ب / زانا د رابوونا پێش قورئانێڤە د ژێك جودانە ل سەر سێ بۆچۆنان، ئێك: پێشڤە رابوون نەيا دورستە، چونكى سەحابێت پێغەمبەرى دهاتن و دچۆن و پەرێت قورئانێ د دەستێت واندا بوون و نەهاتيە ڤەگوهاستن هەكە ئێك ژ وان چۆبا د جڤاتەكێدا يێت روينشتى پێشڤە رادبوون و ئەو ژ مە هەميان پتر رێز و حورمەت و بهايێ قورئانێ دزانن، و قورئان د دلێت واندا بوو، و ئەڤە بۆچۆنا عززەدين بن عەبدولسەلامە (خودێ ژێ رازی بیت)، دوو: پێشڤە رابوون چو تێدا نينە و نەرابوون ژى چو تێدا نينە و هەردوو ژى دورستن، و هەر ئێكێ ژى خودێ دێ ل دويف ئنيەتا وى دەتێ، چونكى پێغەمبەر (سلاڤێت خودێ لێ بن) دبێژيت: (إنَّما الأَعمالُ بالنِّيات، وإِنَّمَا لِكُلِّ امرئٍ مَا نَوَى) ب راستى هەمى كار و كريار ب ئنيەتانە، و ب راستى بۆ هەر مرۆڤەكى كا چ ئنيەت ئينايە دێ ئەو بيت، سێ: نەبەس دورستە بەلكى موستەحەبە و باشە، چونكى هەمى ئێكن، هەكە مرۆڤەكێ رويسپى و ماقويل يان زانا هاتە جڤاتێ ياباشە و موستەحەبە پێشڤە رابن، پا چاوە قورئان نەباشە مرۆڤ پێشڤە رابيت ما چ ژ قورئانێ بهاتر هەيە، و ل دەف من بۆچۆنا دووێ چێترە و ئەز وێ چێتر ددانم. و ل سەر ماچيكرنا قورئانێ ديسا زانا سێ ئاخفتن يێت هەين، ئێك: ماچيكرنا قورئانێ يا مەكروه و نەباشە، چونكى ژ پێغەمبەرى (سلاڤێت خودێ لێ بن) نەهاتيە زانين ماچيكرنا بەرێ رەش پێڤەتر و ژبلى بەرێ رەش ئەم چو تشتێت دى ماچى ناكەين و هەكە بەرى ژى، ژ پێغەمبەرى (سلاڤێت خودێ لێ بن) نەهاتبا زانين مە ئەو ژى نەدكر، و ئەڤە گۆتنا مالكيانە، دوو: ماچيكرنا قورئانێ دورستە و چو تێدا نينە و ئەڤە گۆتنا گەلەك ژ حەنەفيان و حەنبەليانە، چونكى ب رێكێت دورست يێ ژ ئبن عومەرى هاتيە ڤەگێران و وى پتر هەميان دويفچۆنا رێكا پێغەمبەرێ خۆشتڤى دكر (سلاڤێت خودێ لێ بن) هەرگاڤا قورئان خواندبا دا دانيتە سەر چاڤێت خۆ و دا ماچيكەت و بێژيت: ئەڤە كتێبا خودێ منە، گۆتنا سيێ: ماچيكرنا قورئانێ نەبەس دورستە بەلكى موستەحەبە و باشە، قياس ل سەر بەرێ رەش، هەكە سونەت بيت بەرێ رەش بەربيت و بێتە ماچيكرن پا چاوا قورئان ناهێتە ماچيكرن، و ئەز گۆتنا دووێ چێتر ددانم، و ئيمام ئەحمەد سێ گۆتن يێت هەين، ئێك: موستەحەبە مرۆڤ قورئانێ دانيتە سەر چاڤێت خۆ و پێڤە ماچيكەت، دوو:هەكە ماچيكەى دورستە و چو تێدا نينە و هەكە نەماچيكەى ژى چو تێدا نينە، سێ: پسيار ژێ هاتەكرن دورستە هەكە ئێك قورئانێ دانيتە سەر چاڤێت خۆ و ماچيكەت دەينەكر، نەگۆت ئە و نە گۆت نە، و خودێ چێتر دزانيت
