مالپەرێ کورد ئیسلام

پ / ڤێ ئايەتێ بۆ مە شلۆڤەكەن((وَاتَّبَعُوا مَا تَتْلُو الشَّيَاطِينُ عَلَىٰ مُلْكِ سُلَيْمَانَ وَمَا كَفَرَ سُلَيْمَانُ وَلَٰكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ وَمَا يُعَلِّمَانِ مِنْ أَحَدٍ حَتَّىٰ يَقُولَا إِنَّمَا نَحْنُ فِتْنَةٌ فَلَا تَكْفُرْ فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ وَمَا هُم بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ وَيَتَعَلَّمُونَ مَا يَضُرُّهُمْ وَلَا يَنفَعُهُمْ وَلَقَدْ عَلِمُوا لَمَنِ اشْتَرَاهُ مَا لَهُ فِي الْآخِرَةِ مِنْ خَلَاقٍ وَلَبِئْسَ مَا شَرَوْا بِهِ أَنفُسَهُمْ لَوْ كَانُوا يَعْلَمُونَ)) و بۆ مە دياركەن ئەرێ ئەوێت سحرێ و سێربەنديێ نيشا خەلكى ددەن ملياكەتن، باشە ملياكەت ما نە ئەون يێت بێ ئەمريا خودێ ناكەن؟.

ب / تەفسيرزانێ مەزن يێ تابعى ئيمام سەدى (خودێ ژێ رازی بیت)، د راڤەكرنا ڤێ ئايەتێدا دبێژيت: ل سەر دەمێ سولەيمان پێغەمبەر (سلاڤێت خودێ لێ بن) ئەجنە هەبوون ژ نفشێ شەيتانان، گەلەك بلند دبوون و ئاخفتن دئينان و ئەڤ ئاخفتنە بۆ خێفزانك و هەڤالێت خۆ دگۆتن، و پشتى ئەڤ چەندە د ناف ئسرائيلياندا مشەبووى ئەو ئاخفتن كۆمكرن و كرنە كتێب، سولەيمان پێغەمبەر (سلاڤێت خودێ لێ بن) ئەو كتێب ئەوا ئەو ئاخفتن تێدا ل جهەكێ بەرزە ڤەشارت و بن ئاخكر، و پشتى (سلاڤێت خودێ لێ بن) مرى شەيتانەكى خۆ ئينا سەر خولكێ مرۆڤەكى و گۆتە وان: ئەز تشتەكى نيشا هەوە نەدەم خێر و خێرات تێدا، ئەو جهێ ئەو كتێب د بنڤە ڤەشارتى نيشا وان دا و ئەو كتێب دەرێخست و بەلاڤكر، و گۆتن: ئەڤە كتێبا سحرزانيێيە و يا سولەيمان پێغەمبەريە، و هۆسا د ناڤ ئسرائيلياندا بەلاڤ بوو، ئينا خودێ مەزن گۆتە پێغەمبەرێ مە (سلاڤێت خودێ لێ بن) ((وَاتَّبَعُوا مَا تَتْلُو الشَّيَاطِينُ عَلَىٰ مُلْكِ سُلَيْمَانَ وَمَا كَفَرَ سُلَيْمَانُ وَلَٰكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ )) و ژ ئايەتێ دهێتە زانين فێربوون و فێركرنا سحرێ و سێربەنديێ گاوريە، و سولەيمان پێغەمبەر (سلاڤێت خودێ لێ بن) گاور نەبوويە و كەس فێرى سێربەنديێ نەكريە، بەلێ شەيتان يێت گاور بووين و خەلكى فێرى سێربەنديێ دكەن، و كا چاوا سولەيمان پێغەمبەر گاور نەبوويە، هۆسا چو سێربەندى ل سەر چو ملياكەتان نەهاتيە خوارێ: ((وَمَا أُنزِلَ عَلَى الْمَلَكَيْنِ بِبَابِلَ)) و (ما) ل ڤێرێ (نافيە)يە، ئانكو: چو سێربەندى ل سەر چو ملياكەتان نەهاتيە خوارێ وەكى جوهى دبێژن وان دگۆت: جبريل و ميكائيل ملياكەتن و زانينا سێربەنديێ يا بۆ وان هاتيە خوارێ و وان نيشا خەلكى ددا، خودێ دياركر كا چاوا سولەيمان پێغەمبەر (سلاڤێت خودێ لێ بن) يێ ژ سێربەنديێ بەريە و كەس فێرى سێربەنديێ نەكريە، و خەلك يێ ب دويف شەيتانان كەفتين، هۆسا ملياكەت ژى جبريل و ميكائيل د بەرينە و چو سێربەندى بۆ وان نەهاتيە خوارێ، و هاروت و ماروت ئەوێت سێربەنديێ نيشا خەلكى ددەن مرۆڤێت ئاسايينە، و هندە تەفسيرزانێت دى دبێژن: هۆسا خوانديە (مەليكەين) نە (مەلەكين) ئانكو: دوو ميرن نە دوو ملياكەت، و دويف ڤێ خواندنێ ژى هاروت و ماروت مەلك و ميرن نە ملياكەتن و چو سێربەندى ل سەر چو ملياكەتان نەهاتيە خوارێ و هاروت و ماروت ـ چ مير و مەلك بن، چ مرۆڤێت ئاسايى بن ـ ئەو سێربەنديێ نيشا خەلكى ددەن نەملياكەت، و كورتيا راڤەكرنا ئايەتێ ئەڤا خوارێيە: ئسرائيلى ب دويف خواندنا شەيتانى كەفتن ئەوا ل سەر وەختێ سلێمان پێغەمبەرى (سلاڤێت خودێ لێ بن) ل سەر خەلكى دهاتە خواندن، سلێمان (سلاڤێت خودێ لێ بن) ب خۆ گاور نەببوو، و كەس فێرى سێربەنديێ نەكربوو، بەلێ شەيتان گاور ببوون، و خەلك فێرى سێربەنديێ دكرن، و خودێ سێربەندى ب سەر دوو ملياكەتاندا نەئينايە خوار، بەلێ شەيتانان خەلك فێرى سێربەنديێ دكرن، ژ وان هارووت و مارووت كو ژ مرۆڤان دئێنە هەژمارتن، و ڤان هەردوويان هارووت و مارووت ل بابل سێربەندى نيشا خەلكى ددان، و كەس فێر نەدكر هەتا نەگۆتبانێ هندى ئەمين ئەم ئەزموون و جەرِبەينە، هشياربە گاور نەبە، و وێ ژ وان فێر دبن يا پێ ژن و مێران ژێك دكەن، و نەشێن زيانێ بگەهيننە كەسەكێ ئەگەر دەستوورا خودێ پێ نەهاتبيت خودێ تەقدير نەكربيت خۆ فێرى وێ دكەن يا زيانێ دگەهينيتە وان، نە مفايى و فايدەى. و راستى ئەوێ سێربەندى ب كتێبێت خودێ كرى زانى وى ل ئاخرەتێ چو بار و پشك نينن، چ پيسە تشتە يێ وان خۆ پێ فرۆتى، ئەگەر بزانن، و خودێ چێتر دزانيت.

بەرسڤێت ل دۆر قورئانا پيرۆز