ب : ده‌مێ تۆ دبێژی ئه‌ز یێ موسلمان و دیندارم ئانكو تو دبێژی ئه‌ز یێ باوه‌ریدارم و ئه‌ڤه ژی دخوازیت باوه‌ریا ته ره‌نگڤه‌دانا خۆ و کارلێکرنا خۆ ل سه‌ر ھه‌می ئه‌ندام و کار و کریارێت ته هه‌بن، ده‌ستێ ته دڤێت ل دویف وێ بیت یا خودێ دڤێت، ھه‌روه‌سا ئه‌زمانێ ته، دڤێت ل دویف ھندێ بیت ئه‌ڤا خودێ پێ خۆش، ھه‌روه‌سا چاڤ و گوھ و جلکێت ته، و ھه‌که ئه‌ڤه د ھۆسا نه‌بن ئه‌ڤه ڤێ رادگه‌ھینیت تو نه‌یێ دینداری وه‌کی تو بۆ خۆ دبێژی.. ئه‌ڤرۆ مخابن ئه‌م گه‌له‌کان به‌روڤاژی دبینین، رێکا خودێ ناگرن، و یێت ژ رێکا خودێ ده‌رکه‌فتین، و وێ ناکه‌ن یا خودێ ئه‌مرێ وان دکه‌ت و خودێ پێ خۆش، نه د خوارن و ڤه‌خوارنا خۆدا، و نه د جلکێت خۆدا، و نه د کار و کریارێت خۆدا، و دگه‌ل ھندێ ژی دبێژن ئه‌ز یێ دیندارم و چ قوسیری دراستا دینیدا د مندا نینه، و ھه‌که تو به‌رێ خۆ بده‌یێ دێ بینی ھه‌می کار و کریارێت وی، ھه‌تا ھاتن و چۆنا وی ژی ھه‌می د خه‌له‌تن، و ھه‌تا دبیت نڤێژان ژی نه‌که‌ت، و گه‌له‌ک شۆلێت خراب ژی دکه‌ت، و جلكێ وی یان یێ وێ نه یێ شه‌رعییه و سه‌ره‌ده‌ریا شه‌رعی ناكه‌ت و پێگریێ ب فه‌رمانێت شه‌رعی ناكه‌ت و خه‌ما رازیبوونا خودێ و پێغه‌مبه‌ری دكاروكریارێت خۆدا ناكه‌ت و دگه‌ل ھندێ ژی دبێژیت: ئه‌ز یێ دیندارم یان ئه‌ز یا دیندارم!!! کی دبێژیت تو یێ دینداری؟ تو دبێژی؟ ئه‌زمانێ ته، ده‌ستێت ته، پێت ته، جلکێت ته، کار و کریارێت ته، ھه‌لویستێت ته، ھاتن و چۆنا ته، ھه‌می دبێژنه ته دره‌وه وه‌نینه، دینداری دخوازیت ده‌ستێ ته یێ پاقژ بیت درێژ نه‌بیته خرابی و حه‌رامیێ، و گوھێت ته د پاقژ بن حه‌رامی و نه‌کامی و ئاخفتن و سترانێت پویچ نه‌چنه تێدا، و چاڤێت ته د پاقژ بن و به‌رێ خۆدانا حه‌رام نه‌که‌ن، و سنج و ئه‌خلاق و ره‌وشتێت ته د پاقژ بن، و جلکێ ته جلکێ ئیسلامی بیت، و رێڤه‌چۆنا ته و خوارن و ڤه‌خوارنا ته، ئه‌ڤه ھه‌می دڤێت ب وی ره‌نگی بن یێ خودێ پێ خۆش و ئه‌مر پێ کری، كورت و كرمامج دڤێت هه‌می فه‌رمانێت ئیسلامێ ره‌نگڤه‌دانا خۆ ل سه‌ر ته هه‌بن و تو ب ئیسلامێ هاتبییه ره‌نگكرن، ڤێجا ھه‌که ئه‌ڤه ھه‌می وه‌سا بن، بۆ خۆ بێژه؛ ئه‌ز یێ دیندارم، و ھه‌که تو یێ ھۆسا نه‌بی نه‌خێر تو نه یێ دینداری و دینداری ل ده‌ف ته نینه.
