ب / بەلێ ئەو حەديسا ب ڤێ چەندێ هاتى يا دورستە و ڤەگێرانا بوخارى و موسلميە ژ ئەبو هورەيرە (خودێ ژێ رازی بیت) دبێژيت: پێغەمبەرى (سلاڤێت خودێ لێ بن) گۆت: ب راستى خودێ نۆت و نەه ناڤێت هەين سەد كێم ئێك، يێ ژبەر بكەت دێ چيتە بەحەشتێ، بەلێ مەخسەد و رامان ژ پەيڤا ژبەركرن نەڤەگێرانە ل سەر ئەزمانى و هەر هند، بەلكى رامان ئەڤەيە بپارێزيت و بزانيت و بنياسيت و ل بەر سيبەرا وان بێتە پەروەردەكرن و دگەل وان ناڤان بژيت، وەختێ دزانيت خودێ (محيي) و (مميت)ـە دڤێت هنگى ژ كەسێ نەترسيت و بزانيت مرن و ژيانا وى بەس يێت د دەستێ خودێدا، و وەختێ دزانيت (سميع) و (بصير)ـە دڤێت چو ئاخفتنێت حەرام نەكەت و ل جهێ خراب نەهێتە ديتن، ئها ئەڤەيە ژبەركرنا ناڤان و يێ ب ڤى رەنگى ناڤێت خودێ ژبەركەت دێ چيتە بەحەشتێ، و خودێ چێتر دزانيت.
