ب / ب راستى ئەڤرۆ مە ئارێشا تێگەهشتنێ يا هەى، و تێگەهشتنا دورست يا كێمە، و هەر ئەڤەيە دبيتە ئەگەرێ هندێ ئەم بەرهنگارى نەخۆشيان دبين و ژێكڤەبوونێ چێ دكەين، و ئەڤ ئايەتە ب تايبەتى ژ كەڤن وەرە خەلەت دهێتە راڤەكرن، لەوا بۆ مە ژ ئەبو بەكرى (خودێ ژێ رازی بیت) هاتيە زانين هەروەكى ئەبو داوودى بۆ مە ژ قەيسى ڤەگوهاستى، دبێژيت: ئەبو بەكرى (خودێ ژێ رازی بیت) گۆت: گەلى خەلكى هوين ڤێ ئايەتێ ((يَا أَيُّهَا الَّذِينَ آمَنُوا عَلَيْكُمْ أَنفُسَكُمْ لَا يَضُرُّكُم مَّن ضَلَّ إِذَا اهْتَدَيْتُمْ)) دخوينن و خەلەت تێدگەهن، و من ژ پێغەمبەرى (سلاڤێت خودێ لێ بن) يا گولێ بووى دبێژيت: ((هەكە خەلكى زۆردار ديت و دەستێت وى نەگرتن، نێزيكە، خودێ ئيزايەكێ ژ دەف خۆ بدەتە بەر وان هەميان)). بەرێ خۆ بدآ يێ ژ هەميان نێزيكتر بۆ پێغەمبەرێ خۆشتڤى (سلاڤێت خودێ لێ بن) كا چاوا تێدگەهيت، تێدگەهيت نابيت كەس وەسا راڤەكەت كو وى شۆلە ب كەسێ نينە، و وى شۆل ب خۆ تنێ يێ هەى، و ل سەر وى نەواجبە ئەمرى ب باشيێ بكەت و نەهيێ ب خرابيێ بكەت، و رامانا ئايەتێ ئەڤەيە: گەلى خودان باوەران هەكە هوين د باش بن و دورست بن و راستەرێكرى بن ژ كەسەكى نەترسن يێت سەردا چۆيى و بەرزە نەشێن چو زيانێ بگەهيننە هەوە. هەروەكى د ئايەتەكا ديدا ئەمر دكەت: ((وَإِن تَصْبِرُوا وَتَتَّقُوا لَا يَضُرُّكُمْ كَيْدُهُمْ شَيْئًا ))ئانكو: هەكە هوين بێهنا خۆ ل سەر ئەزيەتا دژمن دينان بكێشن و تەقوا خودێ بكەن، و ژ وى بترسن، فند و فێل و پيلانێت وان چو زيانێ ناگەهيننە هەوە، و خودێ چێتر دزانيت.
