ب / فەرە بۆ راڤەكرنا قورئانێ ئەم بزڤرينە زانايێت بسپۆر و ژێدەرێت سەرەكى و يێت رەسەن؛ دا خەلەت تێ نەگەهين، و سەحابە هەبوون زوى ب زوى قورئان راڤەنەدكر، هەكە باش و باش بشتراست نەببان، چونكى راڤەكرنا قورئانێ ب ديتن و بۆچۆنێت تايبەت يا مەترسيدارە، ئەڤە خەليفێ پێغەمبەرێ خودێيە (سلاڤێت خودێ لێ بن) ئەبو بەكر (خودێ ژێ رازی بیت) پسيارا راڤەكرن و رامانا ئايەتەكێ ژێ هاتەكرن، گۆت: ئەو چ عەردە دێ من هەلگريت، و چ عەسمانە دێ سيبەرێ ل من كەت، هەكە ئەز تشتەكى ژ دەف خۆ يان نەزانم د قورئانێدا بێژم. و پێغەمبەرێ خودێ ژى (سلاڤێت خودێ لێ بن) ئەم يێت ترساندين ب نەشارەزايى و نەزانين راڤەكرنا قورئانێ بكەين، دبێژيت: (من قال في القرآن برأيه أو بما لا يعلم فليتبوأ مقعده من النار) هەركەسێ ب ديتنا خۆ، يان ب تشتێ نەزانيت د قورئانێدا باخڤيت بلا بۆ خۆ جهەكى ل جەهنەمێ بگريت.
پشتى ڤێ پێشگۆتنێ ئاشكرايە ئايەتا ئێكێ ئايەتا چل و هەشت و سەد و شازدەيە ژ سۆرەتا نيساْ و ئايەتا دووێ يا پێنجى و سێيێيە ژ سۆرەتا زومەر، و چو هەڤدژى د ناڤبەرا هەردوو ئايەتاندا نينە، و راڤەكرنا ئايەتا ئيكێ ب كورتى ئەڤەيە: ب راستى خودێ گونەها چێكرنا هەڤال و هۆگران بۆ خودێ ژێ نابەت و گونەهێت ديتر ئەڤێت مايين ژبلى شيركێ ژێ دبەت، و ب راستى هەركەسێ هەڤالەكى بۆ خودێ چێكەت، ب سويند وى گونەهەكا مەزن كر. و راڤەكرنا ئايەتا دووێ ئەڤەيە: هەى موحەممەد تو ب ناڤێ خودايێ خۆ بێژە وان: هەى بەندەيێت من، هەى ئەوێت هەوە زێدە گونەه كرين و هەوە د كرنا گونەهاندا، دايە سەر هەمى تخويبان، ژ دلۆڤانيا خودێ بێ هيڤى نەبن، ب راستى خودێ ل هەمى گونەهان دبۆريت، و هەمى گونەهان ژێ دبەت، ب راستى ئەوە گونەه ژێبەر و دلۆڤان.
ئايەتا ئێكێ: بەحسێ وى دكەت يێ ژ شيركێ تۆبە نەكەت، بمريت و ب شيركێڤە بچيتە دەف خودێ، ئەڤێ هۆسا دێ هەتا هەتا د ئاگرێ جەهنەمێدا بيت و خودێ گونەهێت وى ژێ نابەت، چونكى وى ژ گونەها هەميان مەزنتر و گرانتر و خرابتر تۆبە نەكريە، ئەو ژى هەڤپشكچێكرن و شيركە، لەوا خودێ و پێغەمبەرێ وى (سلاڤێت خودێ لێ بن) ئەم گەلەك و گەلەك يێ ژ شيركێ ترساندين خودێ مەزن دبێژيت: ((إِنَّ الشِّرْكَ لَظُلْمٌ عَظِيمٌ)) راستى شيرك ستەمەكا مەزنە، و دبێژيت: ((لَئِنْ أَشْرَكْتَ لَيَحْبَطَنَّ عَمَلُكَ وَلَتَكُونَنَّ مِنَ الْخَاسِرِينَ ))ب سويند وەحى بۆ تە و بۆ پێغەمبەرێت بەرى تە يێ هنارتى، ئەگەر تو هەڤپشكان بۆ خودێ چێكەى دێ كار و كريارێت تە پويچ بن، و دێ بيە ژ وان ئەوێت خوسارەت. و پێغەمبەر (سلاڤێت خودێ لێ بن) ئەمرێ مە دكەت دوعا ژ خودێ بكەين مە ژ هەمى رەنگێت شيركێ بپارێزيت يا ئاشكرا و يا بەرزە و يا ئەم دزانين و يا ئەم نەزانين، دبێژيت: (أيها الناس اتقوا هذا الشرك فإنه اخفى من دبيب النمل فقال له من شاء أن يقول وكيف تتقيه وهو أخفى من دبيب النمل يا رسول الله قال قولوا اللهم إنا نعوذ بك من أن نشرك بك شيئا نعلمه ونستغفرك لما لا نعلم) گەلى مرۆڤان خۆ ژ شيركێ بپارێزن، ب راستى ئەو ژ پێژنا مێريێ بەرزەترە، گۆتن يا پێغەمبەرێ خودێ.. چاوا ئەم خۆ دێ ژێ پارێزين و ئەو ژ پێژنا مێريێ بەرزەترە؟ گۆت: ((بێژن: يا خودێ ئەم خۆ ب تە دپارێزين ئەم شيركێ بۆ تە چێكەين تشتەكى ئەم دزانين و ئەم خۆ ژ تە دپارێزين ژ يا ئەم نەزانين)).
