ب / ب راستى ڤێ ئاخفتنێ بنيات نينە كو حەديس بيت، و ئاخفتنەكە كەفتيە سەر ئەزمانان و نەحەديسە، بەلێ ئەڤ گۆتنە دبيت ژ رامانا ئايەت و حەديسێت د ڤى بواريدا هاتين، هاتبيتە وەرگرتن ئەوێت مرۆڤى ئاراستەدكەن خەمێ ژ مرۆڤێ خۆ بخۆت و قەنجيا خۆ ژ وان دەست پێ بكەت، ژ وان دەقان خودێ مەزن دبێژيت: ((يَسْأَلُونَكَ مَاذَا يُنْفِقُونَ قُلْ مَا أَنْفَقْتُمْ مِنْ خَيْرٍ فَلِلْوَالِدَيْنِ وَالْأَقْرَبِينَ وَالْيَتَامَى وَالْمَسَاكِينِ وَابْنِ السَّبِيلِ وَمَا تَفْعَلُوا مِنْ خَيْرٍ فَإِنَّ اللَّهَ بِهِ عَلِيمٌ)) ژ تە دپرسن: كا دێ چ مەزێخن د رێكا خودێدا؟ بێژە: هەر خێرەكا هوين بدەن، بلا بۆ دەيباب و نێزيك (كەس و كار) و سێوى و بەلنگاز و رێڤنگان بيت، و هەر خێرەكا هوين بكەن ب راستى خودێ پێ ئاگەهە. ((كُتِبَ عَلَيْكُمْ إِذَا حَضَرَ أَحَدَكُمُ الْمَوْتُ إِنْ تَرَكَ خَيْرًا الْوَصِيَّةُ لِلْوَالِدَيْنِ وَالْأَقْرَبِينَ بِالْمَعْرُوفِ حَقًّا عَلَى الْمُتَّقِينَ)) ل سەر هەوە هاتە دانان، ئەگەر ئێك ژ هەوە كەفتە بەر مرنێ، و مالەكێ مەزن پاش خۆڤە هێلا، وەسيەتێ ب قەنجى بكەت بۆ دەيبابان و كەس و كاران، و ئەڤ وەسيەتە ئەركە ل سەر پارێزكاران.
و د ڤەگێرا بوخارى و موسلميدا ژ ئەنەس (خودێ ژێ رازی بیت) هاتيە دبێژيت: ئەبو تەلحە (خودێ ژێ رازی بیت) ژ ئەنساران پتر هەميان دار قەسپ ل مەدينێ هەبوون، و مالێ وى يێ ژ هەميان خۆشڤيتر بۆ وى بيستانێ بەيروحائبوو، و دكەفتە قيبلا مزگەفتا پێغەمبەرى (سلاڤێت خودێ لێ بن)، و پێغەمبەرێ خودێ (سلاڤێت خودێ لێ بن) دچۆ د ناڤدا و ژ ئاڤا وێ ڤەدخوار و يا ئاڤ شرين بوو، ئەنەسى گۆت: دەمێ ئەڤ ئايەتە هاتيە خوارێ: ب راستى، هوين ناگەهنە راستيا قەنجيێ، هەتا هوين وى نەمەزێخن (د رێكا خودێدا) يێ هوين گەلە حەژێ دكەن. ئەبو تەلحە رابوو دەف پێغەمبەرێ خودێ (سلاڤێت خودێ لێ بن) و گۆت: يا پێغەمبەرێ خودێ، خودايێ مەزن ل سەر تە ئينايە خوارێ: ب راستى، هوين ناگەهنە راستيا قەنجيێ، هەتا هوين وى نەمەزێخن (د رێكا خودێدا) يێ هوين گەلە حەژێ دكەن. و مالێ من يێ پتر ئەز حەژێ دكەم بەيروحائە و ئەز بۆ خودێ دكەمە سەدەقە هيڤيا خێرا وێ و شوينا وێ ل دەف خودێ دكەم، بێخە د وى جهيدا يێ خودێ نيشا تە داى، پێغەمبەرێ خودێ (سلاڤێت خودێ لێ بن) گۆت: ئوو ئەڤە مالەكێ ب فايدەيە، ئەڤە مالەكێ ب فايدەيە، (ئانكو خێرا ڤى مالى چەندا مەزنە) من گولێ بوو كا تە چ گۆت: و ئەز دبينم تو بدەيە مرۆڤێت خۆ، ئەبو تەلحە گۆت: دێ وەكەم يا پێغەمبەرێ خودێ. و ئەبو ئومامە (خودێ ژێ رازی بیت) د ڤەگێرا ترمزيدا دبێژيت: پێغەمبەرێ خودێ (سلاڤێت خودێ لێ بن) گۆت: يا كورێ ئادەمى هەكە تو يا زێدە بدەى بۆ تە باشە و هەكە تو بگرى بۆ تە خرابە، و لۆما تە ل سەر قەدەرێ هەوجەييا تە نائێتەكرن (چ تو ل دەف خۆ بهێلى چ خەمێ ژێ بخۆى دەست خۆ بێخى) و دەست ب يێ نێزيكێ خۆ يێ تو ژ خودانكرنا وى بەرپرس بكە. حەكيمێ كورێ حيزامى (خودێ ژێ رازی بیت)، د ڤەگێرا بوخاريدا دبێژيت: پێغەمبەرێ خودێ (سلاڤێت خودێ لێ بن) گۆت: دەستێ بلند و ددەت ژ دەستێ نزم و دخوازيت و وەردگريت چێترە، و دەست ب يێ نێزيكێ خۆ يێ تو ژ خودانكرنا وى بەرپرس بكە، و باشترين سەدەقە ئەوە يا مرۆڤ ژ كراسێ بێمنەتيێ ددەت (ئانكو خێرترين سەدەقە ئەوە يا مرۆڤ ژ مالێ خۆ دەردئێخيت، پشتى تێرا خۆ و مالا خۆ دهێليت) و هەركەسێ قەناعەت و دلپاكيێ بخوازيت، خودێ دێ دلپاك و ب قەناعەت ئێخيت، و هەركەسێ زەنگينيێ ل خۆ ئاشكراكەت خودێ دێ (دلێ وى) زەنگين كەت، و خودێ چێتر دزانيت.
