ب / بێ گۆمان يێ بزانيت كا قەدر و بهايێ قورئانێ چەندە، و كا خێرا خواندنا وێ چەندە ـ زانينەكا كارا و راست و دورست ـ ئەو چو جار سستيێ د راستا قورئانێدا ناكەت و پشتا خۆ نادەتە قورئانێ و ژێ دويرناكەڤيت، چونكى ئەو راستەرێكەرە د دنيايێدا، و رۆژا قيامەتێ بەرەڤان و مەهدەرە بۆ خودانێ خۆ، و بێ گۆمان و ب راستى ئەڤ قورئانە بەرێ مرۆڤى ددەتە وێ رێكێ يا ژ هەميان راستتر، و مزگينيێ ددەتە خودان باوەران، ئەوێت كار و كريارێت راست و دورست دكەن كو وان خەلاتەكێ مەزن يێ هەى، هەروەكى خودێ مەزن دبێژيت:(( إِنَّ هَٰذَا الْقُرْآنَ يَهْدِي لِلَّتِي هِيَ أَقْوَمُ وَيُبَشِّرُ الْمُؤْمِنِينَ الَّذِينَ يَعْمَلُونَ الصَّالِحَاتِ أَنَّ لَهُمْ أَجْرًا كَبِيرًا))و پێغەمبەرێ خۆشتڤى (سلاڤێت خودێ لێ بن) دبێژيت: هەروكى د سەحيحا موسلميدا هاتى: ( اقْرَؤا القُرْآنَ فإِنَّهُ يأْتي يوْم القيامە شَفِيعاً لأصْحابِه ) قورئانێ بخوينن، ب راستى ئەو رۆژا قيامەتێ دێ هێت بەرِەڤانيێ ژ خودانێ خۆ كەت. هەرديسا د سەحيحا موسلميدا هاتيە ( يُؤتى يوْمَ القِيامە بالْقُرْآنِ وَأَهْلِهِ الذين كانُوا يعْمَلُونَ بِهِ في الدُّنيا تَقدُمهُ سورە البقَرَە وَآل عِمرَانَ، تحَاجَّانِ عَنْ صاحِبِهِمَا ) رۆژا قيامەتێ قورئانێ و خودانێت وێ يێت د دنيايێدا كار پێ دكر دێ ئينن، سۆرەتا بەقەرە و ئاليعومران پێشيا وى دهێن، دان و ستاندنێ پێش خودانێ خۆڤە دكەن. و د حەديسەكا ديدا يا بوخارى ڤەگێراى دياردكەت باشترينێ مرۆڤان يێ دگەل قورئانێ بيت چ قورئانزان بيت يان فێركەرێ قورئانێ بيت، دبێژيت: ( خَيركُم مَنْ تَعَلَّمَ القُرْآنَ وَعلَّمهُ ) باشترينێ هەوە، ئەوە يێ فێرى قورئانێ بووى و قورئانێ فێر دكەت، و ل سەر خواندنا قورئانێ دبێژيت: هەروەكى ترمزى ژ ئبن مەسعودى (خودێ ژێ رازی بیت) ڤەگێراى: ( منْ قرأَ حرْفاً مِنْ كتاب اللَّهِ فلَهُ حسنَە، والحسنَە بِعشرِ أَمثالِهَا لا أَقول: الم حَرفٌ، وَلكِن: أَلِفٌ حرْفٌ، ولامٌ حرْفٌ، ومِيمٌ حرْفٌ ) يێ پيتەكا قورئانێ بخوينيت خێرەك بۆ ويە، و هەر خێرەك ب دەه خێرانە، و ئەز نابێژمە هەوە: (الم) پيتەكە، بەلێ: ئەليف پيتەكە و لام پيتەكە و ميم پيتەكە. و رۆژا قيامەتێ دێ ژ قورئانيان هێتە خواستن ئەو ل پلەيان سەركەڤن و قورئانێ بخوينن و نەراوەستن هەتا دويماهيك ئايەت دخوينن، دبێژيت: ديسا هەروەكى ترمزى ڤەگێراى ( يُقَالُ لِصاحبِ الْقُرَآنِ: اقْرأْ وَارْتَقِ وَرَتِّلْ كَما كُنْتَ تُرَتِّلُ في الدُّنْيا، فَإنَّ منْزِلَتَكَ عِنْد آخِرِ آيە تَقْرَؤهَا ) دێ بێژنە خودانێ قورئانێ (ئانكو يێ قورئان ژبەر) بخوينە و سەركەڤە، و بخوينە هەروەكى تە د دنيايێدا دخواند، ب راستى جهێ تو دويماهيك ئايەت لێ دخوينى ئەو جهێ تەيە. ڤێجا فەرە تو پتر دەمێ خۆ بدەيە قورئانێ و هەكە بشێى هەر چل رۆژان ختمەكێ بكەى ئەڤە زۆر باشە هەكە نەشياى سالێ كێم كێم دوو جاران ختم بكە، چونكى سالا پێغەمبەر (سلاڤێت خودێ لێ بن) تێدا چۆيە بەر دلۆڤانيا خودێ دوو جاران جبريلى سلاڤ لێ بن قورئان دگەل پێغەمبەرى (سلاڤێت خودێ لێ بن) ختم كر، و زانايێت حەنەفى ڤێ دكەنە بەلگە ل سەر هندێ كۆ ختما مرۆڤى چەندا كێم بيت نابيت ژ شەش هەيڤان ببۆريت و ژ دوويان كێمتر بن د سالێدا، دگەل هندێ ژى هەكە تو يێ بەردەوامى و هەرۆژ و تو چو رۆژان ناهێليە د ناڤدا باشە و يا باشتر پتر لێ بكەى و نەهێلى، و خودێ چێتر دزانيت.
