ب / زانايان دوو بۆچۆن ل سەر تخويبكرنا دەمێ ختمكرنا قورئانێ يێت هەين:
بۆچۆنا ئێكێ: دەمێ ڤەكريە و ناهێتە تخويبكرن، و يێ ختما خۆ گيرۆكەت و گەلەك نەخوينيت ئەو زيانێ دگەهينيتە خۆ و خۆ ژ خێرەكا مەزن بێ بار دكەت، ما چ خێر ژ وێ مەزنترە هەر حەرفەك ب دەه خێران بيت، دگەل من بەرێ خۆ بدە ڤێ حەديسا ئيمام ترمزى ژ ئبن مەسعودى (خودێ ژێ رازی بیت)، ڤەگێراى، دبێژيت: پێغەمبەرى (سلاڤێت خودێ لێ بن) گۆت: ( منْ قرأَ حرْفاً مِنْ كتاب اللَّهِ فلَهُ حسنَە، والحسنَە بِعشر أَمثالِهَا لا أَقول: الم حَرفٌ، وَلكِن: أَلِفٌ حرْفٌ، ولامٌ حرْفٌ، ومِيمٌ حرْفٌ ) يێ پيتەكا قورئانێ بخوينيت خێرەك بۆ ويە، و هەر خێرەك ب دەه خێرانە، و ئەز نابێژمە هەوە: الم پيتەكە، بەلێ: ئەليف پيتەكە و لام پيتەكە و ميم پيتەكە. و يێ ب قورئانێڤە گرێداى پێدڤى ناكەت تو دەمەكێ دياركرى بۆ دانى، هەردەمێ ئەو ژ ختمەكێ خلاس بوو دەست ب ختمەكا دى دكەت و پشكا خۆ ژ قورئانێ يا هەى رۆژ ژێ ناچيت هەكە وێ پشكێ نەخوينيت، دزانيت قورئان رۆژا قيامەتێ چ مفاى دگەهينيتە خودانێ خۆ.
پێغەمبەرێ خۆشتڤى (سلاڤێت خودێ لێ بن) هەروەكى د سەحيحا موسلميدا هاتى، دبێژيت: ( اقْرَؤا القُرْآنَ فإِنَّهُ يأْتي يَوْم القيامە شَفِيعاً لأصْحابِه ) قورئانێ بخوينن، ب راستى ئەو رۆژا قيامەتێ دێ هێت بەرەڤانيێ ژ خودانێ خۆ كەت. و بێ گۆمان يێ بزانيت كا قەدر و بهايێ قورئانێ چەندە و كا خێرا خواندنا وێ چەندە ـ بەلێ زانينەكا كارا و راست و دورست ـ ئەو چو جار سستيێ د راستا قورئانێدا ناكەت و پشتا خۆ نادەتە قورئانێ و ژێ دوير ناكەڤيت.
بۆچۆنا دووێ: دەمێ ختمكرنا قورئانێ يێ دياركرى و تخويبكريە و دڤێت ختما قورئانێ ژ ڤى دەمى نەبۆريت هەكە بۆرى خەلەتيە، و نەه گۆتن ل سەر دياركرنا دەمێ ختمكرنێ يێت هەين:
ئێك: دەمێ دياركرى سێ رۆژن، و دڤێت ژ سێ رۆژان نەبۆريت، و هەكە ژ سێ رۆژان بۆراند گونەهە، و بەلگە ل سەر ڤێ گۆتنێ: ڤەگێرا ئەبو داوديە ژ عەبدوللايێ كورێ عەمرى كورێ عاسى، (خودێ ژێ رازی بیت)، دبێژيت: ( قال لي رسول اللَّهِ (سلاڤێت خودێ لێ بن) اقْرَأْ الْقُرْآنَ في شَهْرٍ قال إِنَّ بِي قُوَّە قال اقْرَأْهُ في ثلاث ) پێغەمبەرى (سلاڤێت خودێ لێ بن) گۆتە من: ختما قورئانێ د هەيڤەكێدا بكە، گۆت من گۆتێ: من هێزا هەى، گۆت: د سێ رۆژاندا ختم بكە.
