ب / چەند بۆچۆن يێت هەين ل سەر زانينا سۆرەتێت مەكى و مەدەنى بەلێ يا ژ هەميان بەلاڤ و ئاشكراتر ئەوە: هەر سۆرەتەكا بەرى مشەختبوونێ هاتيە خوارێ مەكيە.. ڤێجا ل كيرێ هاتبيتە خوارێ بلا هاتبيت، و هەر سۆرەتا پشتى مشەختبوونا پێغەمبەرێ خۆشتڤى (سلاڤێت خودێ لێ بن) هاتبيتە خوارێ مەدەنيە چ ل مەدينێ هاتبيتە خوارێ چ ل هەرجهەكێ هەبيت، و ئەڤە پێناسا باوەرپێكرى و پالپشتكريە ل دەف زانايان، و سۆرەتا هەى هەمى پێكڤە مەكيە و چو ئايەتێت مەدينێ تێدا نينن وەكى سۆرەتا موددەسير، و سۆرەتا هەى هەمى مەدەنيە و چو ئايەتێت مەكەهێ تێدا نينن وەكى سۆرەتا ئاليعومران، و سۆرەتا هەي مەكيە و ئايەتێت مەدەنى يێت تێدا هاتين وەكى سۆرەتا ئەعراف ئايەتا: ((وَاسْأَلْهُمْ عَنِ الْقَرْيَةِ الَّتِي كَانَتْ حَاضِرَةَ الْبَحْرِ إِذْ يَعْدُونَ فِي السَّبْتِ إِذْ تَأْتِيهِمْ حِيتَانُهُمْ يَوْمَ سَبْتِهِمْ شُرَّعًا وَيَوْمَ لَا يَسْبِتُونَ لَا تَأْتِيهِمْ كَذَٰلِكَ نَبْلُوهُم بِمَا كَانُوا يَفْسُقُونَ)) مەدەنيە، و سۆرەتا هەي مەدەنيە بەلێ ئايەتێت مەكى يێت تێدا هاتين وەكى سۆرەتا حەج هەمى مەدەنيە چار ئايەت ژێ نەبن ژ گۆتنا خودێ ((وَمَا أَرْسَلْنَا مِن قَبْلِكَ مِن رَّسُولٍ وَلَا نَبِيٍّ إِلَّا إِذَا تَمَنَّىٰ ......)) و ل دويف دەستپێكا سۆرەتێ، ناڤێ مەكى يان مەدەنى دهێتە سەر، هەكە دەستپێكا سۆرەتێ بەرى مشخەتبوونێ هاتبيتە خوارێ، سۆرەت سۆرەتا مەكيە، و هەكە دەستپێكا وێ پشتى مشخەتبوونێ هاتبيتە خوارێ سۆرەت سۆرەتا مەدەنيە، هەرچەندە هندەك زانا دبێژن: ناڤێ مەكى و مەدەنى دويف پتريێيە هەكە پتريا سۆرەتێ مەكى بيت مەكيە و هەكە پتريا سۆرەتێ مەدەنى بيت مەدەنيە، بێى بەرێخۆدانا دەستپێكا وێ و كا چەند سۆرەت مەكينە و چەند مەدەنينە، جهێ جودابوونێيە د ناڤبەرا زاناياندا، زانايێ ناڤدار سيوتى (خودێ ژێ رازی بیت) دبێژيت: زانا ئێكن بێى جوداهي، بيست سۆرەت مەدەنينە ئەو ژى ئەڤەنە ( بەقەرە و ئاليعومران و نيساْ و مائيدە و ئەنفال و تەوبە و نوور و ئەحزاب و موحەممەد و فەتح و حوجورات و حەديد و موجاديلە و حەشر و مومتەحينە و جومعە و مونافيقون و تەلاق و تەحريم و نەصر ) و دوازدە جهێ ئختيلافێنە ئەو ژى ئەڤەنە: ( فاتيحە و رەعد و رەحمان و صەف و تەغابون و تەتفيف و قەدر و بەيينە و زەلزەلە و ئيخلاص و فەلەق و ناس ) و ژبلي ڤان كو هەشتێ و دوونە مەكينە، و خودێ چێتر دزانيت.
