ب / زانايێت مە يێت بووينە سێ پشك د حوكمێ قورئان خواندنێدا ل سەر گۆران، هەروەكى خودانێ شەرحا تەحاوى د كتێبا خۆدا ئيناى، ديسا هەروەكى ئيمام ئبن تەيميە د كتێبا خۆ (اقتضاء الصراط المستقيم )دا دئينيت:
بۆچۆنا ئێكێ: خواندنا قورئانێ ل گۆرستانێ و ل سەر گۆران مەكروهە و نەباشە، و ئەڤە بۆچۆنا ئەبو حەنيفەيە و ئيمام مالك و ئيمام ئەحمەد دويف ڤەگێرەكێ، چونكى نە د حەديسێدا و نە د قورئانێدا نەهاتيە، كو دورستە قورئان ل سەر گۆران بێتە خواندن، و چونكى قورئان وەكى نڤێژێيە و نەهيا هاتيەكرن نڤێژ ل سەر گۆران بێتەكرن، هۆسا قورئان خواندن ژي قياس ل سەر نڤێژێ و پێغەمبەر (سلاڤێت خودێ لێ بن) د راستا مالاندا دبێژيت: ((مالێت خۆ نەكەنە گۆرستان، ب راستى شەيتان ژ وێ مالێ درەڤيت يا سۆرەتا بەقەرە تێڤە دهێتە خواندن)). ژ حەديسێ دهێتە زانين قورئان ل گۆرستانا ناهێتە خواندن، لەوا پێغەمبەرێ خۆشتڤى (سلاڤێت خودێ لێ بن) دبێژيت: ((مالێت خۆ نەكەنە گۆرستان)).
بۆچۆنا دووێ: چو تێدا نينە و دورستە، و ئەڤە بۆچۆنا موحەممەديە ژ حەنەفيان، و مەزهەبێ حەنەفيان ل سەر ڤێ بۆچۆنێيە، و ديسا بۆچۆنا ئيمام ئەحمەديە د ڤەگێرەكێدا، بەلگە ژى ژ عەبدولايێ كورێ عومەرى (خودێ ژێ رازی بیت) هاتيە ڤەگوهاستن وەسيەت كريە دەستپێكا سۆرەتا بەقەرە و دويماهيا وێ ل سەر گۆرِێ وى بێتە خواندن دەمێ دهێتە گۆرِكرن، و ديسا هندە مشەختان ژي وەسيەت كريە سۆرەتا بەقەرە ل سەر گۆرِێ وان بێتە خواندن.
بۆچۆنا سيێ: چو نينە، بەس دەمێ مرى دهێتە گۆرِكرن.. نە پشتى هنگى، و ئەڤە بۆچۆنا سيێيە يا ئيمام ئەحمەدى.
و ئيمام ئبن تەيميە بۆچۆنا سيێ ب هێزتر ددانيت دورستە قورئان ل سەر گۆرِى بێتە خواندن دەمێ مرى دهێتە گۆرِكرن ژبەر وێ وەسيەتا ژ ئبن عومەرى (خودێ ژێ رازی بیت) و هندە مشەختيان هاتيە ڤەگوهاستن كو قورئان ل سەر وان بێتە خواندن دەمێ دهێنە گۆرِكرن، و خودێ چێتر دزانيت.
