ب / ئەڤە ئايەتا چلێيە ژ سۆرەتا فورقان، و گوندێ تێدا هاتي گوندێ سەدوومە ملەتێ لووت پێغەمبەرى (سلاڤێت خودێ لێ بن)، و خودێ مەزن د ڤێ ئايەتێدا بەحسێ قورەيشيان دكەت، دبێژيت: ب سويند قورەيشى يێت هاتينە وى گوندى و يێت تێرِا چۆين، ئەوێ مە بارانا بەران ب سەردا باراندى گوندێ سەدووم كو ژ مەزنترين گوندێت لووتيە، ئەرێ ما وان بەرێ خۆ نەددايێ كا چ ب سەرێ وان هاتيە؟ بەلێ وان باوەرى ب رابوونا پشتى مرنێ نەبوو؛ لەو بۆ خۆ چو چامە و عيبرەتان ژێ ناگرن. هەروەكى دبێژتە وان: باشە ما چو نيشانێت بەرچاڤ و ئاشكرا ناكەڤنە پێشيا هەوە گەلى قورەيشيان هوين بۆ خۆ پێڤە بچن و پاشڤە بزڤرن و هزرا خۆ تێدا بكەن و باوەريێ ب پێغەمبەرى بينن، ما هوين گوندێ سەدووم نابينن و هوين نوزانن كا چ ب سەرێ وان هات، ئەرێ ئەگەرێ وى ئيزاي يێ ب سەرێ وان هاتى چ بوو؟! نەگوهداريا وان و نەباوەرئينانا وان ب پێغەمبەرێ خۆ، ئەڤە هاتە سەرێ وان و خودێ بەربارانا بەرێت سۆتى ب سەردا ئينان و برنە هيلاكێ، باشە ما وان ئەو گوند د چۆن و هاتنێت خۆدا نەديت كاڤل و شوينوارێت وان نەديتن بۆ خۆ چاما و دەرس و عيبرەتان وەرگرن، ڤێجا بزانن هەكە ئەو دژ و ركۆيا وان دگەل پێغەمبەرێ خۆ كرين هوين ژى وێ بكەن دێ ئەو ب سەرێ هەوە هێت يا ب سەرێ وان هاتى، ڤێجا هشياربن، و خودێ مەزن د دويماهيا سەررەقيا وان و نەباوەريئينانا واندا دبێژيت((وَأَمْطَرْنَا عَلَيْهِم مَّطَرًا فَانظُرْ كَيْفَ كَانَ عَاقِبَةُ الْمُجْرِمِينَ)) و دوسۆرەتا شوعەرائدا دبێژيت: ((وَأَمْطَرْنَا عَلَيْهِم مَّطَرًا فَسَاءَ مَطَرُ الْمُنذَرِينَ)) و مە بارانەك ب سەر واندا دارِێت بارانەكا ئەنتيكە، بەرێت سۆتى ب سەر واندا باراندن، ڤێجا بەرێ خۆ بدێ كا دويماهيا گونەهكاران بوو چ و پيسە باران بوو، بارانا وى ملەتێ ژ بەرێ پێغەمبەرێ خۆڤە، هاتيە ترساندن و هشياركرن بەلێ دگەل هندێ ژى، ل خۆ نەزڤرِين، و خودێ چێتر دزانيت.