ئه‌م دێ ھنده‌ک ژ نیشانێت دینداری و دینداریێ دیارکه‌ین ھیڤیه ل ده‌ف مه ھه‌میان ھه‌بن:
ئێک: ژ نیشانێت دینداری ئه‌ڤه‌یه: به‌رده‌وام ژ خه‌له‌تیێ یێ نه‌رازیه ، و کار دکه‌ت خه‌له‌تیێ راکه‌ت و نه‌ھێلیت، ڤێجا ئه‌ڤ خه‌له‌تیه چ ب ده‌ستی رابیت، چ ب ئه‌زمانی، و ھه‌که نه‌شیا، کێم کێم ب دلێ خۆ، و ب چو ره‌نگان دگه‌ل خه‌له‌تیێ نینه، و حه‌ژ خه‌له‌تیێ ناکه‌ت، و ل دۆر ڤێ چه‌ندێ پێغه‌مبه‌رێ خۆشتڤی سلاڤێت خودێ ل سه‌ربن ئه‌مر دکه‌ت: (من رَأَى مِنْكُمْ مُنْكَرًا فَلْيُغَيِّرْهُ بيده فَإِنْ لم يَسْتَطِعْ فَبِلِسَانِهِ فَإِنْ لم يَسْتَطِعْ فَبِقَلْبِهِ وَذَلِكَ أَضْعَفُ الْإِيمَانِ). ھه‌ر که‌سێ ژ ھه‌وه خرابیه‌ک دیت بلا ب ده‌ستێ خۆ راکه‌ت و نه‌ھێلیت، ھه‌که نه‌شیا ب ئه‌زمانی، و ھه‌که نه‌شیا ب دلی و ئه‌ڤه لاوازترین پله‌یێت باوه‌ریێنه. و د ڤه‌گێرانا موسلمیدا خودێ ژێ رازی بیت، ھاتیه: (فَمَنْ جَاهَدَهُمْ بيده فَهُوَ مُؤْمِنٌ وَمَنْ جَاهَدَهُمْ بِلِسَانِهِ فَهُوَ مُؤْمِنٌ وَمَنْ جَاهَدَهُمْ بِقَلْبِهِ فَهُوَ مُؤْمِنٌ وَلَيْسَ وَرَاءَ ذلك من الْإِيمَانِ حَبَّةُ خَرْدَلٍ) ھه‌رکه‌سێ ب ده‌ستێ خۆ جیھادێ بکه‌ت و خرابیێ راکه‌ت، ئه‌و خودان باروه‌ریه، و یێ ب ئه‌زمانێ خۆ خرابیێ راکه‌ت، ئه‌و خودان باوه‌ریه، و یێ ب دلێ خۆ جیھادێ بکه‌ت، و دگه‌ل خرابیێ نه‌بیت ئه‌و خودان باوه‌ریه، و پشتی ڤێ ته‌مه‌ت دندکا خه‌نده‌لکێ ژی باوه‌ری نینه، ڤێجا ئه‌و که‌سێ ئه‌ڤرۆ خۆ دیندار ددانیت، بلا خۆ بدانینه به‌رامبه‌ری ڤێ نیشانێ، کا ئه‌ڤه ل ده‌ف ھه‌یه ئان نه؟ ئه‌رێ دلێ ته دئێشیت ده‌مێ تو خرابیێ دبینی ئان نه؟ ئه‌رێ تو به‌رانبه‌ر خرابی و گونه‌ھان یێ چه‌وانی؟ ئه‌رێ تو یێ لێ بێ ده‌نگی و ده‌ستێ ته به‌س ب سه‌رێ ته‌ڤه‌یه؟ ئه‌رێ دینداریا ته؛ ته پال دده‌ت د رێکا ڤان گونه‌ھاندا راوه‌ستی ئان نه؟ ب راستی به‌رسڤا ته ل سه‌ر ڤان پسیاران دێ دیار بیت کا تو یێ دینداری ئان نه.