و ئايەتا دووێ: بەحسێ ويە يێ د نيايێدا و د ژيانا خۆدا تۆبە ژ هەر گونەهكا هەبيت دكەت، مادەم تۆبەكر و پەشێمان بوو و بريار دا وێ گونەهێ بهێليت و ژ دل تۆبەكر و مەرجێت تۆبێ هەمى ب جه ئينان خودێ دێ گونەهێت وى هەميان ژێ بەت، هۆسا چو هەڤدژى د ناڤبەرا هەردوو ئايەتاندا نينە. و د حەديسەكا قودسيدا پێغەمبەر(سلاڤێت خودێ لێ بن) ژ خودێ خۆ دبێژيت: خودايێ بلند گۆت: (ێا ابْنَ آدَم، إِنَّكَ لَو أَتَيْتَني بِقُرابٍ الأَرْض خطايا، ثمَّ لَقِيْتَني لا تُشْركُ بِي شَيْئاً، لأَتَيْتُكَ بِقُرَابِهَا مَغْفِرَة) ئەى كورێ ئادەمى.. هەكە تو نێزيكى تژى عەردى ب گونەهان بێيە دەف من، پاشى بگەهيە من و تو چو تشتان بۆ من نەكەيە هەڤپشك، ئەز دێ نێزيكى تژى عەردى گونەه ژێبرنێ دەمە تە. و د حەديسەكا دى يا قودسيدا دبێژيت: (يا عِبَادِي إنَّكُمْ تُخْطئُونَ بِاللَّيْلِ وَالنَّهَار وَأَنَا أغْفِرُ الذنُوبَ جَمِيعاً، فَاسْتَغْفِرُوني أغْفِرْ لَكُمْ) گەلى بەندەيێت من.. هوين ب شەڤ و رۆژ گونەهان دكەن، و ئەز هەمى گونەهان ژێ دبەم، داخوازا گونەه ژێ برنێ ژ من بكەن، دێ گونەهێت هەوە ژێ بەم. ژ ڤێ مەزنتر يێ شيرك بۆ خودێ نەچێكرى و دنيايێ ستارەكرى و رەوشا وى ڤەشارتى رۆژا قيامەتێ ژى دێ رەوشا وى ڤەشێريت پشتى گونەهێت خۆ ل سەر خۆ پەسند و ئاشكرا دكەت، بوخارى و موسلم ژ ئبن عومەرى (خودێ ژێ رازی بیت) ڤەدگێرن، دبێژيت: من گول پێغەمبەرێ خودێ بوو (سلاڤێت خودێ لێ بن) دگۆت: (يُدْنَى المُؤمِنُ يَومَ القِيامَە مِنُ رَبِّهِ حتَّى يَطعَ كَنَفَهُ عَلَيهِ، فَيُقَررَهُ بِذنُوبِه، فيقولُ: أَتَعرفُ ذنبَ كَذا؟ أَتَعرفُ ذنبَ كَذا ؟ فيقول: رَبِّ أَعْرفُ، قال: فَإِنِّي قَد سَتَرتُهَا عَلَيكَ في الدُّنيا، وَأَنَا أَغْفِرُهَا لَكَ اليَومَ، فَيُعطى يَحِيفَة حسَنَاته). و ژ ئبن عومەرى، خودێ ژ هەردوويان رازى بيت، گۆت: خودان باوەر رۆژا قيامەتێ ژ خودايێ خۆ دێ هێتە نێزيككرن (نێزيكيا قەدرى و قيمەتێ نە نێزيكيا جهى و مەسافەتێ، چونكى خودێ ژ جهى و مەسافەتێ يێ پاك و پاقژە) هەتا ستر و رەحما خۆ ددانيتە سەر (ئانكو ب رەحما خۆ نەپەنى خەلكێ مەحشەرێ دكەت ب رەنگەكى نە كەس ببينيت و نە كەسێ گولێ ببيت) و دێ گونەهێت وى پێ دەتە گۆتن و ئاشكراكرن، دێ بێژيت: تو ڤێ گونەهێ دزانى، تو ڤێ گونەهێ دزانى؟ دێ بێژيت: بەلێ يا خودێ ئەز دزانم، خودێ دێ بێژيت: ب راستى من د دنيايێدا ل سەر تە ستارەكر و ڤەشارت (ئانكو من ڤەشارت و كەس پێ نەحەساند) و ئەز ئەڤرۆ بۆ تە ژێ دبەم. (ژ دلۆڤانيا خودێ د دنيايێدا كەس پێ نەحەساند شەرمزار ببيت، و قيامەتێ ژى حسێبا وى ب تنێ كر و كەس پێ نەحەساند و بۆ ژێ بر، بەلێ دا بەر رويێ وى ژبۆ دوو ئەگەران: دا بزانيت چو ل بەر خودێ بەرزە نابيت، و يادى دا هەستێ ب دلۆڤانيا خودێ بكەت و بزانيت هەكە ب رەحما خودێ نەبا ئەو نەدچۆ بەحەشتێ)، و خودێ چێتر دزانيت.
