ب / زيلقەرنەين هەروەكى سۆرەتا كەهف بۆ مە بەحسێ وى كرى، شاهەك بوو ژ شاهێت عەردى، و يێ خودێنياس و باوەريدار و دادپەروەر و دەسهلاتدار بوو، و دەسهەلاتا وى ناڤبەرا رۆژهەلات و رۆژئاڤايێ دگرت، و هەرجهێ گەهشتبايێ، رۆژهەلاتبا يان رۆژئاڤا، داخوازا وان بۆ دينێ خودێ دكر، و خودێ بپەرێسن و چو شريك و هەڤالان بۆ چێنەكەن، و دەسهەلاتا خۆ و هێز و شيانێت خودێ داينێ بۆ چاكى و باشيێ و رێكا خودێ ب كاردئينا، و خۆ ل سەر خەلكى نەدسەپاند، خەلكێ بن دەستێ خۆ نەدكرە ديل و كۆلە و بەندە بن دەستێ خۆ، و خزمەتا بۆ خەلكى پێشكێش دكر بۆ رێكا خودێ دكر و چو بەرامبەر ژ وان نەدستاند خۆ هەكە وان بۆ بێشكربا ژى وى دگۆت:(( قَالَ مَا مَكَّنِّي فِيهِ رَبِّي خَيْرٌ فَأَعِينُونِي بِقُوَّةٍ أَجْعَلْ بَيْنَكُمْ وَبَيْنَهُمْ رَدْمًا))هەتا گەهشتيە د نيڤەكا دوو چياياندا، ل وێرێ ملەتەك ديت چو زمان نەدزانين، يێ وان ب خۆ نەبايە. وان گۆت: هەى زيلقەرنەين يەئجووج و مەئجووج خرابيێ د عەردێ مەدا دكەن، ئەگەر ئەم پشكەكێ ژ مالێ خۆ بۆ تە دانين، تو دێ ناڤبرِەكێ د ناڤبەرا مە و واندا چێكەى؟ زيلقەرنەينى گۆت: ئەو مال و ملك و شيانا خودايێ من دايە من، ژ وێ پشكا هوين ژ مالێ خۆ بۆ من دئێخن چێترە، ڤێجا ب هێزێ ب زەلامان و ئالاڤان هارى من بكەن، دا د ناڤبەرا هەوە و واندا ناڤبرِ و سكرەكێ موكوم چێكەم. و دڤێت ئەم وانە و دەرسا ژ هەميان پێدڤيتر ژ زيلقەرنەينى وەرگرين ئەم هەر ئێك د ئاستێ خۆدا خودێ چ شيان و دەسهەلات داينێ دڤێت وەكى ڤى شاهێ دادپەروەر بكەت، هەمى شيان و دەسهەلاتان بێخيتە د خزمەتا دينێ خودێدا، و خەما وى دينێ خودێ بيت هەرجهێ بچيتێ و بگەهيتێ و گازى و بانگهلدێريا دينێ خۆ ژبير نەكەت، و بەرامبەر خزمەتا خۆ ژ چو نەخوازيت و قەبويل نەكەت رازيبوون و خەلاتێ خودێ نەبيت، و دويف بۆچۆنا دورستتر، زيلقەرنەين مەلك و شاه بوو نەپێغەمبەر هەروەكى ئبن حەجەر (خودێ ژێ رازی بیت) ڤێ دبێژيت، ديسا ئەو نەئەسكەندەرێ مەقدوونيە هەروەكى هندەك هزر دكەن، ئەسكەندەرێ مەقدوونى يێ يونانى بوو، و ستێر و بوت دپەرستن، و ئەڤە يێ خودان ئيمان بوو هەروەكى ڤێ چەندێ ئبن تەيميە و ئبن قەيم خودێ ژ وان رازى بيت ڤێ دبێژن، كورت و كرمانج فەرە ئەم بزانين ئەو پێزانينێت د قورئانێدا هاتين ئەو د راست و دورستن د راستا ويدا و ئەڤە بەسى مەنە ئەم ژ وى بزانين و دەرس و وانەيان بۆ خۆ ژێ وەرگرين، و خودێ چێتر دزانيت.