دوو: نیشانا دی یا دینداریێ ئه‌ڤه‌یه: حه‌ژێکرنا موسلمانان د دلێ مرۆڤیدا بیت، ڤێجا به‌رێ خۆ بدێ کا ئه‌ڤ نیشانه د دلێ ته‌دا ھه‌یه ئان نه؟ ئه‌رێ حه‌ژێکرنا ته بۆ موسلمانان یا چه‌وایه؟ ئه‌رێ تو موسلمانی چێتر ژ یێ نێزیکی خۆ ددانی چونکی موسلمانه؟ ئه‌ڤه ھه‌که ئه‌وێ نێزیکی ته یێ گونه‌ھکار بیت و نه‌یارێ خودێ و پێغه‌مبه‌ری بیت سلاڤێت خودێ ل سه‌ربن. و ھه‌که تو یێ ھۆسا نه‌بی ئه‌ڤه رامانا وێ ئه‌وه تو نه یێ دینداری، له‌وا خودایێ مه‌زن ئه‌مر دکه‌ت و دبێژیت: (وَلاَ تَرْكَنُواْ إِلَى الَّذِينَ ظَلَمُواْ فَتَمَسَّكُمُ النَّارُ وَمَا لَكُمْ مِن دُونِ اللَّهِ مِنْ أَوْلِيَآءَ ثُمَّ لاَ تُنصَرُونَ) و ب چو ڕەنگان مه‌یلا سته‌مکاران نه‌که‌ن، ئه‌گه‌ر ئاگر دێ ھه‌وە ھنگێڤیت [و دێ د ئاگرێ واندا سوژن]. و ھه‌وە ژ خودێ پێڤه چو پشته‌ڤان نینن، و ھاریکارییا ھه‌وە ژی نائێته کرن. ڤێجا به‌رێ خۆ بدێ تو یێ دیندار نابینی ئه‌و ڤیانا وان ھه‌لگریت ئه‌وێت سته‌مكار و دژمناتیا خودێ دکه‌ن و دژمناتیا پێغه‌مبه‌رێ وی سلاڤێت خودێ ل سه‌ربن دکه‌ن، خۆ ھه‌که ئه‌و مرۆڤ چه‌ند نێزیکی وی بن، یان عه‌شیره‌تا وی بن ئھا ئه‌ڤه ئه‌ون یێت خودایێ مه‌زن باوه‌ری کریه د دلێت واندا و باوه‌ری د دلێت واندا نڤێسی و بنه‌جھکری.
سێ: دیندار ئه‌وه یێ ب ته‌قوا و ژ خودێ دترسیت، ته‌قوا ژی ئه‌ڤه‌یه: تو خۆ بپارێزی ژ ھه‌ر تشته‌کێ ته ھێژای که‌ربا خودێ دکه‌ت و ل به‌ر ئه‌مرێ خودێڤه یێ راوه‌ستیای بی، و فه‌رمان و ئه‌مرێت وی ب جھـ بینی، و خۆ ژ نه‌واھیێت وی یێت ھویر و گر دویربێخی، و پێگریێ ب ھه‌می فه‌رمانێت خودێ بکه‌ی. ئھا ئه‌ڤه‌یه یێ دیندار. ئه‌رێ تو یێ ھۆسایی؟ و ب ڤی ره‌نگی؟ و ھۆسا ترسا خودێ ده‌ف ته هه‌یه؟ و ب ڤی ره‌نگی تو ل به‌ر ئه‌مرێت خودێڤه یێ راوه‌ستیای؟ به‌رسڤا دورست ل سه‌ر ڤان پسیاران دێ دیار بیت کا راسته تو یێ دینداری ئان نه؟.
