ب / نەئاخفتنا زەكەريا پێغەمبەرى (سلاڤێت خودێ لێ بن) نەيا ب وى بوو، و خودێ مەزن وەلێكر، و ئەڤ ئاخفتن برِينە، كرە نيشان بۆ وى، خودێ دوعايا وى قەبويل كر، و ژنا وى ب كەرەم ئێخست و دويف داخوازا وى، گۆت: يا خودێ، نيشانەكێ بدە من ئەز پێ بزانم كابانيا من يا گرانەيە، خودێ گۆت: نيشانا تە ئەڤەيە تو نەشێى سێ شەڤ و رۆژان ـ و تو يێ دورست ـ دگەل خەلكى باخڤى. و د ئايەتەكا ديدا خودێ گۆت: نيشانا تە ئەوە سێ رۆژان تو نەشێى دگەل خەلكى باخڤى، ب ئيشارەتان نەبيت، بۆچى وى ئەڤ داخوازە كر! چونكى ئەو يێ دانعەمر بوو، و ژنا وى ژى يا پير بوو، و ئەڤە هەمى ل سەر خۆ ئاشكراكر كو يێ مەزن بووى و سەرێ وى يێ سپى بووى و ژنا وى ژى عەيال نابن، ڤێجا نيشانەك دڤيا خودێ دوعايا وى يا قەبويل كرى، گۆت: ((إِذْ نَادَىٰ رَبَّهُ نِدَاءً خَفِيًّا))(( قَالَ رَبِّ إِنِّي وَهَنَ الْعَظْمُ مِنِّي وَاشْتَعَلَ الرَّأْسُ شَيْبًا وَلَمْ أَكُن بِدُعَائِكَ رَبِّ شَقِيًّا))(( وَإِنِّي خِفْتُ الْمَوَالِيَ مِن وَرَائِي وَكَانَتِ امْرَأَتِي عَاقِرًا فَهَبْ لِي مِن لَّدُنكَ وَلِيًّا))(( يَرِثُنِي وَيَرِثُ مِنْ آلِ يَعْقُوبَ وَاجْعَلْهُ رَبِّ رَضِيًّا)) وەختێ ب دەنگەكێ نزم گازى خودايێ خۆ كرى. گۆت: يا خودێ ب راستى هەستيێ من ژ پيراتى يێ سست و خاڤ بووى، و سەرێ من يێ سپى بووى، يا خودێ ئەز چوجا ژ دوعاكرنا تە بێ هيڤى نەبوويمە، و چوجا هيڤيان ژ تە نابرِم. يا خودێ ب راستى ئەز ژ مرۆڤێت خۆ يێت خوينێ پسمام و كەس و كارێت خۆ دترسم، كو پشتى من ب دورستى ب كارێ ڤى دينى نەرابن، و ئەمانەتى نەپارێزن و ب دنيايێڤە مژويل ببن، و ڤى دينى بەرزە بكەن و تو دزانى كابانيا من ژى بچويك نابن، ڤێجا تو ژ دەف خۆ ژ كەرەما خۆ كورِەكى بدە من. دا ببيتە وێرسێ من و وێرسێ بنەمالا يەعقووبى ـ وێرسيا زانين و پێغەمبەراتيێ نەيا مالى ـ و بكە ژ وان يا خودێ ئەوێت تو ژێ رازى. ئينا خودێ هۆسا بەرسڤا وى دا: ((يَا زَكَرِيَّا إِنَّا نُبَشِّرُكَ بِغُلَامٍ اسْمُهُ يَحْيَىٰ لَمْ نَجْعَل لَّهُ مِن قَبْلُ سَمِيًّا ))هەى زەكەريا ب راستى ئەم مزگينيا كورِەكى ددەينە تە، ناڤێ وى يەحيايە، مە بەرى نوكە كەس ب ڤى ناڤى ب ناڤ نەكريە. ئينا زەكەريا حێبەتى بوو و گۆت: ((قَالَ رَبِّ أَنَّىٰ يَكُونُ لِي غُلَامٌ)) چاوا دێ من كورەك هەبيت؟! ئەڤ چەندە غەريب ديت ژبەر دوو ئەگەران، ئێك: ئەو خۆ دنياسيت زێدە يێ پير بووى، دوو: ژنا وى عەيال نابن، لەوا گۆت: ((قَالَ رَبِّ أَنَّىٰ يَكُونُ لِي غُلَامٌ وَكَانَتِ امْرَأَتِي عَاقِرًا وَقَدْ بَلَغْتُ مِنَ الْكِبَرِ عِتِيًّا)) زەكەرياى گۆت: يا خودێ چاوا دێ من كورِەك هەبيت؟ و ژنا من بچويك نابن، و ئەز ب خۆ ژى هندێ پير بوويم، ئەزێ كەفتيم. ئينا خودێ بەرسڤا وى دا: ((قَالَ كَذَٰلِكَ قَالَ رَبُّكَ هُوَ عَلَيَّ هَيِّنٌ وَقَدْ خَلَقْتُكَ مِن قَبْلُ وَلَمْ تَكُ شَيْئًا)) خودێ گۆت: هۆسا خودايێ تە حەزكريە، و گۆت: ئەڤە ل بەر من يا ب ساناهيە، و بەرى وى من، تو ب خۆ ژى يێ چێكرى و تو چو نەبووى. پشتى خودێ بۆ دياركرى ئەڤە ل دەف خودێ گەلەكا ب ساناهيە ئينا حەزكر خودێ نيشانەكێ بدەتێ، ب وێ نيشانێ بزانيت ژنا وى يا ب حالە و خودێ كەرەما دگەل كرى، و خودێ ئەو نيشان دايێ ئاخفتن ژێ برِى، بەلێ بۆچى خودێ ئەو نيشان دايێ؟ دا بۆ ئاشكراكەت ئەو خودێ بشێت مرۆڤێ دورست و ب ئەزمان ژ ئاخفتنێ بكەت و ئاخفتنێ ژێ ببرِيت و نە ژ نەساخيێ يان ژ ئێشەكێ دشێت ژ زەلامێ پيرەمێر و ژ ژنا عەيال نەبن بچويكى چێكەت، و ئەڤە ل دەف خودێ يا ب ساناهيە. ئبن عەباس (خودێ ژێ رازی بیت) دبێژيت: ئەزمانێ وى هاتەگرتن و نەشيا باخڤيت و ئەو ب خۆ يێ دورست و بێ ئێش، و خودێ چێتر دزانيت.
