ب / بەلێ، حەديسا هەى و ئەڤ حەديسە موسلمى يا ژ ئەبو هورەيرە (خودێ ژێ رازی بیت)، ڤەگێراى، و دەقێ وێ ئەڤەيە: عن أبي هريرە رضي اللَّه عنه قال: قال رسولُ اللَّه صَلّى اللهُ عَلَيْهِ وسَلَّم: ((المُؤمِن الْقَوِيُّ خيرٌ وَأَحبُّ إِلى اللَّهِ مِنَ المُؤمِنِ الضعِيفِ وفي كُلٍّ خيْرٌ. احْرصْ عَلَى مَا ينْفَعُكَ، واسْتَعِنْ بِاللَّهِ وَلاَ تَعْجَزْ. وإنْ أصابَك شيءٌ فلاَ تقلْ: لَوْ أَنِّي فَعلْتُ كانَ كَذا وَكذا، وَلَكِنْ قُلْ: قدَّرَ اللَّهُ، ومَا شَاءَ فَعَلَ، فَإِنَّ لَوْ تَفْتَحُ عَمَلَ الشَّيْطان)) خودان باوەرێ ب هێز چێتر و خۆشڤيترە ل دەف خودێ ژ خودان باوەرێ لاواز، و خێر يا د هەردووكاندا هەى، (چونكى هەردوو خودان باوەرن) و يێ هشياربە ل سەر پەرستنێ، و هاريكاريێ ژ خودێ بخوازە و بێ خيرەتى ژ پەرستنێ تە نەگريت و هاريكاريێ ژ خودێ بخوازە، و هەكە تشتەك گەهشتە تە، نەبێژە: هەكە من ئەڤە و ئەڤە كربايە، بەلێ بێژە: خودێ يا نڤێسى، و هەر تشتێ بڤێت دێ كەت، ب راستى هەكە دەرگەهێ وەسوەسا شەيتانى ڤەدكەت (ئانكو ب قەدەرێ نەرازيكەت). و رامانا حەديسێ ئەو نينە مرۆڤێ ب هێز ژ يێ لاواز باشتر و ب قەدرترە. خودێ مەزن دبێژيت: ((يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ)) گەلى مرۆڤان، ب راستى مە هوين ژ نێر و مێيەكێ ئانكو زەلام و ژنەكێ كو ئادەم و حەوانە يێت داين، و مە هوين يێت كرينە ملەت ملەت و عەشير عەشير دا ئێكدو بنياسن؛ ب راستى يێ ژ هەوە هەميان پتر ب رێز و رويمەت ل دەف خودێ، ئەوە يێ ژ هەوە هەميان تەقواتر، ئانكو يێ ژ هەوە هەميان پتر ژ خودێ دترسيت، و خودێ زێدە زانا و شارەزايە. بەلێ ژ باوەرداران يێ ب هێز دگەل باوەرداريێ خۆشڤيترە ژ يێ لاواز.
هەكە ئەم باش و هويرك بەرێ خۆ بدەينە حەديسێ، دێ بينين پێغەمبەرێ خودێ (سلاڤێت خودێ لێ بن) گۆتيە باوەردارێ ب هێز، نەگۆتيە مرۆڤێ ب هێز ئەو باوەردارێ هێز و شيانا خۆ دئێخيتە د خزمەتا دينێ خودێدا يێ ب هێزا خۆ مفاى ل خۆ و غەيرى خۆ دكەت، ما وەرزشڤانێ زەندك بادايى و درب هێز و نەباوەردار بۆ چيە هەكە ڤێ هێزێ د خێرێدا ب كار نەئينيت. پا تو چ دبێژى هەكە ئەو وێ هێزێ د خرابيێدا ب كاربينيت هنگى كمباخترە، ژبەر هندێ پێغەمبەرێ خۆشتڤى (سلاڤێت خودێ لێ بن) ئاخفتنا خۆ ب باوەردار دەسپێكر و گۆت: باوەردارێ ب هێز، ئەڤە رامانا هندێ ددەت دڤێت هێز و باوەرى دگەلێك بن و ژێك نەهێنە جوداكرن، و هۆسا، بەلێ خودان باوەرێ ب هێز ژ باوەردارێ لاواز و بێ هێز چێترە و مفايێ وى پترە، چونكى يێ لاواز بيت مفاي ناگەهينيتە خۆ، ڤێجا چاوا دێ گەهينيتە غەيرى خۆ، دبيت زێدەگاڤى ل سەر بێتەكرن و ژ لاوازيا خۆ بەرەڤانيێ ژ خۆ نەكەت، يێ هۆسا چاوا دێ بەرەڤانيێ ژ موسلمانا