ب / دەستپێكێ ئەز دەستخۆشيێ ل ڤێ خويشكێ دكەم و دبێژمێ دەستێت تە خۆش، و خودێ هاريكاريا تە بكەت هۆسا دلێ تە ب قورئانێڤە يێ گرێدايە و هۆسا تو خەمێ ژ قورئانێ دخۆى، و يا رژدى ل سەر فێربوونا قورئانێ، و خۆزى هەمى خويشك و برايێت مە هۆسابان و ب ڤى رەنگى خەم ژ فێربوونا قورئانێ خواربان.
شيرەتا من ل ڤێ خويشكێ بزانيت هەمى خويشكێت دۆرماندۆر بۆ وێ خويشكن، و دشێت پەيوەنديێ ب يا ژ هەميان نێزيكتر بكەت، و قورئانێ ل دەف بخوينيت، و هەكە چو خويشك نەديتن دشێت ل دەف زەلامەكێ جهێ باوەريێ بخوينيت، و چو تێدا نينە و دورستە ـ ب مەرجەكى ـ هەكە فەرمانێت شەرعى هاتنە پاراستن، و هەكە نەشيا بچيتە دەف كەسێ هنگى دشێت ب رێكا تەكنۆلۆجيا سەردەم قورئانێ بخوينيت ب رێكا كۆمپوتەرى و سەتەلايتێ و بەرنامێت تايبەت يێت فێربوونێ. ب راستى ئەڤە رێكەكا ب ساناهيە و يا بێ زەحمەتە.
ل ڤێرێ من دڤێت بێژمە دايبابان ژ خودێ بترسن بۆچى هوين خەما عەيالێ خۆ ناخۆن؟!، ما هوين نوزانن فێركرنا وان بۆ قورئانێ واجبەكێ شەرعيە ل سەر هەوە دڤێت هوين سەيداى و فێركەرى بۆ پەيداكەن يان رێكەكێ بۆ عەيالێ خۆ ببينن و فێرى قورئانێ ببن؟، و ئێكا وەكى ڤێ خويشكێ ل سەر دايبابان واجبە خەما وێ بخۆن، نە ئەو تنێ خەما خۆ بخۆت؛ دڤێت دايباب بۆ سەحكەنە سەيدايەكى يان رێكەكێ بۆ ببينن دا فێرى قورئانێ ببيت، بەلێ مخابن دايبابان ئەڤ بەرپرساتيە يا پشت گوهێ خۆڤە هاڤێتى و بۆ خۆ ناكەنە خەم، بەلكى بەروڤاژى ناهێلن ئەو ژى بۆ خۆ سەحكەنە رێكەكێ و دەف سەيدايەكى بخوينن. ب راستى حسابەكا گران و دژوار يا ل پێشيا ڤان رەنگە دايبابان، و دا ئاشكرابيت فێربوونا ب رێكا مسەجلێ و ئامويرێت ئەڤرۆ رێكەكا كاريگەرە.
خويشكەكا كۆرە تەلەفۆن بۆ من كر، گۆت: ئەز گەلەك و گەلەك حەز دكەم قورئانێ بخوينم بەلێ ئەز نابينم و كەس نينە نيشا من بدەت، من بەرێ وێ دا مسجلێ و ختما قورئانێ، پشتى هەيامەكێ درێژ تەلەفۆن بۆ من كرەڤە، گۆت: ئەز ئەوم ئەوا كۆرە ئەوا من بەرى چەندەكێ تەلەفۆن بۆ تە كرى، خودێ خێرا تە بنڤێسيت، دوو سۆرەت تنێ يێت ماين دآ قورئانێ هەميێ خلاسكەم و ژ بەركەم و بۆ من هندە قورئان خواند دابزانم كا خواندنا وێ يا چاوايە، ب راستى ئەز ل وێ باوەرێمە كێم و كێم يێت هەين ژ ژنان وەكى وێ جوان و دورست قورئانێ بخوينن، و خودێ چێتر دزانيت.
