ب / ئەڤ حەديسە دارەقوتنى و حاكمى ژ ئەبو هورەيرەى (خودێ ژێ رازی بیت)، ڤەگێرايە و سولەيمانێ كورێ داودى ئەبولجەمەل يێ د رێكا وێدا و يێ لاوازە و دارەقوتنى ژ جابرى (خودێ ژێ رازی بیت)، ڤەگێراى و موحەممەدێ كورێ مسكينى د رێكا وێدايە و يێ لاوازە و ئبن حەببانى ژ دايكا مە عائيشايێ (خودێ ژێ رازی بیت)، ڤەگێراى و عومەرێ كورێ راشدى د رێكا وێدايە و يێ درەوينە و ئبن حەزم و ئبن حەجەر و دارەقوتنى دبێژن: ئەڤ حەديسە يا لاوازە و هەكە يا دورست ژى بيت زانايێت مە دبێژن: مەخسەد ئەو نينە نڤێژ نەيا دورستە بەلكى نەگەلەكا تمامە، وەكى وێ نڤێژێ يا ل مزگەفتێ دهێتەكرن، و گەلەك ڤێ حەديسێ دكەنە بەلگە ل سەر واجبيا نڤێژا ب جماعەت، و زانا ل سەر فەرمانا وێ سێ بۆچۆنن:
ئێك: نڤێژا ب جماعەت سونەتا مسۆگەرە، تەئكيد لێ كريە، و ئەڤە بۆچۆنا ئەبو حەنيفەيە و ئيمام مالك و پتريا هەڤالێت شافعي و ڤەگوهاستنەكە ژ ئيمام ئەحمەد خودێ ژ هەميان رازى بيت.
دوو: واجبەكێ كيفائيە، ئانكو: هەكە د باژێريدا يان د گونديدا نەهاتەكرن، وى دەمى هەمى د گونەهكارن، و ئەڤە بۆچۆنا هندە هەڤالێت ئيمام مالكيە(خودێ ژێ رازی بیت)، و گۆتنەكە ژ بۆچۆنا ئيمام ئەحمەد(خودێ ژێ رازی بیت)، و بۆچۆنا ب هێزترە ژ مەزهەبێ شافعى(خودێ ژێ رازی بیت).
سێ: واجبە ل سەر هەركەسەكى، و ئەڤە بۆچۆنا ئيمام ئەحمەدە و مەزهەبێ زاهرى.
بەلێ رەئيا راجح و بهێزتر و يا بەلگە و دەليل پشتەڤانيێ بۆ دكەن.. بۆچۆنا جمهورێ زانايانە، و نڤێژا ب جماعەت سونەتەكا مسۆگەرە و بەلگە ژى دەمێ پێغەمبەرێ خودێ (سلاڤێت خودێ لێ بن) گۆتى: ((نڤێژا ب جماعەت بيست و حەفت جاران ب خێرترە ژ نڤێژا ب تنێ)). و مادەم نڤێژا ب تنێ و ب جماعەت هەردوو د ناڤبەرا ب خێر و ب خێرتر دانا، رامانا وێ ئەوە هەردوو دورستن، هەكە واجب با دا يا ب جماعەت يا دورست بيت، و يا ب تنێ دا نەيا دورست بيت.
ديسا پێغەمبەرێ خودێ (سلاڤێت خودێ لێ بن) دبێژيت: ((هەركەسێ ژ ڤى گياى، ئانكو: سيرێ خوار بلا نێزيكى مزگەفتا مە نەبيت)). و د ريوايەتا موسلميدا: ((مزگەفتێت مە)). و د ريوايەتەكا ديدا دبێژيت: ((هەركەسێ سير يان پيڤاز خوار، بلا ژ مە دويركەڤيت، يان بلا ژ مزگەفتا مە دويركەڤيت)). ديسا د ريواتەكا ديدا دبێژيت: ((هەركەسێ ژ ڤى گياى (مەخسەد پێ سيرە) خوار، بلا نە نێزيكى مە ببيت، و نە نڤێژێ دگەل مە بكەت)). و زانايێ ناڤدار (ابن عبد البر) (خودێ ژێ رازی بیت)، دبێژيت: ئەڤە بەلگەيە نڤێژا ب جماعەت سونەتە و نەواجبە، هەكە واجب با خوارنا سيرێ يان يا پيڤازێ نەدبوو دەستوير يێ بخۆت نەهێتە نڤێژا ب جماعەت واجبى بهێليت. و دەستويرنەدانا پێغەمبەرێ خودێ (سلاڤێت خودێ لێ بن) بۆ يێ كۆرە وەكى زانايێ ناڤدار نەوەوى (خودێ ژێ رازی بیت) دبێژيت: پسيارا وى ئەو بوو ئەرێ هەكە ئەو ل مال بكەت دێ هەر ئەو خێر بۆ هێتە نڤێسين؟ پێغەمبەرێ خودێ (سلاڤێت خودێ لێ بن) بۆ دياركر، نەخێر، و خودێ چێتر دزانيت.
