ب / ئايەتا ئێكێ ئايەتا سێزدێيە ژ سۆرەتا ئەللەيل، ئانكو خودێ دبێژيت و ديار دكەت دنيا و ئاخرەت يێت خودێنە و بن دەستێ ويڤەنە، يێ ڤيا دێ دەتێ و يێ ڤيا دێ ژێ ستينيت، ڤێجا گەلى مرۆڤان هەكە هەوە دنيا دڤێت ژ خودانێ وێ يێ دورست بخوازن، شاه و مير و بەرپرس و مەزن نەخودانێت دنيايێنە، ئەو دنيا خودێ بۆ تە نەڤيايى، ئەڤ كەسە نەشێن بدەنە تە، و يا بۆ تە ڤياى نەشێن ژ تە ڤەكرن، ديسا يێ ئاخرەت بڤێت خودانێ وێ خودێيە بلا ئێكسەر ژ خودێ بخوازيت نەكەسێ دى، مولكێ ويە، ڤێجا تشتەك ژ مولكێ دنيايێ و ئاخرەتێ بڤێت ما دورستە ژ غەيرى خودانێ مولكى بخوازيت.
و ئايەتا دووێ ئايەتا چارێيە ژ سۆرەتا زوحا، خودێ مەزن تێدا دبێژيتە پێغەمبەرێ خۆ (سلاڤێت خودێ لێ بن) ئەڤا مە ل دنيايێ دايە تە و كەرەم دگەل تە كرى و چاڤدێريا مە ل تە كرى ژ بچويكاتى و ئێتماتيێ، و تو كريە سەردارێ پێغەمبەران و سەرپشكێ مرۆڤان، ئەم دێ ئاخرەتێ چێتر ژ دنيايێ دەينە تە، لەوا پێغەمبەرێ خودێ (سلاڤێت خودێ لێ بن) بەردەوام بەرێ وى ل ئاخرەتێ بوو و خۆ بەندە ددانا و ئەنيا وى بەردەوام بۆ خودێ يا چەماندى بوو، ئيمام ئەحمەد و ترمزى ژ ئبن مەسعودى (خودێ ژێ رازی بیت) ڤەدگێرن دبێژيت: (نَامَ رسولُ اللَّه صَلّى اللهُ عَلَيْهِ وسَلَّم على حَصيرٍ فَقَامَ وَقَدْ أَثرَ في جَنْبِهِ، قُلْنَا: يا رَسُولَ الَّله لوِ اتَّخَژنَا لكَ وِطاءً، فقال: « مَالي وَلَلدُّنْيا ؟ مَا أَنَا في الدُّنْيا إِلاَّ كَرَاكبٍ اسْتَظلَّ تَحْتَ شَجَرَة ثمَّ رَاحَ وَتَرَكَهَا) عەبدوللايێ كورێ مەسعودى (خودێ ژێ رازی بیت)، گۆت: پێغەمبەرێ خودێ (سلاڤێت خودێ لێ بن) ل سەر حێسيلەكێ دنڤست جهێ خۆ د تەنشتا ويدا كربوو، مە گۆت: يا پێغەمبەرێ خودێ هەكە مە بۆ تە دۆشەكەكا خۆش ئينابا، ئينا گۆت: من و دنيايێ چ ژێكە؟ ئەز د دنيايێدا وەكى سويارەكى پێڤەتر نينم خۆ دابيتە بن سيبەرا دارەكێ پاشى چۆبيت و هێلابيت. ئها ب ڤى رەنگى پێغەمبەرى (سلاڤێت خودێ لێ بن) بەرێ خۆ ددا دنيايێ، و دڤێت ئەم ژى هۆسا بەرێ خۆ بدەينە دنيايێ، چونكى ئاخرەت بۆ مە هەميان باشترە و چێترە، خودێ مەزن د ئايەتەكا ديدا دبێژيت: ((لَكِنِ الَّذِينَ اتَّقَوْا رَبَّهُمْ لَهُمْ جَنَّاتٌ تَجْرِي مِنْ تَحْتِهَا الْأَنْهَارُ خَالِدِينَ فِيهَا نُزُلًا مِنْ عِنْدِ اللَّهِ وَمَا عِنْدَ اللَّهِ خَيْرٌ لِلْأَبْرَارِ )) بەلێ ئەوێت پارێزكاريا خودايێ خۆ كرين، بەحەشتێت رويبار د بندا د هەركن بۆ وان هەنە، و هەروهەر دێ تێدا بن، ئێورگەهەكە ژ نك خودێ، و يێ ل نك خودێ هەى بۆ قەنجيكاران چێترە ژ وێ خۆشى و پەرگالا ب رێكا گەريانا دنيايێ دئێت. دبيت ئێك بێژيت: پا چ جوداهى د ناڤبەرا مە و پێغەمبەريدا (سلاڤێت خودێ لێ بن) هەيە، نەخێر جوداهيا هەى ئايەتا سۆرەتا زوحايێ ديار دكەت خودێ كەرەمەكا زێدە مەزن د دنيايێدا يا دگەل پێغەمبەرێ خۆ كرى و دگەل ڤێ كەرەمێ خودێ دێ د ئاخرەتێدا چێتر دەتێ، كەس بەرەڤانيێ ناكەت ئەو نەبيت و مەهدەرا كەسێ رۆژا قيامەتێ ناهێتە وەرگرتن يا وى نەبيت، و ئالايێ پێغەمبەران دێ د دەستێ ويدا بيت، ئوممەتا وى كەس هەروهەر د جەهنەمێدا نابيت، و جهێ مەقامێ پەسندكرى و مەحمود دێ بۆ وى بيت، كەس ناگەهيتە وى جهى، بەلێ ژ چاكان ئەوێت خودێ دێ باشتر دەتێ دبيت دنيايێ هەميێ نەخۆشى و قەتلازى و گرفتارى بربن بەلێ خودێ دێ بۆ ئاخرەتێ بەدەل ڤەكەت، يا خودێ تو مە ژ چاكان و خودێ ناسان دانى و تو د دنيايێدا باشيێ ب رزقێ مە بكەى و تشتێ باش بدەيە مە و ل ئاخرەتێ ژى بەحەشتێ ب رزقێ مە بكەي، و خودێ چێتر دزانيت.
