ب / بەلێ بێ گۆمان ئەڤ حەديسە ژ ژن و مێران دگريت، و نەدورستە و مەكروهە ژن يان مێر دەمێ مويێت سپى ل سەرێ خۆ ببينن بيننە دەرێ، و ئەڤە بۆچۆنا مالكى و شافعى و حەنبەليانە، و ئەڤ حەديسە ژ ڤەگێرانا ئەبو داود و نەسائى و ترمزى و ئبن ماجە و ئبن حەبان و ئيمام ئەحمەديە، و ب چەند بێژەكا هاتيە ژ وان: (لاَ تَنْتِفُوا الشَّيْبَ، فَإنَّهُ نُورُ المُسْلِمِ يوْمَ الْقِيامة) مويێت سپى نەئيننە دەر، ب راستى ئەو رۆناهيا موسلمانينە رۆژا قيامەتێ. (لا تَنْتِفُوا الشَّيْبَ فإنه نُورُ الْمُسْلِمِ ما من مُسْلِمٍ يَشِيبُ شَيْبَە في الْإِسْلامِ إلَّا كَتَبَ اللَّهُ له بها حَسَنَة وَرَفَعَهُ بها دَرَجَة وَحَط عنه بها خَطيئَة) هەركەسێ مويەكى د ئيسلامێدا سپيكەت دێ خێرەك بۆ پێ هێتە نڤێسين و گونەهەك بۆ پێ هێتە ژێبرن، پلەيەك بۆ پێ هێتە بلندكرن.
و خودێ مەزن، مەزن راگرتنا خۆ يا كريە ئەو، تو قەدرێ وى بگري يێ مويێت وى د ئيسلامێدا سپى بووين، ئەبو مووسا ژ دەف ئەبو داودى دبێژيت: پێغەمبەرى (سلاڤێت خودێ لێ بن) گۆت: (إِنَّ مِنْ إِجْلالِ اللَّهِ تعالى إِكْرَامَ ذى الشَّيْبة المُسْلِمِ، وَحَامِلِ الْقُرآنِ غَيْر الْغَالي فِيهِ، والجَافي عَنْهُ وإِكْرَامَ ذي السُّلْطانِ المُقْسِط) ژ مەزنگرتنا خودايێ مەزنە، قەدرگرتنا موسلمانێ خودان مويێت سپى، و قەدرگرتنا هەلگرێ قورئانێ (خواندەڤانێ قورئانێ) يێ نەيێ توند تێدا (يێ كوير نەچۆبيتە تێدا و ژ تخويبێت وێ يێت دورست دەرباز نەبووى) و نەيێ سست و پشتا خۆ دايە خواندنا وێ (مەخسەد دڤێت دگەل قورئانێ و د هەمى كار و باراندا مرۆڤ يێ ناڤنجى بيت) و قەدرگرتنا خودان دەسهەلاتێ دادپەروەر. د ڤەگێرەكا ديدا يا تەبەرانيدا دبێژيت: (ثلاثة لا يستخف بهم إلا منافق ذو الشيبة في الإسلام وذو العلم وإمام مقسط) سێ مرۆڤان كەس سڤكيێ پێ ناكەت دووروى نەبيت: يێ د ئيسلامێدا پير بووى و خودان زانين و سەروەرێ دادپەروەر. و هاتيە ڤەگوهاستن ئيبراهيم پێغەمبەرى (سلاڤێت خودێ لێ بن) دەمێ ميێ ئێكێ يێ سپى د سەرێ خۆرا ديتى گۆت: ئەڤە چيە يا خودێ؟! گۆتێ: ئەڤە رێز و حورمەتە، ئينا گۆت يا خودێ رێز و حورمەتان ل من زێدەكە. ئەنەس (خودێ ژێ رازی بیت) دبێژيت: پێغەمبەرێ خودێ (سلاڤێت خودێ لێ بن) گۆت: ب راستى خودێ مەزن و ب هێز شەرم دكەت ژ بەندەيێ خۆ و بەندەيا خۆ د ئيسلامێدا پير ببن (مويێت سپى بكەڤنە سەرێت وان) پاشى وان ئيزا بدەت، ژبەر ئەڤا بۆرى دڤێت ئەم ب خەم نەكەڤين دەمێ مويێت سپى دكەڤنە سەرێت مە، و هەكە زێدە بوون و كرێت بوون، دورستە بێنە گوهارتن ب هەر رەنگەكێ هەبيت رەش تێ نەبيت، جهێ ئختيلافێيە د ناڤبەرا زاناياندا، وەكى دى هەمى رەنگێت دى دورستن چ خەنا بيت چ مەعجوين بيت زەر، سۆر، هەر رەنگێ هەبيت. خودانێت سونەنا (ترمزى و نەسائى و ئەبو داود و ئبن ماجە) ژ ئەبى زەرى (خودێ ژێ رازی بیت) ڤەدگێرن: باشترين تشت هوين ڤێ سپياتيێ پێ ڤەشێرن خەنا و كەتمە، و كەتم رەنگەكێ گيايە رەنگێ رەش ددەت هەكە دگەل خەنايێ هاتە تێكەلكرن رەنگێ رەش و سۆر تێكەلكرى ددەت، و ئەبو بەكر (خودێ ژێ رازی بیت) هەردوو تێكەل دكرن و ب كار دئينان، و عومەرێ كورێ خەتابى (خودێ ژێ رازی بیت) خەنا تنێ ب كار دئينا، و خودێ چێتر دزانيت.
