ب / ئەڤ حەديسە ئيمام حاكم ڤەگێرايە، و دبێژيت: يا دورستە و دويف مەرجێت بوخارى و موسلميە و وان نەئينايە، و ديسا ژ ڤەگێرانا ترمزى و ئەبو داوديە، و رامانا وێ ئەڤەيە: هەركەسێ بۆ خودێ ڤيا و بۆ خودێ نەڤيا و بۆ خودێ دا و بۆ خودێ ڤەگرت و نەهێلا ب راستى وى باوەريا خۆ تمامكر.
حەژێكرنا بۆ خودێ ئەوە تو حەژ ئێكى بكەى نە ژبەر مالا وى و نە ژبەر بنەمالا وى و نە ژبەر جوانيا وى و نە ژ بەر دەسهەلاتداريا وى و نە ژبەر شرينيا ئاخفتنا وى و نە ژ هيڤيا مفايەكى بگەهينيتە تە يان خرابيەكێ ژ تە بدەتە پاش و نە ژ هيڤيا تە ژ تەنگاڤيەكێ رزگاركەت يان هاريكارى و ساناهيكاريەكێ بۆ تە بكەت، پالدەرێ ئێكێ و يێ دويماهيێ يێ حەژێكرنێ ئەوە چونكى يێ ديندارە و خودێترسە و مرۆڤێ خودێيە و كێرهاتيە و وى تشتى دكەت يێ خودێ و پێغەمبەرى (سلاڤێت خودێ لێ بن) پێ خۆش، و خۆ ژ وى تشتى ددەتە پاش يێ خودێ و پێغەمبەرى پێ نەخۆش، قەنجيێ بگەهينيتە تە و نەگەهينيتە تە وەكى ئێكە، ڤيانا تە بۆ كێم نابيت، راستە هەكە باشى گەهاندە تە زێدە دكەت و ئەڤە تشتەكێ ئاساييە، چونكى سروشتێ مرۆڤى ب وى ئاوايى يێ چێكريە، حەژ وى دكەت يێ باشيێ دگەل دكەت، بەلێ هەكە باشى گەهاندێ يان نەگەهاندێ ڤيانا وى كێم ناكەت، و بەرامبەر ڤێ ڤيانا بۆ خودێ دڤێت نەڤيان هەبيت بۆ يێت گونەهكار كى بن سەر بنياتێ كرنا گونەهێ.
و ژ نيشانێت ئاشكرا مرۆڤ بزانيت كا دلێ مرۆڤى يێ د ڤان هەردوو هەستاندا يێ راستە يان نە.. بەرێ خۆ بدەتە دلێ خۆ دگەل دينداران يێ چاوايە و دگەل گونەهكاران يێ چاوايە، بەرێ خۆ بدەتە خۆ كا ڤان هەردوو هەست و مەشاعران (ڤيان و نەڤيانان) ددەتە كێ و ل سەر چ بنياتى، هەكە نەڤيانا خۆ دا هندەكان ل سەر چ بنيات و شەنگستە و هەكە نەڤيا خۆ دا هندەكان ل سەر چ بنيات و شەنگستە، هەكە گەهشتە بەرسڤەكا راست و دورست و نەيا خاپينۆك دێ بۆ دياربيت كا دلێ وى يێ چاوايە، هۆسا پيڤەرێ زانينا ڤيانا خودێ ديار دبيت ئەڤ هەردوو هەستە (ڤيان و نەڤيان) بۆ جهێ هەژى دەردكەڤن، پێغەمبەر (سلاڤێت خودێ لێ بن) دبێژيت: (أوثق عرى الإسلام الحب في الله والبغض في الله) تشتێ ژ هەميا موكمتر مرۆڤ خۆ پێڤە بگريت د ئيسلامێدا حەژێكرنە بۆ خودێ و نەڤيانە بۆ خودێ، ديسا دگەل من بەرێ خۆ بدێ كا پێغەمبەرێ خۆشتڤى (سلاڤێت خودێ لێ بن) چ دوعا دكر دا بزانين كا ئەڤ مرۆڤە چەندێ دويرى رێكا پێغەمبەريە (سلاڤێت