چار: دیسا ژ نیشانێت دینداریێ ئه‌ڤه‌یه: به‌رده‌وام ئه‌مانه‌ت بێته پاراستن، و ئه‌مانه‌ت ژی ب رامانا خۆ یا گشتی نه‌یا به‌رته‌نگ، و ب ڤێ رامانێ نه‌فسا ته، و دینێ ته، و زاڕۆکێت ته، و کارێ تو دکه‌ی ئه‌مانه‌تن، چ تو به‌رپرس بی، یان فه‌رمانبه‌ر بی، یان ھه‌ر تشته‌کێ دی بی، دڤێت ئه‌مانه‌تی د ھه‌می کار و بارێت خۆدا به‌رچاڤ وه‌رگری و بپارێزی، و کارێ خۆ ب دورستی و ب ئه‌مانه‌ت بکه‌ی، پێغه‌مبه‌ر سلاڤێت خودێ ل سه‌ربن دبێژیت: (انَّ الأمَانَةَ نَزَلَتْ في جَذْرِ قُلُوبِ الرِّجَالِ، يَنَامُ الرَّجُلُ النَّوْمَةَ فَتُقْبَضُ الأمَانَةُ من قَلْبِهِ) ئانکو خودێ ئه‌مانه‌ت یا کریه د نیڤه‌کا دلێ مرۆڤاندا، مرۆڤێ ھه‌ی دێ نڤیت و رابیت ئه‌مانه‌ت د دلێ ویدا نه‌مایه، ھه‌لبه‌ت ئه‌ڤ حه‌دیسه ژ ڤه‌گێرانا بوخاری و موسلمیه.
پێنج: دینداری به‌رێ خودانێ خۆ ناده‌ته ھندێ، ھنده‌ک ئاخفتنێت نه‌دورست و نه‌بنه‌جهـ د ده‌رھه‌قێ خه‌لکیدا بێژیت، یان ژی ھزره‌کا خه‌له‌ت ژ ھنده‌کان راکه‌ت، یان ئاخفتنه‌کا نه‌بنه‌جهـ د راستا موسلماناندا بێژیت. خودایێ مه‌زن دبێژیت: (وَلاَ تَقْفُ مَا لَيْسَ لَكَ بِهِ عِلْمٌ إِنَّ السَّمْعَ وَالْبَصَرَ وَالْفُؤَادَ كُلُّ أُولئِكَ كَانَ عَنْهُ مَسْؤُولاً) و تشتێ تو چو ژێ نه‌زانی ل دویڤ نه‌چه، ب ڕاستی مرۆڤ ژ گوھ و چاڤ و دلێ خۆ به‌رپرسه.
شه‌ش: نیشانه‌کا دی یا دینداریێ ئه‌ڤه‌یه، فه‌رمان وئه‌مرێت خودێ و پێغه‌مبه‌ری، پێدڤیه ئه‌م ب چاڤه‌کێ مه‌زن به‌رێ خۆ بده‌ینێ، نڤێژه، رۆژیه، زه‌کاته، حه‌جه، حیجابێ ژنێیه، و ھه‌ر تشته‌کێ دبیت په‌یوه‌ندی ب دینیڤه بیت، جھێ داخێیه گه‌له‌ک جاران دێ ھنده‌کان بینی خۆ موسلمان ژی ددانن، ب سڤکی به‌رێ خۆ دده‌نه حیجابا ژنێ و دبێژن: ئه‌ڤه چ ده‌رسۆکه، ھه‌وه ھۆسا گرێدایی، ما دێ خۆ خه‌ندقینی، یان ئه‌ڤه چ جلکن ڤێ ھاڤینێ؟ ئاخر دێ سوژن، ئان ئه‌ڤه چ رھن ھه‌وه به‌رداین، خودایێ مه‌زن ئه‌مر دکه‌ت: (ذلِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ) ھه‌رکه‌سێ ئه‌مرێت خودێ و رێ و نیشانێت دینێ وی مه‌زن بدانیت وه‌کی ئه‌مر پێ ھاتیه‌کرن و ب جهـ بینیت، ب راستی ئه‌ڤه ئانکو: مه‌زن وه‌رگرتنا ئه‌مرێت خودێ، نیشانا دیندارێیه، ئھا دینداری ئه‌ڤه‌یه، ئه‌مرێت خودێ، و رێ و نیشانێت دینێ وی، و ئه‌حکامێت دینی ھه‌میان مه‌زن بدانیت، و ب چاڤه‌کێ مه‌زن به‌رێ خۆ بده‌تێ و ب جهـ بینیت، و ب سڤکی به‌رێ خۆ نه‌ده‌ته چو فه‌رمانێت خودێ.
