ب / هەلبەت ئەڤە ئايەتا سيێيە ژ سۆرەتا جن و تماميا وێ ژى ئەڤەيە: ((وَأَنَّهُ تَعَالَىٰ جَدُّ رَبِّنَا مَا اتَّخَذَ صَاحِبَةً وَلَا وَلَدًا )) و رامان و راڤەكرنا ئايەتێ ژى ئەڤەيە: پشتى جناوەران گوه ل قورئانێ بووى، و هزرا خۆ د ئاخفتن و سەردابرنا شەيتانيدا كرين، كا وى چ د راستا خودێ مەزندا دگۆت، و چاوا ئەو سەردابربوون، بۆ وان دياربوو كا چەندێ خەلەت و ساويلكەيە، ئينا گۆتن: ((قُلْ أُوحِيَ إِلَيَّ أَنَّهُ اسْتَمَعَ نَفَرٌ مِّنَ الْجِنِّ فَقَالُوا إِنَّا سَمِعْنَا قُرْآنًا عَجَبً))(( يَهْدِي إِلَى الرُّشْدِ فَآمَنَّا بِهِ وَلَن نُّشْرِكَ بِرَبِّنَا أَحَدًا ))(( وَأَنَّهُ تَعَالَىٰ جَدُّ رَبِّنَا مَا اتَّخَذَ صَاحِبَةً وَلَا وَلَدًا )) بێژە ملەتێ خۆ خودێ تەعالا وەحى بۆ من هنارت كو كۆمەكا ئەجنەيان گوهداريا قورئانێ كرن و باوەرى پێ ئينان و موسلمان بوون، و پشتى زڤرِينە ناف ملەتێ خۆ گۆتنە وان: مە گول قورئانەكا نەديتى، ئانكو: وەكى ڤێ نەهاتيە گولێ بوون و نەهاتيە ديتن و كارلێكەر بوو. بەرێ مرۆڤى ددەتە راستي و رۆناهيێ، مە باوەرى پێ ئينا كو كتێبا خودێيە، و ئەم ژ ئەڤرۆ پێڤە چو هەڤپشكان بۆ خودێ چێ ناكەين. بێ گۆمان خودا يێ پاك و بلند و مەزنە، و چو ژن و زارِۆك بۆ خۆ نەگرتينە. بێ فامێ مە (كو شەيتانە) تشتێ نەلائيق و نەهەژى و دويرى راستيێ د دەرهەقێ خودێدا دگۆت. و مە هزر دكر ئەجنە و مرۆڤ چو درەوان د راستا خودێدا ناكەن. ڤێجا رامانا ( جد ربنا ) ئانكو: پاك و بلندى و مەزناتي و زەنگينى و بێمنەتيا خودێ، ڤێجا چاوا دێ هەوجەى ژن و زارۆكان بيت، و خودێ چێتر دزانيت.
