ب / مرۆڤ قورئانێ بۆ ئێكى بخوينيت هەروەكى هەر تشتەكێ دى ددەتێ يان جلكەكى بۆ كەردكەت، ئەڤە ب چو رەنگان ژ پێغەمبەرێ خۆشتڤى (سلاڤێت خودێ لێ بن) و ژ سەحابى و تابعى و چو زانايان نەهاتيە زانين، بەلێ تشتێ زانا ل سەر ژێك جودا، ئەڤەيە: هەكە مرۆڤى قورئان بۆ خۆ خواند و دويماهيێ دوعا بكەت، خودێ خێرا ڤێ ختمێ و ڤێ خواندنێ بگەهينيتە بێڤان كەسى، كا دێ گەهيت يان نە؟، و ئەڤە كا دورستە يان نە؟، ئها جودابوونا ل سەر ڤێ هەى، ئيمامێ شافعى (خودێ ژێ رازی بیت) دبێژيت: خێرا قورئان خواندنێ بۆ كەسێ ناچيت و نەيا دورستە مرۆڤ بێژيت يا خودێ خێرا ڤێ ختمێ بگەهينە بێڤان كەسى، چونكى خودێ مەزن دبێژيت: ((وَأَن لَّيْسَ لِلْإِنسَانِ إِلَّا مَا سَعَىٰ)) ئانكو: ژبلى يا مرۆڤى كرى، چو يێ دى ناگەهيتە مرۆڤى، و ئەو خواندنا غەيرى وى دخوينيت، ل دويف ڤێ ئايەتێ ناگەهيتێ؛ چونكى وى نەكريە، بەلێ جمهورێ زانايان خودێ ژ وان رازى بيت دبێژن: دورستە مرۆڤ دويماهيا ختما قورئانێ دوعا بكەت، خودێ خێرێ بگەهينيتە وى، يێ بڤێت، بەلێ ب مەرجەكى دەمێ دەستپێكێ ئەم دخوينين ئەم ب ناڤێ كەسێ ناخوينين، ئەم بۆ خۆ دخوينين، هات و چۆ دويماهيێ ئەز دوعا دكەم خودێ خێرا، من خواندى بگەهينيتە بێڤانى، و ئەڤا بەلاڤ د ناڤ خەلكيدا هەر ل سەرێ ختمێ بێژن: بۆ بێڤانى ئەز دێ خوينم، ئەڤە نەيا دورستە و چو بۆ نينە، و ژبلى چو راستى بۆ ڤێ چەندێ نينە.. هندە زيانان ژى دگەل خۆ پەيدا دكەت، ژ وان: قورئان لەز و بەز دهێتە خواندن و خەم دێ بيتە ئەو كا كەنگى ختمە دێ هێتەكرن، و خودێ مەزن دبێژيت: ((وَرَتِّلِ الْقُرْآنَ تَرْتِيلًا )) پێغەمبەرێ خۆشتڤى (سلاڤێت خودێ لێ بن) دبێژيت: رامان ژێ ئەڤەيە مرۆڤ نەرم و ل سەر خۆ قورئانێ بخوينيت، و يێ ختمێ بۆ غەيرى خۆ دخوينيت خەما وى بەس ئەوە كا كەنگى دێ گەهيتە دويماهيا سۆرەتێ يان جوزئى، ئەڤە هەكە يێ ئەمين بيت و ب دورستى بخوينيت، زيانا دى ئەڤەيە: هزر د ئايەتێت قورئانێدا ناهێتەكرن و خەمخوارنا تێگەهشتنا قورئانێ ناهێتە خوارن، و يا فەر ژ خواندنا قورئانێ مرۆڤ دگەل رامان و تەفسير و حەرف و پەيڤێت قورئانێ بژيت، و ئەڤە نابيت، ڤێجا ژبەر هندێ ختما ب ڤى رەنگى نەدورستە، ب تايبەتى هەكە ب پارە بيت، زانايێت مە دبێژن: هەكە هاتە فرۆتن هەردوو ژ خێرێ بێ باربوون، و ئەوێت ختمان بۆ دايبابێت خۆ دكەن بلا بزانن خێرا دايبابان هەر يا تێدا، پێغەمبەرێ خۆشتڤى (سلاڤێت خودێ لێ بن) دبێژيت: رۆژا قيامەتێ خودێ مەزن دێ تانجەكى دانيتە سەر سەرێ هندە دايبابان دێ ميننە حێبەتى ئەڤە چ تانجە؟! ملياكەت دێ بێژن: ئەڤە يا عەيالێت هەوەيە يێت قورئان خوين، ڤێجا مرۆڤ عەمەلێ دايبابێت خۆيە، هەر دێ خێر گەهيتە وان چ دويماهيێ دوعا بكەت يان نەكەت، نەخاسمە هەكە دايبابان خەما فێربوونا عەيالێ خۆ خواربيت، كو فێرى قورئانێ ببن، بەلێ دگەل هندێ ژى ژ باشيا دگەل دايبابانە مرۆڤ وان چو جار ژ دوعايان بێ بار نەكەت و وان ژبير نەكەت، و خودێ چێتر دزانيت.