حه‌فت: نیشانا دینداریێ ئه‌ڤه‌یه، بیرا مرۆڤی بینیته که‌نکه‌نه و گرگره‌یان ئه‌وێت ژ رێکا خودێ ده‌رکه‌فتین و د رێکا راستیێ و ئیسلامێ و دینێ خودێدا راوه‌ستیاین، و ئه‌وێت دژمناتیا دینێ خودێ کرین د چه‌رخێت جودا جودادا کا چ ب سه‌رێ وان ھات، و ب سه‌ر چ چۆن؟ دا مرۆڤ ژی نه‌که‌فته د خه‌له‌تیا واندا، و دا ئه‌وا ب سه‌رێ وان ھاتی ب سه‌رێ مرۆڤی ژی نه‌ھێت، ئه‌وێت خۆ ب ھێز و شیان و ده‌ستھه‌لاتا خۆ دفن بلند دکرن، خودایێ مه‌زن دبێژیت: (وَكَمْ أَهْلَكْنَا قَبْلَهُمْ مِّن قَرْنٍ هُمْ أَشَدُّ مِنْهُم بَطْشاً فَنَقَّبُواْ فِى الْبِلَادِ هَلْ مِن مَّحِيصٍ إِنَّ فِى ذَالِكَ لَذِكْرَى لِمَن كَانَ لَهُ قَلْبٌ أَوْ أَلْقَى السَّمْعَ وَهُوَ شَهِيدٌ) مه چه‌ند مله‌تێت ژ وان زه‌برده‌ستتر، و ب ھێزتر به‌ری وان د ھیلاک برن، گه‌له‌ک وه‌لات تێکڤه‌دابوون، ئه‌رێ وان ره‌ڤینه‌ک ژ مرنێ یان ژ ئیزایا خودێ ھه‌بوو؟ ب راستی ئه‌ڤه چامه و ده‌رسن بۆ وی یێ خودان عه‌قل و دله‌کێ پاقژ ھه‌ی. ڤێجا ب راستی یێ دیندار، دێ بۆ خۆ ده‌رس و چامه‌یان وه‌رگریت و چو جاران پشته‌ڤانی و پێگریا دژمنێت خودێ ناکه‌ت، ھه‌رده‌م دلێ وی دبێژیتێ کا فیرعه‌ون و چ لێھات، و چ ل ھامانی ھات، و چ ل فلانی و بێڤانی ھات؟ ھه‌تا ئه‌ڤێت دوھی و پێر فلان و بێڤان ئه‌ڤێت خۆ مه‌زن دکرن و ل به‌ر ئه‌زیه‌تا موسلمانان دگه‌ریان چ لێھاتن؟.
