ب / رەحمان و رەحيم، دوو سالۆخ و باشناڤێت خودێنە و ژ دلۆڤانيێ يێت هاتين، و باراپتر زانا و تەفسيرزانان دبێژن: هەردوو ژ دلۆڤانيێنە، و ئێك د رامانا خۆدا بەرفرهترە ژ يا دى، هەتا ژ ئبن عەباسى (خودێ ژێ رازی بیت) هاتيە دبێژيت: هەردوو نازك ناڤێت خودێنە، و ئێك ژ ئێكى بەرفرەهترە، و رەحمان دلۆڤانێ دنيايێ و ئاخرەتێيە، و ل دنيايێ دلۆڤانيێ ب هەميان دبەت گاور و موسلمانان، بێ باوەر و باوەريداران، و گونەهكار و گوهداران، و ئەڤ ناڤە يێ تايبەتە ب خودێ مەزنڤە، نابيت كەس دانيتە سەر خۆ، و كەسێ جسارەت نەكريە ل خۆ بكەت، درەوينێ يەمانێ نەبيت، ئەو ژى ژبەر زێدە سەرداچۆنا وى. و رەحيم دلۆڤانێ ئاخرەتێ ب تنێيە و دلۆڤانيێ بەس دێ ب موسلمان و باوەريداران تنێ بەت، هەتا كەسێ ژ وان د جەهنەمێدا ناهێليت خۆ يێ تەمەت دندكا ژ هەميان بچويكتر ژ ئيمان و باوەريێ هەبيت، و خودێ مەزن د ڤێ رامانێدا دبێژيت: ((هُوَ الَّذِي يُصَلِّي عَلَيْكُمْ وَمَلَائِكَتُهُ لِيُخْرِجَكُمْ مِنَ الظُّلُمَاتِ إِلَى النُّورِ وَكَانَ بِالْمُؤْمِنِينَ رَحِيمًا))(( تَحِيَّتُهُمْ يَوْمَ يَلْقَوْنَهُ سَلَامٌ وَأَعَدَّ لَهُمْ أَجْرًا كَرِيمً)) ئەوە دلۆڤانيێ ب هەوە دبەت، و ملياكەت دوعايا گونەه ژێبرنێ بۆ هەوە دكەن، دا خودێ هەوە ژ تاريستانا گونەهان دەربێخيت و ببەتە رۆناهيا باوەريێ، و ب راستى خودێ بۆ خودان باوەران يێ دلۆڤانە. و دبيت ژبلى خودێ ژى د ڤى ناڤيدا يان د ڤى سالۆخەيدا هەڤپشك بيت هەروەكى خودێ ب خۆ پێغەمبەرێ خۆ(سلاڤێت خودێ لێ بن) پێ سالۆخكرى دبێژيت: ((لَقَدْ جَاءَكُمْ رَسُولٌ مِنْ أَنْفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُمْ بِالْمُؤْمِنِينَ رَءُوفٌ رَحِيمٌ)) ب راستى پێغەمبەرەكێ وەسا يێ ژ هەوە بۆ هەوە هاتى، وەستيانا هەوە ل سەر وى يا گرانە، ئانكو: وى پێ نەخۆشە هوين زەحمەتێ بكێشن، و ئيزا بگەهيتە هەوە، ل سەر راستەرێكرنا هەوە يێ رژدە و يێ هشيارە ل سەر باوەريا هەوە، و بۆ خودان باوەران زێدە دلسۆژ و ب رەحمە. و ئيمامێ قورتبى ل دۆر هاتنا ڤان هەردوو ناڤان ل دويف ئێك و ب ئێك رامان دبێژيت: بۆ تەرغيب و تەرهيبێيە ( شرينكرن و ترساندن )، دا بزانين د دنيايێدا خودێ دلۆڤانيێ ب هەميان دبەت، و بترسين ژ ئيزايا وى، چونكى رۆژا قيامەتێ دلۆڤانيا وى تايبەتە ب موسلمانان تنێڤە، و خودێ چێتر دزانيت.
