ب / تەفسيرزانێت مە خودێ ژ وان رازى بيت دبێژن: يەعقوب پێغەمبەرى (سلاڤێت خودێ لێ بن) ژ كورێت خۆ خواست پێكڤە نەدەنە ئێك دەرگەه، چونكى كورێت وى گەلەك بوون، يازدە كەس بوون و دگەل يوسفى(سلاڤێت خودێ لێ بن) دبوونە دوازدە، و هەمى گەنج و جەحێل بوون، و دترسيا ب چاڤان بێنە هنگافتن و ئێك چاڤان ل وان بدەت، ژبەر هندێ وى ڤيا ژێك جوداببن و پێكڤە نەچن، و پشتى ژ وان خواستى پێكڤە نەدەنە دەرگەهەكى، گۆتە وان: ((وَمَا أُغْنِي عَنكُم مِّنَ اللَّهِ مِن شَيْءٍ)) و ئەز نەشێم ئەو تشتێ خودێ بۆ هەوە ڤياى و نڤێسى ژ هەوە بدەمە پاش، چونكى ((إِنِ الْحُكْمُ إِلَّا لِلَّهِ عَلَيْهِ تَوَكَّلْتُ وَعَلَيْهِ فَلْيَتَوَكَّلِ الْمُتَوَكِّلُونَ)) حوكم و فەرمان بەس يێت خودێنە، و من پشتا خۆ ب وى گرێدا و يێ دڤێت پشتا خۆ قايم بكەت، بلا پشتا خۆ ب خودێ گرێدەت، دەستپێكێ يەعقوب پێغەمبەرى (سلاڤێت خودێ لێ بن) بەرێ وان دا هندێ ئەو ئەگەر و ئەسبابان ب جه بينن، و هۆسا خۆ نيشا خەلكى نەدەن چاڤ ل وان بێنەدان، و پاشى بۆ وان دياركر ژى تشتێ خودێ نڤێسى دآ هەر ئێت، ژبەر هندێ دڤێت مرۆڤ د هەمى تشتاندا پشتا خۆ ب خودێ گرێدەت، و تەوەكولا خۆ بدەتە سەر خودێ نەخاسمە پشتى ئەسباب و ئەگەر ب جه ئيناين، و خودێ چێتر دزانيت.
