ب / نەخێر مەخسەد پێ ئەو نينە هەر سونەتەكا هەبيت ئەو سونەتێت ئاشكرا و دەستنيشانكرينە ئەو ژى سونەتێت رەواتبن ئەوێت دگەل نڤێژێت فەرز دهێنە كرن و وەختێ وان ب وەختێ نڤێژێت فەرزڤە گرێدايە، ئەو ژى ئەڤەنە:
ئێك: دوو ركعەتێت بەرى نڤێژا سپێدێ، ئەڤ سونەتە ژ هەمى سونەتان خێرترە، چونكى وەكى عائيشا دايكا مە موسلمانان (خودێ ژێ رازی بیت) دبێژيت: چو سونەتان وەكى سونەتا بەرى نڤێژا سپێدێ پێغەمبەر (سلاڤێت خودێ لێ بن) يێ ل سەر هشيار نەبوو، و ديسا پێغەمبەرێ خۆشتڤى (سلاڤێت خودێ لێ بن) دبێژيت: دوو ركعەتێت بەرى نڤێژا سپێدێ ژ دنيايێ و ژ تشتێت د دنيايێدا چێترن. و د ريوايەتەكێدا دبێژيت: ئەو هەردوو ركعەت بۆ من ژ دنيايێ هەميێ خۆشڤيترن. و ئەڤە ڤەگێرانا موسلمى و ئيمام ئەحمەد و ترمزيە.
دوو: چار ركعەتێت بەرى نڤێژا نيڤرۆ يان بەرى نڤێژا خوتبێ، عائيشا دايكا مە موسلمانان (خودێ ژێ رازی بیت) دبێژيت: پێغەمبەرێ خودێ (سلاڤێت خودێ لێ بن) چار ركعەت بەرى نڤێژا نيڤرۆ و دوو ركعەت بەرى نڤێژا سپێدێ نەدهێلان. ئيمامێ بوخارى ڤەگێرايە.
سێ: دوو ركعەتێت پشتى نيڤرۆ.
چار: دوو رعەتێت پشتى نڤێژا مەغرەب.
پێنج: دوو ركعەتێت پشتى نڤێژا عەيشا.
و ل دۆر ڤان سونەتان پێغەمبەرێ خۆشتڤى (سلاڤێت خودێ لێ بن) دبێژيت: هەركەسێ د رۆژەك و شەڤەكاندا دازدە ركعەتان سونەت بكەت، مالەك بۆ د بەحەشتێدا دهێتە ئاڤاكرن. (چار ركعەت بەرى نڤێژا نيڤرۆ و دوو ركعەت پشتى وێ، و دوو ركعەت پشتى نڤێژا مەغرەب و دوو ركعەت پشتى نڤێژا عەيشا و دوو ركعەت بەرى نڤێژا سپێدێ). ئيمامێ ترمزى ڤەگێرايە، و خودێ چێتر دزانيت.