و ئيسلامێ كەت هەكە زێدەگاڤى ل سەر هاتەكرن، ل ڤێرێ باوەردارێ ب هێز ژ باوەردارێ بێ هێز باشتر و خۆشڤيترە، و پەيڤا هێز د فەرمودێدا پەيڤەكا ڤەكرى و بەرفرەهە و رامانا وێ نە يا تخويبدارە و مەخسەد پێ رەنگەكێ هێزێ ب تنێ نينە هەرچەندە راستە دڤێت ئەم پەسند بكەين هەمى رەنگێت هێزێ يا سەرەكى و يا ژ هەميان هەژيتر هێزا ئيمان و باوەريێيە، باوەردارێ ب هێز د ئيمان و باوەريا خۆدا باشتر و خۆشڤيترە ژ باوەردارێ لاواز د ئيمان و باوەريا خۆدا، راستە مەخسەدا سەرەكى ژ هێزێ ئەڤ هێزەيە هەروەكى نەوەوى د موسلمێدا دبێژيت، بەلێ مەخسەد ئەو رەنگێ هێزێ ب تنێ نينە بەلكى هەمى رەنگێت هێزێ دگريت و بەرێ مە ددەتە هندێ ئەم د رژد و هشياربين ل سەر هێزێ و ئەم گرنگ و فەر بگرين، چونكى خزمەت و بەرهەم ب هێزێ دهێتەكرن و ب جهئينان، و بەرێ موسلمان و باوەردارى ددەتە هندێ ئەو چ بيت يێ ب هێز بيت هەكە ئەندازيار بيت ئەندازيارەكێ ب هێز و خودان شيان بيت و ئەندازيارەكێ لاواز نەبيت، و هەكە بازرگان بيت بازرگانەكێ ب هێز و خودان شيان بيت و بازرگانەكێ لاواز نەبيت، و هەكە پيشەكار بيت، پيشەكارەكێ ب هێز و خودان شيان بيت و پيشەكارەكێ لاواز نەبيت، و هەكە پيشەساز بيت، پيشەسازەكێ ب هێز و خودان شيان بيت و پيشەسازەكێ لاواز نەبيت، و هەكە زانا بيت يان زانين خواز بيت، زانا و زانين خوازەكێ ب هێز و خودان شيان بيت و زانا و زانين خوازەكێ لاواز نەبيت و هۆسا، دڤێت موسلمان و باوەردار د هەمى تشتاندا يێ هێزخواز بيت و د باوەرى و هەمى كاروبارێت خۆدا يێ هێزدار و خۆدان شيان بيت، چونكى خودێ مەزن فەرمانا مە دكەت ئەم هێز و شيانان بۆ پاشڤەبرنا دژمنان بەرهەڤكەين، دبێژيت: ((وَأَعِدُّوا لَهُمْ مَا اسْتَطَعْتُمْ مِنْ قُوَّةٍ وَمِنْ رِبَاطِ الْخَيْلِ تُرْهِبُونَ بِهِ عَدُوَّ اللَّهِ وَعَدُوَّكُمْ وَآخَرِينَ مِنْ دُونِهِمْ لَا تَعْلَمُونَهُمُ اللَّهُ يَعْلَمُهُمْ)) و هوين گەلى خودان باوەران هندى هەوە پێ چێ ببيت ژ هێزێ و هەسپێت گرێدايى بۆ وان بەرهەڤكەن كو هوين پێ ـ ب وێ هێزێ ـ دژمنێت خودێ و دژمنێت خۆ و هندەكێت ژبلى ڤان هوين نانياسن، خودێ وان دنياسيت، چاڤترساندى بكەن. و هەرگاڤا دژمنان زاني موسلمان د لاواز و بێ هێزن دێ ب ساناهى هزرا دەست درێژى و زێدەگاڤيێ ل سەر كەن و چ دێ وان دەتە پاش و چاڤترساندى كەت و پاشڤەبەت هێز و شيانا موسلمانان، و مرۆڤێ باوەردار و ب هێز ژ هەميان هەژيترە هەڤكارى دگەل بێتەكرن، لەوا خودێ مەزن د قورئانا خۆ يا پيرۆزدا دبێژيت: ((اسْتَأْجِرْهُ إِنَّ خَيْرَ مَنِ اسْتَأْجَرْتَ الْقَوِيُّ الْأَمِينُ ))ب شڤانى بگرە، ب راستى يێ ژ هەميان چێتر تو ب شڤانى بگرى، ئەوە يێ ب هێز و ئەمين، و خودێ چێتر دزانيت.
