ب / چو شك و گۆمان تێدا نينە خودێ مەزن دبێژيت:(( إِنَّا أَنزَلْنَاهُ فِي لَيْلَةِ الْقَدْرِ))مە قورئان د شەڤەكا ب رێز و رويمەتدا ئينا خوارێ. و دبێژيت((إِنَّا أَنزَلْنَاهُ فِي لَيْلَةٍ مُّبَارَكَةٍ إ))ب راستى مە ئەڤ كتێبە ـ قورئان ـ د شەڤەكا پيرۆزدا كو (ليلە القدر)ـە، شەڤا ب رێزورويمەت ئينا خوارێ، دا خەلكى پێ هشياركەين و بترسينين.و دبێژيت: ((شَهْرُ رَمَضَانَ الَّذِي أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَىٰ وَالْفُرْقَانِ ))هەيڤا رەمەزانێ، ئەو هەيڤا قورئان تێدا هاتيە خوارێ، راستەرِێييە بۆ خەلكى، و نيشانێت راستەرِێيى و ڤاڤارتنێنە ژێك جوداكرنا هەقيێ و نەهەقيێ، مە باوەريا هەي قورئانا پيرۆز د شەڤا لەيلەتولقەدردا يا هاتيە خوارێ و ئەو لەيلەتولقەدر يا د هەيڤا رەمزانا پيرۆزدا، بەلێ ئەڤ هاتنە خوارە كا چاوايە.. زانايێت مە ل سەر ڤێ هاتنە خوارێ سێ بۆچۆنن، بۆچۆنا ئێكێ يا ئبن عەباسيە (خودێ ژێ رازی بیت) كور مامێ پێغەمبەرێ خۆشتڤى (سلاڤێت خودێ لێ بن) و جمهورێ زانايان دبێژن: قورئان هەمى پێكڤە يا هاتيە عەسمانێ دنيايێ و ژ عەسمانێ دنيايێ كێم كێمە و پيچ پيچە بۆ پێغەمبەرى (سلاڤێت خودێ لێ بن) يا هاتي، و هاتنەخوارا قورئانێ (23) سالان يا كێشاى و ل دويف هەوجەيێ و رويدانان يا هاتيە خوارێ، و قورئان د شەڤا لەيلەتولقەدردا پێكڤە هاتيە خوارێ، بەلێ يا ئاشكرايە هەمى پێكڤە بۆ پێغەمبەرى (سلاڤێت خودێ لێ بن) نەهاتيە خوارێ، هندە جاران ب شەڤ يا هاتيە خوارێ و هندە جاران ب رۆژ و هۆسا، خودێ مەزن دبێژيت:(( وَقُرْآنًا فَرَقْنَاهُ لِتَقْرَأَهُ عَلَى النَّاسِ عَلَىٰ مُكْثٍ وَنَزَّلْنَاهُ تَنزِيلًا)) و مە قورئان جودا جودا بۆ تە ئينا خوار دا تو هێدى هێدى بۆ خەلكى بخوينى، و مە پيچ پيچە ل دويف بەرژەوەنديان ئينا خوارێ. و ل دويف ڤێ بۆچۆنێ قورئانێ دوو هاتنەخوار يێت هەين، هاتنەخوارا ئێكێ ژ لەوحێ مەحفوز بۆ عەسمانێ دنيايێ و ئەڤە د شەڤا لەيلەتولقەدردا و د هەيڤا رەمەزانێدا يا چێ بووي، و هاتنە خوارا دووێ ژ عەسمانێ دنيايێ بۆ پێغەمبەرێ خۆشتڤى (سلاڤێت خودێ لێ بن) دويف هەوجەيى و رويدانان، و بۆچۆنا دووێ: قورئان هەمى د شەڤا لەيلەتولقەدردا نەهاتيە خوارێ، بەلێ د وێ شەڤێدا يا دەستپێكرى، ئانكو: دەستپێكا هاتنەخوارا قورئانێ ژ شەڤا لەيلەتولقەدر يا دەستپێكرى و پاشى بەردەوامى يا دايە خۆ د شەڤ و رۆژێت ديدا، چونكى خودێ مەزن دبێژيت:(( وَقَالَ الَّذِينَ كَفَرُوا لَوْلَا نُزِّلَ عَلَيْهِ الْقُرْآنُ جُمْلَةً وَاحِدَةً كَذَٰلِكَ لِنُثَبِّتَ بِهِ فُؤَادَكَ وَرَتَّلْنَاهُ تَرْتِيلًا)) ئانكو: و ئەوێت گاور بووين گۆتن: بلا قورئان ب جارەكێ و پێكڤە بۆ هاتبايە خوارێ وەكى هەمى كتێبێت دى يێت عەسمانى. پيچ پيچە و جودا جودا ئەم قورئانێ بۆ تە دئينينە خوارێ، دا دلێ تە پێ موكوم بكەين و ب هێز بێخين و تو دلێت موسلمانان پێ ب هێز بێخى، دا ب ساناهى ژبەر بكەن و تێ بگەهن، و دا بەردەوام بەرسڤا گاوران بدەى، ل سەر وان تشتێت وان دڤێن تە تێدا ئاسێ بكەن، و مە قورئان ئايەت ئايەت ئانكو: پيچ پيچە ب تە ب رێكا جبريلى دا خواندنێ. و جوداهيا د ناڤبەرا ڤێ بۆچۆنێ و يا بەرێدا يا كێمە هەردوو ئێكن كو پيچ پيچە بۆ پێغەمبەرى (سلاڤێت خودێ لێ بن) يا هاتيە خوارێ و بيست و سێ سالان ڤەكێشا، و بۆچۆنا سيێ: قورئان بيست و سێ سالان يا هاتيە خوارێ، و هەر سال شەڤا لەيلەتولقەدرێ بۆ سالێ هەميێ ژ لەوحێ مەحفوز دهێتە عەسمانێ دنيايێ و پاشى پيچ پيچە وێ سالێ هەميێ دويف رويدانان دهاتە خوارێ هەتا جارەكا دى دگەهشتە شەڤا لەيلەتولقەدرێ جارەكا دى بۆ سالەكێ داهێتە خوارێ و هۆسا، چونكى شەڤا لەيلەتولقەدرێ ئەو شەڤە يا تەقديرا هەمى تشتان تێدا دهێتەكرن، ژ وان: هاتنەخوارا قورئانێ و دويف بەلگە و دەليلان بۆچۆنا ئێكێ دورستر و ب هێزترە، و خودێ چێتر دزانيت.