هه‌شت: دیندار ئه‌ڤه‌یه، ھه‌که ئاخفتنا خێرێ گوھ لێ بوو، گوھداریێ بۆ دکه‌ت، و ب جھـ دئینیت، و گوھێ خۆ ژ ئاخفتنا پویچ و خراب دگریت، و گوھێ خۆ ناده‌تێ، ئه‌رێ ئه‌ڤرۆ چه‌ند که‌س، شه‌ڤ و رۆژێت خۆ ب ئاخفتنێت پویچ و په‌لاچڤه دبه‌ن؟! چ ستران بن، چ ھه‌ر ئاخفتنه‌کا دی بیت. ڤێجا که‌نگی یێ ھۆسا یێ دینداره؟ ئه‌رێ تو رۆژێ چه‌ند گوھێ خۆ دده‌یه باشیێ؟ تو چه‌ند ل دویف وێ باشیێ دچی و ب جهـ دئینی؟ و به‌رامبه‌ر ڤێ تو چه‌ند گوھێ خۆ دده‌یه خرابیێ؟ و تو چه‌ند ل دویف دچی؟ و د به‌رسڤێدا دێ زانی کا تو چه‌ندێ دینداری. خودایێ مه‌زن د قورئانا پیرۆزدا مزگینیێ دده‌ته ڤان به‌نده‌یێت خۆ یێت دیندار؛ دبێژیت: (الَّذِينَ يَسْتَمِعُونَ الْقَوْلَ فَيَتَّبِعُونَ أَحْسَنَهُ أُوْلَئِكَ الَّذِينَ هَدَاهُمُ اللَّهُ وَأُوْلَئِكَ هُمْ أُوْلُو الأَلْبَابِ) مزگینیێ بده به‌نده‌یێت من ئه‌وێت گوھ ل ئاخفتنان دبن و ل دویف یا چێتر دچن، ئه‌ڤه‌نه یێت خودێ راسته‌رێکرین و ھه‌ر ئه‌ڤه‌نه خودان عه‌قل.
نه‌ھ: دینداری ئه‌ڤه‌یه، به‌رده‌وام یێ تۆبه‌دار بیت، و ژ گونه‌ھان بترسیت و حسێبا خۆ و گونه‌ھان بکه‌ت. پێغه‌مبه‌ر سلاڤێت خودێ ل سه‌ربن به‌رێ مه دده‌ته ڤێ چه‌ندێ و دبێژیت: (ب راستی ئه‌ز د رۆژێدا پتر ژ حه‌فتێ جاران تۆبه دکه‌م و داخوازا گونه‌ھ ژێبرنێ دکه‌م). و ئه‌م دزانین پێغه‌مبه‌ر سلاڤێت خودێ ل سه‌ربن یێ گونه‌ھ ژێبری بوو و خودێ گونه‌ھ نه‌ھێلابوونه ل سه‌ر، به‌لێ دگه‌ل ھندێ ژی ھه‌ژمارا بۆری د رۆژێدا تۆبه دکر دا ئه‌م بۆ خۆ بکه‌ینه ده‌رس و ئه‌م خودانێت خۆ ھندێ بین.
ده‌ھ: دیسا ژ نیشانێت دینداریێ ئه‌ڤه‌یه، نه‌ڤیانا موسلمانێت ڤی چه‌رخی و یێت چه‌رخێت بۆرین تێدا نه‌بیت، و دڤێت ھندی سه‌رێ ده‌رزیکێ ژی که‌رب و کین و نه‌ڤیانا چو موسلمانان ل ده‌ف نه‌بیت. ڤێجا به‌رێ خۆ بدێ کا تو یێ هوسانی ئان نه؟ خودایێ مه‌زن به‌حسێ خودان باوه‌ران دکه‌ت و دبێژیت: خودان باوه‌ر ئه‌ون ئه‌وێت به‌رده‌وام ڤێ دوعایێ دکه‌ن: (رَبَّنَا اغْفِرْ لَنَا وَلإِخْوَانِنَا الَّذِينَ سَبَقُونَا بِالإَيمَانِ وَلاَ تَجْعَلْ فِى قُلُوبِنَا غِلاًّ لِّلَّذِينَ ءَامَنُواْ رَبَّنَآ إِنَّكَ رَءُوفٌ رَّحِيمٌ) و نه‌ڤیانا چو موسلمانان نه‌ئێخه د دلێت مه‌دا، ئه‌رێ ئه‌ڤه چه‌ند ل ده‌ف مه ھه‌یه؟ مخابن ئه‌ڤرۆ گه‌له‌کان دێ بینی نه‌ڤیانا موسلمانان ب تنێ یا د دلێ ویدا، و د بنیڕا ڤیانا موسلمانان د دلیدا نینه، ڤێجا که‌نگی ئه‌ڤه دینداریه؟!.
