ب /ئەز دەستخۆشيێ ل تە دكەم ل سەر وێ حەزكرنا تە، بەلێ پێدڤيە ئەو حەزكرن تە پالدەت تو ب رەنگەكێ دورست قورئانێ بخوينى، ئەو ژى دڤێت تو ل دەف ئێكێ قورئانێ بخوينى و فێر ببى، دا بەرەكەت بكەڤيتە خواندنا تە، و نەيا جوانە هەكە مرۆڤ ژ خۆ يێ پشتراست نەبيت مرۆڤ قورئانێ بخوينيت، بەلێ هەكە يێ شارەزابيت و بێ دەستى خەلتيەك ژێ چێ بوو، چو نينە و نەگونەهە، و دڤێت ئەم بزانين رێكا دورست يا فێربوونا قورئانێ ئەم ژ ئێكى وەرگرين و سەردەستێ سەيدايەكى فێر ببين، چونكى هۆسا قورئانا پيرۆز يا هاتيە وەرگرتن پێغەمبەرێ خۆشتڤى (سلاڤێت خودێ لێ بن) يا ژ جبريلى وەرگرتى و سەحابان يا ژ پێغەمبەرێ خۆشتڤى (سلاڤێت خودێ لێ بن) وەرگرتى و تابيعينان يا ژ سەحابان وەرگرتى و هۆسا ئێكى يا ژ ئێكى وەرگرتى هەتا گەهشتيە مە، و هەكە ئەم ب ڤێ رێكێ فێر نەبينە قورئانێ، خودان خەلەتى دێ هەر ميننە تێدا، بلا مە چەند باوەرنامێت بلند هەبن. مە مامۆستا هەبوون باوەرنامە ب ئەدەبێ عەرەبى هەبوون و دەرس ل زانكۆيێ ددان، بەلێ چونكى رێكا دورستا وەرگرتن و فێربوونا قورئانێ نەگرتبوو، هەر خەلەت قورئان دخواند و نەدشيا ب دورستى قورئانێ بخوينيت، دگەل كو خودانێ باوەرنامەكا بلند بوو و بسپۆرێ زمانێ عەرەبى بوو، ڤێجا بلا ئەم د رژد بين سەر فێربوونا قورئانێ، و ل سەر د هشيار بين، رێكا سونەتێ بگرينە بەر خۆ، ئەو ژى: ئەز ل سەر دەستێ ئێكى شارەزا فێر ببمە قورئانێ، وى ژ ئێكى بەرى خۆ وەرگرتبيت و هۆسا هەتا دگەهيـە پێغەمبەرێ خۆشتڤى (سلاڤێت خودێ لێ بن) و ژ پێغەمبەرێ خۆشتڤى (سلاڤێت خودێ لێ بن) دگەهيتە جبريلى سلاڤ ل سەربن و ژ جبريلى دگەهيتە دەپێ پارستى، بەرێ خۆ بدێ ئەڤ رێكە چەندا پيرۆزە زنجيرا فێربوونا تە ژ سەيدايێ تە كێشا و گەهشتە پێغەمبەرێ خۆشتڤى (سلاڤێت خودێ لێ بن) و ژ پێغەمبەرێ خۆشتڤى (سلاڤێت خودێ لێ بن) گەهشتە جبريلى سلاڤ ل سەر بن، و ژ جبريلى سلاڤ ل سەر بن گەهشتە دەپێ پارستى، هەكە تە ئەڤ زنجيرە نەبيت د فێركرنا قورئانێدا بريارێ بدە ژ ئەڤرۆ كار بكەى ڤێ زنجيرا پيرۆز ب دەست خۆڤە بينى و سەحكە سەيدايەكى ب رێكا سونەت و دورست فێربوويێ دا رێكا تە ژى بگەهيتە پێغەمبەرێ خۆشتڤى (سلاڤێت خودێ لێ بن) و دا ببيە ژ وان يێت ژ هەميان چێتر.
بەرێ خۆ بدێ پێغەمبەرێ خۆشتڤى (سلاڤێت خودێ لێ بن) چ دبێژيت: ((باشترينێ هەوە، ئەوە يێ فێرى قورئانێ بووى و قورئانێ فێر دكەت)). و هەكە تو تێدا شارەزابووى دێ دگەل كێ بى، ديسا بەرێ خۆ بدێ پێغەمبەرێ خۆشتڤى (سلاڤێت خودێ لێ بن) چ دبێژيت: ((يێ قورئانێ دخوينيت و ئەو تێدا يێ شارەزا يێ دگەل ملياكەتێت قەدرگران و گوهدارە))، و خودێ چێتر دزانيت.