خودێ لێ بن) ئەڤ دوعايە دكر: (اللهم اجعلنا هادين مهديين غير ضالين ولا مضلين عدوا لأعدائك وسلما لأوليائك نحب بحبك الناس ونعادي بعداوتك من خالفك من خلقك) يا خودێ مە بكە راستەرێكرى يێت راستەرێكەر نە بەرزە و نە بەرزەكەر، دژمن بۆ دژمنێت خۆ و دۆست و ئاشت بۆ وەليێت خۆ، ب حەژێكرنا تە حەژ خەلكى بكەين و ب ئەگەرێ دژمنيا تە دژمنيا وى بكەين يێ نەگوهداريا ئەمرێ تە دكەت، ڤێجا بلا ئەڤە بەرێ خۆ بدەنە خۆ و هەلويستێ خۆ، كا ئەو چەند پێگرن ب ڤى بنەماي و مەبدەئى، و دڤێت بزانن ڤيان بۆ خودێ و نەڤيان بۆ خودێ ژ ئيمانێيە، هەروەكى ئيمامێ بوخارى ڤى شەنگستى د پەرتۆكا خۆدا ئەوا پشتى قورئانا پيرۆز دهێت ل دەف هەمى زانايان بنەجه دكەت، دبێژيت: ڤيان بۆ خودێ و نەڤيان بۆ خودێ ژ ئيمانێيە، و ئەڤێت ڤيان و نەڤيانا وان بەروڤاژى، ڤيانا خۆ ددەنە وان ئەوێت ڤيابا نەڤيان دابا وان، و نەڤيانا خۆ ددەنە وان ئەوێت ڤيابا ڤيانا خۆ دابايێ، چونكى موسلمانن و خودێ نياسن و ئارمانجا وان سەركەفتنا دينێ خودێيە، و دينێ خودێ بۆ ببيتە رێباز و ياسا و دستور و مەنهەجێ ژيانێ، خودێ مەزن دبێژيت: ((لَا تَجِدُ قَوْمًا يُؤْمِنُونَ بِاللَّهِ وَالْيَوْمِ الْآخِرِ يُوَادُّونَ مَنْ حَادَّ اللَّهَ وَرَسُولَهُ وَلَوْ كَانُوا آبَاءَهُمْ أَوْ أَبْنَاءَهُمْ أَوْ إِخْوَانَهُمْ أَوْ عَشِيرَتَهُمْ أُولَئِكَ كَتَبَ فِي قُلُوبِهِمُ الْإِيمَانَ وَأَيَّدَهُمْ بِرُوحٍ مِنْهُ وَيُدْخِلُهُمْ جَنَّاتٍ تَجْرِي مِنْ تَحْتِهَا الْأَنْهَارُ خَالِدِينَ فِيهَا رَضِيَ اللَّهُ عَنْهُمْ وَرَضُوا عَنْهُ أُولَئِكَ حِزْبُ اللَّهِ أَلَا إِنَّ حِزْبَ اللَّهِ هُمُ الْمُفْلِحُونَ)) نينە هندەك باوەريێ ب خودێ و رۆژا قيامەتێ بينن، و حەژ وان بكەن ئەوێت نەيارەتى و دژمناتيا خودێ و پێغەمبەرێ وى دكەن، خۆ ئەگەر ئەو باب و باپيرێت وان بن، يان زارۆكێت وان بن، يان برايێت وان بن، يان عەشيرەتا وان بيت، ئەڤان خودێ باوەريا د دلێت واندا نڤێسى و بنەجهكرى، و ب هاريكارى و پشتەڤانى و ب سەركەفتنا خۆ ئەو يێت ب هێز ئێخستين، و دێ وان بەتە بەحەشتێت رويبار د بنرا دچن و هەروهەر دێ تێدا بن، خودێ ژ وان رازٍى بوو و ئەو ژى ژ خەلاتێ خودايێ خۆ رازى بوون، و ئەڤە كۆما خودێنە و باش بزانن يێت سەرفەراز هەر كۆما خودێنە و ئەز هۆسا د ڤيانا د رێكا خودێدا دگەهم، و خودێ چێتر دزانيت.