یازده: دینداری دخوازیت یێ دلۆڤان بیت و دل ره‌ق نه‌بیت و دلوڤانی بۆ ھه‌می که‌سان هه‌بیت، و ئه‌ڤه سالوخه‌ته‌كا بنه‌جھـ و سه‌ره‌كییه د كه‌ساتیا ویدا خودایێ مه‌زن د راستا دویکه‌تیێت پێغه‌مبه‌ریدا ئه‌مر دکه‌ت: (مُّحَمَّدٌ رَّسُولُ اللَّهِ وَالَّذِينَ مَعَهُ أَشِدَّاء عَلَى الْكُفَّارِ رُحَمَاء بَيْنَهُمْ تَرَاهُمْ رُكَّعاً سُجَّداً يَبْتَغُونَ فَضْلاً مّنَ اللَّهِ وَرِضْوَاناً) موحه‌ممه‌د پێغه‌مبه‌رێ خودێیه، و ئه‌وێت د گه‌ل د ڕاستا گاوراندا یێت دژوارن، و د ناڤبه‌را خۆ ب خۆدا دلۆڤانن، ھندی تو دبینی ھه‌ر یێ د ڕکووع و سوجده‌یێدا، که‌ره‌م و ڕازیبوونا خودێ دخوازن. ڤێجا ھه‌که دلێ ته دلۆڤانی تێدا نه‌بیت و یێ ره‌ق بیت ئه‌ڤه تو نه یێ دینداری.
دوازده: نیشانه‌کا دی یا دینداریێ ئه‌ڤه‌یه، به‌رده‌وام شوکردار بیت ل سه‌ر وان که‌ره‌م و نیعمه‌تێت خودێ داینێ، ئه‌و نیعمه‌تێت که‌س نه‌شێت ب ھه‌ژمار زه‌بکه‌ت. و ل سه‌ر ڤێ چه‌ندێ به‌یھه‌قی ژ پێغه‌مبه‌ری سلاڤێت خودێ ل سه‌ربن ڤه‌دگوھێزیت، دبێژیت: پێغه‌مبه‌ری سلاڤێت خودێ ل سه‌ربن گۆت: (أربع من أعطيهن فقد أعطي خير الدنيا والآخرة قلب شاكر ولسان ذاكر وبدن على البلاء صابر وزوجة لا تبغيه خوناً في نفسها ولا ماله) چار تشت هه‌ركه‌سێ خودێ دانێ ئه‌ڤه خێرا دین و دنیایێ دایێ، دله‌کێ شوکردار، و ئه‌زمانه‌کێ زکرکه‌ر، و ژنه‌کا باش ھاریکاریا ته بکه‌ت ل سه‌ر کاروبارێت دین و دنیا ته و داخوازا خیانه‌تی د خۆ و مالێ ته دا نه خوازیت؛ ئه‌ڤه ژ ھه‌می تشتان چێتره بگه‌ھیته خه‌لکی، ڤێجا دا بزانین کا شوکر چیه؟ ئه‌و ژی ئه‌ڤه‌یه تو په‌رستنا خۆ پتر لێ بکه‌ی و پتر نێزیکی خودێ ببی، نه ھه‌ما به‌س ب ده‌ڤ ب تنێ بیت؟.
