ب / ب راستى ئەڤە ل سەر وەختێ پێغەمبەرێ خۆشتڤى (سلاڤێت خودێ لێ بن) نەبوو، و ل سەر وەختێ جهگرێت راشد ژى نەبوو، و ل سەر وەختێ ئيمام و زانايێت ناڤدار ژى نەبوو، و ئەڤە درەنگ يا دەركەفتى، من نەخوانديە بەلێ من يا ژ زانايەكى گولێ بووى سەردەمێ عەبدلمەلكێ كورێ مەروانى ئەڤە پەيدابوو، ل مزگەفتێ دبوو ئزديحام و قەرەبالغ و خواندنا خواندڤانان تێكەل دبوو و ديمەنەكێ نەيێ جوان چێ دبوو، ئينا قورئان خوينەك فەرمان پێ كر ئەو بخوينيت يێت دى گوهداريا وى بكەن دا دەنگ و خواندن تێكەل نەبيت، كەس نەزانيت كا چ دخوينيت و حوكمێ خواندنێ ل سەر ئنيەتێ دراوەستيت، چونكى پێغەمبەرێ خۆشتڤى (سلاڤێت خودێ لێ بن) دبێژيت: ((ب راستى هەمى كار و كريار ب ئنيەتانە، و ب راستى بۆ هەر مرۆڤەكى كا چ ئنيەت ئينايە دێ ئەو بيت))، ڤێجا يێ دخوينيت و نەبێژيت ئەڤە سونەتە يان واجبە، بەلكى رێكەكە بۆ هشياركرنێ و ئاگەهداركرنێ، چونكى ئالۆزى و گرفتارى و خەم و كێشەيێت ڤى چەرخى گەلەكن و مژويلى زۆرن، ژبەر هندێ دخوازيتە هندێ بێنە ئاگەهداركرن، و هەكە ئنيەت پێ ئەڤە بيت دبيت چو تێدا نەبيت. هەر حالێ هەى ئەڤ كارێت هۆسا ئەوێت جهێ ئختيلافێ نابيت ببنە ئەگەرێ هندێ ئەم پێكڤە بمينين ئێك يێ دى گونەهباركەت و ببيتە ئەگەرێ نەڤيان و ژێكڤەبوونێ نەخوينى چو تێدا نينە و بخوينى و ب ئنيەتا ئاگەهداركرنا خەلكى چو نينە، و خودێ چێتر دزانيت.
