ب / بەلێ، ئەڤ حەديسە يا دورستە و ئيمام بوخارى ژ ئەبى هورەيرە ب ڤێ بێژەيێ ڤەگێرايە (خَلَقَ الله آدَمَ على صُورَتِهِ طولُهُ سِتُّونَ ذرَاعًا) و ئيمام موسلمى ديسا ژ ئەبى هورەيرە (خودێ ژێ رازی بیت)، ب ڤێ بێژەيێ ڤەگێرايە (إذا قَاتَلَ أحدكم أَخَاهُ فَلْيجْتَنِبْ الْوَجْهَ فإن اللَّهَ خَلَقَ آدَمَ على صُورَتِهِ) و زانا پتر ژ بۆچۆنەكێ يێت هەين كا جهناڤێ (صورتە) بۆ كێ دزڤريت و كا مەخسەدا حەديسێ چيە، هندەك دبێژن ئەڤ جهناڤە بۆ مرۆڤى دزڤريت ئەوێ فەرمان بۆ هاتيە ئاراستەكرن (إذا قَاتَلَ أحدكم أَخَاهُ فَلْيجْتَنِبْ الْوَجْهَ) هنگى رامانا حەديسێ ئەڤەيە: هەكە ئێكى ژ هەوە شەرێ برايێ خۆ كر بلا خۆ ژ روى بپارێزيت (ئانكو چو دربان نەدانيتە سەروچاڤان) چونكى خودێ ئادەم يێ ل سەر خولكێ وى چێكرى، و ئەڤ حەديسە بەلگەيە گونەهە درب ب سەروچاڤان بكەڤن خۆ هەكە مرۆڤى ڤيا ئێكى تۆرە و ئەدەب بدەت، دڤێت ژ سەروچاڤان دويركەڤيت، و ئەبى عاسمى ڤەگێرەك ژ ئەبى هورەيرە (خودێ ژێ رازی بیت)، ڤەگێرايە پشتەڤانيا ڤێ بۆچۆنێ دكەت (إذا قاتل أحدكم فليجتنب الوجه فإن الله خلق آدم على صورە وجهه)، و هندە زانايێت دى دبێژن: ئەو جه ناڤ دزڤريتە ئادەمى و نازڤريتە خودێ، ئانكو: دەمێ خودێ ئادەم چێكرى ل سەر خولكێ وى تەكويز دورستكر، نەوەكى قۆناغێت دويندەها وى تێدا دبۆريت، هەروەكى خودێ مەزن د راستا ويدا دبێژيت: ((وَلَقَدْ خَلَقْنَا الْإِنْسَانَ مِنْ سُلَالَةٍ مِنْ طِينٍ))(( ثُمَّ جَعَلْنَاهُ نُطْفَةً فِي قَرَارٍ مَكِينٍ))(( ثُمَّ خَلَقْنَا النُّطْفَةَ عَلَقَةً فَخَلَقْنَا الْعَلَقَةَ مُضْغَةً فَخَلَقْنَا الْمُضْغَةَ عِظَامًا فَكَسَوْنَا الْعِظَامَ لَحْمًا ثُمَّ أَنْشَأْنَاهُ خَلْقًا آخَرَ فَتَبَارَكَ اللَّهُ أَحْسَنُ الْخَالِقِينَ)) و ب سويند مە مرۆڤ ژ هێڤێنێ هەريێ چێكريە. پاشى مە ئەو كرە چپكەك، و خۆجه كر د مالبچويكيدا. پاشى مە ئەو چپكە كرە خوينپارە (خوينەكا قەرسى و پێكڤە)، پاشى مە ئەو خوينپارە كرە گۆشتپارە، پاشى مە ژ گۆشتپارەى هەستى دا، و مە هەستى ب گۆشتى كراسكر و نخافت، پاشى (پشتى ڤان قويناخان، مە روح دايێ)، و كرە چێكريەكێ دى، و پاكى و بلندى بۆ باشترين و چێترين چێكەر. و حەديسەكا هاتي نێزيكى ڤێ حەديسێ ب ڤێ بێژەيێ (ان الله خلق آدم على صورة الرحمن) بەلێ زانايێت مە دبێژن: ئەڤە ب رامان يا هاتيە ڤەگێران و ب ڤێ بێژێ نەيا دورستە، ژ وان زانايان: مازرى و نەوەوى و ئەبو بەكر محەممەد كورێ حەسەن كورێ فورك، و ژ هەڤچەرخان ئەلبانى خودێ ژ هەميان رازى بيت، و خودێ چێتر دزانيت.
