ب / جوداهيەكا مەزن د ناڤبەرا تەرتيل و تەجويدێدا نينە و هەردوو نێزيكى ئێكن، تەرتيل ئەوە ئەم نەرم بخوينين و ب وى رەنگى يێ بۆ پێغەمبەرى (سلاڤێت خودێ لێ بن) هاتيە خوارێ، خودێ مەزن دبێژيت: ((رَتَّلْنَاهُ تَرْتِيلًا)) و مە قورئان ئايەت ئايەت ب تە ب رێكا جبريلى دا خواندنێ. و ئەمرێ مە ژى يێ هاتيەكرن ئەم ب تەرتيل قورئانێ بخوينين، دبێژيت: ((وَرَتِّلِ الْقُرْآنَ تَرْتِيلًا)) و قورئانێ هێدى و ل سەر خۆ بخوينە. و تەجويد ژى رامانا وێ ئەوە تو رێك و پێك و باش و ب دورستى قورئانێ بخوينى و حەقێ هەمى حەرفان ژ گۆتنێ بدەيێ. زانا دبێژن: ل سەر هەر قورئان خوينەكى واجبە ئەو فەرمان و ئەحكامێت تەجويدێ بزانيت و ب جه بينيت د خواندنا خۆ يا قورئانێدا، و تەجويد بەرفرەهترە ژ تەرتيلێ، و تەرتيل پشكەكە ژ پشكێت تەجويدێ، و ئەو ژى ئەڤەنە: تەرتيل و تەدوير و حيدر. تەرتيل خواندنا قورئانێيە ب نەرمى و سەر خۆ و ئايەت ئايەت، و تەدوير پيچەكێ ژ تەرتيلێ ب لەزترە، و حيدر پيچەكێ ژ تەدويرێ ب لەزترە، و پشكا ژ هەميان باشتر تەرتيلە و هەرسێ پشك ژى د دورستن، و دبێژنە هەرسێكان تەجويد، و خودێ چێتر دزانيت.
