ب : بێگومانه خواندنا ته‌فسیران و فێربوونا راڤه‌كرنا قورئانا پیرۆز خێره، چونكی ئه‌و باشترین رێكه، ئه‌م قورئانێ تێبگه‌هین و ب دورستی كار پێ بكه‌ین خودایێ مه‌زن دبیژیت: (كِتَابٌ أَنزَلْنَاهُ إِلَيْكَ مُبَارَكٌ لِّيَدَّبَّرُواْ آيَاتِهِ وَلِيَتَذَكَّرَ أُوْلُو الألْبَابِ) مه قورئانا بۆ هه‌وه ئینایه خوار دا هزرا خۆ تێدا بكه‌ن و تیبگه‌هن و كار پێ بكه‌ن و ئه‌ڤ ئایه‌ته بانگخوازیه بۆ فێربونا راڤه‌كرنا قورئانێ، و پێغه‌مبه‌ر سلاڤێت خودێ ل سه‌ربن بۆ هه‌ڤالێت خۆ راڤه‌دكر خودێ مه‌زن دبێژیت: (وَأَنزَلْنَا إِلَيْكَ الذِّكْرَ لِتُبَيِّنَ لِلنَّاسِ مَا نُزِّلَ إِلَيْهِمْ وَلَعَلَّهُمْ يَتَفَكَّرُونَ) راسته خواندنا راڤه‌كرنێ گه‌له‌گه و یا فه‌ره، به‌لێ جهێ قورئان خواندنێ ناگریت، گه‌ل كۆ ژ كه‌ره‌مێت مه‌زن مرۆڤ دراڤه‌كرنا قورئانێدا یێ شاره‌زابیت پێغه‌مبه‌رێ خوشتڤی سلاڤێت خودێ ل سه‌ربن ده‌مێ دوعا بۆ عه‌بدوللاهێ كورێ عه‌باسی كرین ئه‌ڤ دوعایه بۆ كر یا خودێ وی د دینیدا شاره‌زا بكه و فێری راڤه‌كرنا قورئانێ بكه: (اللهم فقهه في الدين وعلمه التأويل) و دڤێت ئه‌م هڤسه‌نگه‌یه‌كێ دناڤبه‌را قورئان خواندنێدا و راڤه خواندنێدا بكه‌ین و نابیت ژیێ وی هه‌می بچویت و چ ژ راڤه‌كرنا قورئانێ نه‌زانیت، و صه‌حابان هه‌ردوو پێكڤه كومدكرن زانینا قورئانێ و زانینا ته‌فسیر و راڤه‌كرنا قورئانێ، هوسا زانین و كاركرن پێكڤه وه‌رگرتن، و خودێ هه‌ردوو ب رزقێ وان كرن؛ له‌وا ئبن مه‌سعود خودێ ژێ رازی بیت دبیژیت: ئه‌م ژ ده‌ھ ئایه‌تان نه دبورین هه‌تا ئه‌م باش تێدا شاره‌زا نه‌باینه و باش فێرنه‌بباینێ، خواندنا وان رامان وراڤه‌كرنا وان و كاركرن ب فه‌رمان و ئه‌حكامێت وان و پاشی ئه‌م دچوینه ده‌هێت دی، و هه‌ر ئه‌و دبێژیته مرۆڤه‌كێ: (إنك في زَمَانٍ كَثِيرٌ فُقَهَاؤُهُ قَلِيلٌ قُرَّاؤُهُ تُحْفَظُ فيه حُدُودُ الْقُرْآنِ وَتُضَيَّعُ حُرُوفُهُ وَسَيَأْتِي على الناس زَمَان قَلِيلٌ فُقَهَاؤُهُ كَثِيرٌ قُرَّاؤُهُ يحفظ فيه حُرُوفُ الْقُرْآنِ وَتُضَيَّعُ حُدُودُهُ) تۆ یێ د زه‌مانه‌كێدا فقهزانێت وان گه‌له‌كن و خوینده‌وارێت د كێمن توخیبێت قورئانێ تێدا دپارازتینه و پێتێت وێ دبه‌رزه‌كرینه، و زه‌مانه‌ك ل سه‌ر خه‌لكیرا دێ هێت فقهزانێت وان دكێمن و خواندوارێت وان زێده‌نه پیتێت فورئانێ تێدا دێ هێنه پارازتن و توخیبێت وێ به‌رزه‌بن.
به‌لێ ل گه‌ل ڤێ ژی خواندنا قورئانێ خێره‌كا تایبه‌ته و ته‌فسیر نه وه‌كی وێیه ل گه‌ل جھـ و گرنگی و فه‌راتیا راڤه‌كرنێ و ده‌قێت تایبه‌ت ژ حه‌دیسێ ل سه‌ر خێرا قورئان خواندنێ هاتینه ژوان:
ئێك: (من قَرَأَ حَرْفًا من كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لَا أَقُولُ ألم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ) هه‌ركه‌سێ پیته‌كێ ژ قورئانێ بخوینیت خێره‌ك دێ بۆ هه‌بیت و هه‌ر خێره‌ك ب ده‌هانه و ئه‌ز نابێژم ئه‌لیفلامیم پیته‌كه به‌لێ ئه‌لیف پیته‌كه و لام پیته‌كه و میم پیته‌كه.
دوو: (اقرأوا الْقُرْآنَ فإنه يَأْتِي يوم الْقِيَامَةِ شَفِيعًا لِأَصْحَابِهِ) قورئانێ بخوینن ب راستی ئه‌و دێ رۆژا قیامه‌تێ هێت به‌ره‌ڤانیێ ژ خودانێ خۆ كه‌ت.
سێ: (قال يقال لصاحب القرآن يوم القيامة أقره وارقه ورتل كما كنت ترتل فإن منزلتك في آخر آية تقرأها) رۆژا قیامه‌تێ د به‌حه‌شتێدا دێ بێژنه قورئان خوینی، بخوینه هه‌روه‌كێ ته د دونیایێدا دخواند و سه‌ركه‌ڤه ب راستی جهێ ته یێ ل وێ جهێ تۆ دویماهیك ئایه‌ت تێدا دخوینی.