دوو: دەمێ دياركرى چار رۆژن هەتا شەش رۆژان، و دڤێت د ڤى دەميدا ختم بێتەكرن، و ئيمامێ نەوەوى (خودێ ژێ رازی بیت) دبێژيت: چەند كەسەك خودانێت ڤێ گۆتنێنە.
سێ: دەمێ دياركرى ژ حەفت شەڤان نەبۆريت، كيمتر ژ ڤى دەمى چێدبيت و زێدەتر نە، و ئەڤە ژ گەلەك سەحابى و تابعينان يا هاتيە زانين، ژ وان سەحابان عەبدوللايآ كورێ مەسعودى (خودێ ژێ رازی بیت) و ئەڤە ئێك ژ بۆچۆنێت ئيمام مالك و ئيمام شافعي و ئيمام ئەحمەديە ژى خودێ ژ هەميان رازى بيت.
چار: دەمێ دياركرى هەشت شەڤن و دڤێت ختم ژ ڤى دەمى نەبۆريت.
پێنج: دەمێ دياركرى نەه شەڤن دڤێت ختم ژ ڤى دەمى نەبۆريت.
شەش: دەمێ دياركرى هەيڤەكە و دڤێت ختم ژ هەيڤەكێ نەبۆريت.
حەفت: دەمێ دياركرى چل رۆژن و دڤێت ختم ژ چل رۆژان نەبۆريت و هەكە بۆرى گونەهە، و ئەڤە گۆتنا گەلەك زانايانە و ئيمام قودامە (خودێ ژێ رازی بیت) ژ ئيمام ئەحمەدى (خودێ ژێ رازی بیت) ڤەدگێريت هەكە مرۆڤى كێمتر ژ ڤى دەمى ختم كر دبيت مرۆڤ باش تێنەگەهيت.
هەشت: دەمێ دياركرى دوو هەيڤن و دڤێت ختم د ڤى دەميدا بێتەكرن و ژ ڤى دەمى نەبۆريت، هەكە بۆرى ئەڤە گونەه كر، و ئيمامێ سيوتى دبێژيت و ئەڤ گۆتنە دگەهيتە هندەك پێشاييان.
نەه: دەمێ دياركرى شەش هەيڤن و دڤێت هەر شەش هەيڤان ختمەك بێتەكرن، و هەكە سالێ كێم كێم دووجاران ختم بێتەكرن، چونكى سالا پێغەمبەر (سلاڤێت خودێ لێ بن) تێدا چۆيە بەر دلۆڤانيا خودێ دووجاران جبريلى سلاڤ ل سەر بن قورئان دگەل پێغەمبەرى (سلاڤێت خودێ لێ بن) ختم كر، و زانايێت حەنەفى ڤێ دكەنە بەلگە سەر هندێ كو ختما مرۆڤى چەندا كێم بيت نابيت شەش هەيڤان ببۆريت و ژ دوويان كێمتر بن د سالێدا.
و بۆچۆنا ب هێزتر هەروەكى ئبن تەيميە (خودێ ژێ رازی بیت)، دبێژيت: چو دەمێت دياركرى نينن و ئەڤە يا گرێدايە ب هيز و شينا مرۆڤانڤە، و هەرئێكێ شيانەكا هەى و شيانێت وان د جودانە و هندى بشێت خواندنا خۆ پتر لێ بكەت باشترە ب مەرجەكى نە ل سەر حسێبا چامە و دەرس وەرگرتن و هزركرن و تێگەهشتنێ، و مەرجێ دى نە ل سەر حسێبا ئەرك و واجبان، ئەوێ ئەركەك و واجبەكێ گشتى ل سەر ستۆيێ وى بيت دڤێت هەڤسەنگيێ بێخيتە د ناڤبەرا خواندن و ئەركێ خۆدا، و خودێ چێتر دزانيت.
