆت: من زێده ژ هه‌وه خواست سيواكى ب كار بينن. و شوره‌يحێ كورێ هانى (خودێ ژێ رازی بيت) دبێژيت: من گۆته عائيشايێ (خودێ ژێ رازی بيت)، پێغه‌مبه‌رێ خودێ (سلاڤێت خودێ لێ بن) ده‌ست ب چ دكر ده‌مێ دهاته د مالا خۆڤه، گۆت: ب سيواكى و خودێ چێتر دزانيت.
