ب / ئايەتا ئێكێ ئايەتا سيهێيە ژ سۆرەتا ئەنفال و تماميا وێ ژى ئەڤەيە: ((وَإِذْ يَمْكُرُ بِكَ الَّذِينَ كَفَرُوا لِيُثْبِتُوكَ أَوْ يَقْتُلُوكَ أَوْ يُخْرجُوكَ وَيَمْكُرُونَ وَيَمْكُرُ اللَّهُ وَاللَّهُ خَيْرُ الْمَاكِرينَ)) ئانكو: بيننە بيرا خۆ وەختێ ئەوێت گاور بووين، ئۆيين و نەخشە و پيلان بۆ تە ددانان و دگێران، دا تە زيندان بكەن و گرێ بدەن يان تە بكوژن، يان تە ژ مەكەهێ دەربێخن، و فند و فێلان دكەن و نەخشەيان ددانن، و خودێ ژى نەخشەيان ددانيت و تەكبيرێ دكەت، و خودێ چێترين تەكبيركەرە، و (مەكر) ژ خودێ ل ڤێرێ وێ رامانێ نادەت ئەوا ژ (مەكر)ـا وان دهێتە زانين يان فند و فێل و خاپاندن و نەخشكێشان و ئۆيين و پيلان داناندنە و ژ خودێ بەرامبەر گرتنا نەخشكێشانا وانە و ڤەگەراندنا ئەنجامێ خاپاندنا وانە بۆ وان.
و ئايەتا دى ئايەتا سەد و چل و دووێيە ژ سۆرەتا نيساْ و تماميا وێ ژى ئەڤەيە: ((إِنَّ الْمُنَافِقِينَ يُخَادِعُونَ اللَّهَ وَهُوَ خَادِعُهُمْ وَإِذَا قَامُوا إِلَى الصَّلَاةِ قَامُوا كُسَالَى يُرَاءُونَ النَّاسَ وَلَا يَذْكُرُونَ اللَّهَ إِلَّا قَلِيلًا )) ئانكو: ب راستى دورويان دڤێن خودێ بخاپينن، و خودێ ب خۆ وان رادكێشيتە سەرداچۆنا وان، و گاڤا رابوونە نڤێژێ، ب سستى رادبن و پێشچاڤێت خەلكى نڤێژێ دكەن، كێم جار نەبن خودێ نائيننە بيرا خۆ، مەخسەد د نڤێژێدا، چونكى ژبەر خەلكى دكەن و ترسا خودێ تێدا ناكەن. و رامانا (وَهُوَ خَادِعُهُمْ ) ل ڤێرێ ئانكو: خودێ دێ سزايێ خاپاندنا وان دەتێ، يان ئەو سەردا دچن دەمێ هزر دكەن كا چاوا خەلك ب ڤى عيبادەتێ شەكلي خاپاندينە هۆسا دێ خودێ ژى خاپينن، ڤێجا دويفبەردان و مۆلەتدان خۆ ب خۆ خاپاندنە بۆ وان بەلێ ئەو نوزانن و هاي ژ خۆ نينە.
و ئايەتا دويماهيێ ئايەتا پازدێيە ژ سۆرەتا بەقەرە و تماميا وێ ژى ئەڤەيە: ((اللَّهُ يَسْتَهْزِئُ بِهِمْ وَيَمُدُّهُمْ فِي طُغْيَانِهِمْ يَعْمَهُونَ)) و هەتا ئەم دورستى رامان و راڤەكرنا ڤێ ئايەتێ بزانين فەرە ئەم ئايەتا بەرى وێ بينين، چونكى پێكڤە د گرێداينە، ئەو ژى ئەڤەيە:(( وَإِذَا لَقُوا الَّذِينَ آمَنُوا قَالُوا آمَنَّا وَإِذَا خَلَوْا إِلَى شَيَاطِينِهِمْ قَالُوا إِنَّا مَعَكُمْ إِنَّمَا نَحْنُ مُسْتَهْزِئُونَ)) و راڤەكرنا وێ ژى ئەڤەيە: دووروى و مونافق ژ نەفامى و نەزانين و بێ عەقليا خۆ هەر دەمەكێ گەهشتنە كەسێت باوەرى ئيناين دبێژنێ: مە ژى باوەرى ئينايە، و هەر وەختەكێ دگەل هەڤالێت خۆ يێت شەيتان، ڤەدەر بوون و مانە ب تنێ، دبێژن: ئەم هەر دگەل هەوەينە، ئەم بەس ترانەيان بۆ خۆ ب وان دكەين. ئينا بەرامبەر ڤى كارێ وان يێ وان ناڤكرى: ئەم ترانەيا بۆ خۆ ب وان دكەين، دبێژتە وان و مە ((اللَّهُ يَسْتَهْزِئُ بِهِمْ)) خودێ دێ جزايێ ترانەيێت وان دەتێ، و ((بِهِمْ وَيَمُدُّهُمْ فِي طُغْيَانِهِمْ يَعْمَهُونَ)) و مۆلەتا هندێ ددەتێ هەر د خرابيا خۆدا بزڤرن، و خودێ چێتر دزانيت.
