ب / ئەڤە ئاخفتنەكا خەلەت و شاش و نەوەيى و دويرە ژ راستى و عەدالەتێ و ژ وى دەردكەڤيت يێ زانياريێت وى ژ ئيسلامێ يێت لەنگ و كێم يان نەى، چونكى حەديسا پێغەمبەرى (سلاڤێت خودێ لێ بن) ژ لايێ كرياريڤە راڤەكەر و شلۆڤەكرنە بۆ قورئانێ و جهئينانا ب كريارە بۆ قورئانێ ڤێجا چاوا قورئان خودێ مەزن ب خۆڤە گرتيە بپارێزيت دەست بچنە د ناڤدا: ((إِنَّا نَحْنُ نَزَّلْنَا الذِّكْرَ وَإِنَّا لَهُ لَحَافِظُونَ)) خودێ دبێژيت: ب راستى مە قورئان يا ئينايە خوارێ و ب راستى ئەم ب خۆ ژى بۆ پارێزڤانين و دێ پارێزين. و حەديس ژى مادەم لايێ ب كار بۆ قورئانێ دهێتە هەژمارتن دگەل قورئانێ دێ يا پاراستى بيت، و بۆ ڤێ چەندێ خودايێ مەزن زانايێت ناڤدار و ب خيرەت و هيممەت و وەستيان نەنياس پەيداكرن و خەمەكا گەلەكا زێدە يا مەزن ژ حەديسا پێغەمبەرێ وى (سلاڤێت خودێ لێ بن) خوارن و نەهێلان دەستێت خراب و نەباش ناڤ ڤەگێرێت حەديساندا بەرزە ببن و هەمى دانە نياسين و حەديسێت لاواز و دورست و حەسەن و درەو هەمى ژێك هاتنە ڤاڤارتن و جوداكرن و نياسين، و ب سەدەهان بەلكى ب هزارەها زانا د ڤى كاريدا تايبەتمەند بوون و ژيێ خۆ بۆ ڤى كارێ پيرۆز تەرخان و تايبەتمەندكر و نەهێلا تێكەل ببيت و نەهێتە زانين كا كيژكا دورستە و كيژ نەيا دورستە، و زانا هەبوون تايبەت مەند بوون ب كۆمكرنا حەديسێت دورست تنێ وەكى بوخارى و موسلمى و خودانێت هەر شەش سيحاحان و ئبن حەببان و ئبن خوزەيمە، و هندەكان حەديس دويف بابەتان دانان وەكى خودانێت سونەنان و هندەكان بەس يێت لاواز كۆمكرن دا خەلك بزانن وەكى ترمزى و مەقدسى، هاتيە زانين ئيمام ئەحمەد سەد هزار حەديس ب كورێ خۆ دانە ژبەركرن هەتا هەمى ژبەركرين، گۆتێ: ئەڤێت تە ژبەركرين هەمى د لاوازن دا خۆ ژێ بدەتە پاش، و هندەكان بەس حەديسێت درەو كۆمكرن، وەكى: ئبن جوزى و سيوتى و شەوكانى و هندەكان حەديس دويف سەحابان كۆمكرينە، وەكى: ئيمام ئەحمەدى و حەميدى و بەزار و ئبن موبارەك، و هندەكان كتێب دويف ڤەگێرێت وەلاتان دانان، وەكى: خەتيبێ بەغدادى و ئبن عەساكرى، و هندەكان كتێب ل سەر وان ڤەگێران دانان يێت لاواز و بريندار، وەكى: عەقيلى و زەهەبى و بوخارى و مەقريزى و ئبن جوزى، و هندەكان كتێب ل سەر وان ڤەگێران دانان ئەوێت باوەرپێكرى، وەكى: زەهەبى و نەسائى و سيوتى و عەجيلى، و هۆسا ژ هەمى لايانڤە خەم ژ حەديسا پێغەمبەرى (سلاڤێت خودێ لێ بن) هاتە خوارن و ل هەمى چەرخان، و بەرەڤانى ژ حەديسا پێغەمبەرى (سلاڤێت خودێ لێ بن) ب رێكێت زانستى و باوەرپێكرى هاتەكرن، كو ئەڤرۆكە ئەم حەديسان پشت راست وەرگرين و شەنگست و بنەما و قاعيدێت زێرين هاتنە دانان، حەديسا لاواز و نەلاواز ژێك بێنە نياسن و ب پشتراستى، و هندە كتێب وەكى بوخارى و موسلمى، موسلمان هەمى ل سەر كۆم بوون كو دورسترين كتێبن پشتى كتێبا خودێ قورئانێ؛ ژبەر خەما هەردووكان ژێ خوارى؛ و ژبەر وان مەرج و شەنگستێت قەبويل و پەسندكرى ژ هەميان، ئەوێت كرينە بنيات و بنەما بۆ دانانا كتێبێت خۆ، و مە باوەريا هەى چو چەرخ و دەم و زەمان ژ ڤان رەنگە زانايان ڤالا نابن، و بەردەوام خودێ مەزن دێ زانايێت حەديسێ پەيداكەت خەمێ ژ حەديسێت پێغەمبەرى (سلاڤێت خودێ لێ بن) بخۆن و بەرەڤانيێ ژێ بكەن، و خودێ چێتر دزانيت.