سێزده: دیسا نیشانه‌کا دی یا دینداریێ ئه‌ڤه‌یه، مرۆڤ یێ پشت راست نه‌بیت ئه‌و کار و کریارێت کرین ھه‌می دێ ژێ قه‌بویل بن؟ چونکی ھه‌که ئه‌و ژ خۆ پشت راست بوو، وی ده‌می دێ بێژیت، ما کی ژ من باشتره؟ ئه‌ز رۆژیگرم، نڤێژکه‌رم، یێ ھۆسامه و ھۆسامه، ڤێجا دێ بێ منه‌ت بیت، و دینداری نه ئه‌ڤه‌یه، به‌لێ دینداری ئه‌ڤه‌یه بێژیت: ما من چ کریه و ئه‌ڤا من کری ژی، کی دبێژیت دێ ژ من قه‌بویل بیت؟ خودایێ مه‌زن ب ڤی ره‌نگی ره‌وشا خودێناسان دکه‌ت: (وَالَّذِينَ يُؤْتُونَ مَا ءاتَواْ وَّقُلُوبُهُمْ وَجِلَةٌ أَنَّهُمْ إِلَى رَبِّهِمْ رَاجِعُونَ) ئانکو ئه‌وێت وێ خێر و باشیا ئه‌و دکه‌ن، دکه‌ن و دلێ وان ھه‌ر یێ ب ترسه؛ دترسن خودێ ژ وان قه‌بویل نه‌که‌ت، بۆچی ھه‌ر ب ترسن؟ چونکی ھه‌ر دێ ب بال خودێڤه زڤرن. پێغه‌مبه‌رێ خۆشتڤی د راستا ڤاندا دبێژیت: ئه‌ڤه ئه‌ون یێت نڤێژکه‌ر و رۆژیگر و خێرکه‌ر، به‌لێ ھه‌ر دلێ وان یێ ب ترسه خودێ ژێ قه‌بویل نه‌که‌ت. (حه‌سه‌ن ئه‌لبه‌سری) دبێژیت: پێشیێت باش و سه‌حابی ژ ھه‌وه پتر ترسا خێرێت خۆ ھه‌لدگرتن کو ژێ نه‌ئێنه قه‌بویلکرن ژ ترسا ھه‌وه ژ گونه‌ھێت ھه‌وه کو پێ بھێنه ئیزادان، ڤێجا ھه‌که دل یێ ھۆسا بیت دێ مرۆڤی پالده‌ت بۆ:
ئێک: کار و کریارێت مرۆڤی به‌س بۆ خودێ ب تنێ بن و رویمه‌تی تێدا نه‌بیت.
دوو: پتر خێر و خێراتان و کار و کریارێت باش بکه‌ت.
سێ: ئه‌و کار و کریار د راست و دورست و بنه‌جهـ بن ژ ترسا ھندێ کو نه‌ھێنه قه‌بویلکرن.
ئه‌م دوعا ژ خودایێ مه‌زن و خودان باش ناڤان دکه‌ین ھاریکاریا مه بکه‌ت و ھاریکاریا ھه‌وه بکه‌ت و باوه‌ریا مه هه‌وه موكوكم بكه‌ت، و دلێت مه گۆمرا نه‌که‌ت پشتی راسته‌رێ کرین، و پشتی ئیسلامه‌تی و باوه‌ری کریه تێدا، و گونه‌ھێت مه و یێت ھه‌می موسلمانان ژێ ببه‌ت، و نه‌ڤیانا چو موسلمانان نه‌ئێخیته سه‌ر دلێت مه، و دلێت مه ب باوه‌ریێ رۆن بکه‌ت و مه ژ وی بپارێزیت یێ ژ خودێ نه‌ترسیت، و مه ل سه‌ر دینێ خۆ و گوھداریا خۆ موکوم بکه‌ت، و مه ژ گونه‌ھان بشۆت و دلێت مه پاقژ و ساخله‌م بکه‌ت، و د دنیایێدا دلێ مه تژی ترسا خۆ بکه‌ت، و د ئاخره‌تێدا د ئێمن بین و نه‌ترسین.
دويماهيێ ئه‌ز دبێژمه مرۆڤێت دلسۆز و حه‌ژێكه‌رێت ئيسلامێ و ئه‌وێت خۆ دیندار دبینن و ددانن، پێكڤه دا ته‌قوا خودێ بكه‌ين، و باش هزرا خۆ بكه‌ين، به‌رى ئه‌م و نه ژ مه‌خسه‌د، خۆ بده‌ينه دگه‌ل نه‌يارێت ڤى دينى، يان دگه‌ل موسلمانێت بووينه ئێخسيرێت به‌رژه‌وه‌نديێت به‌رته‌نگ و به‌روه‌خت، و ئه‌م ژى وێ ڤه‌گێرين يا ئه‌و ژ نه‌خش و ژ پيلان دانان و ژ مه‌ره‌م و ژ مه‌خسه‌د دبێژن، و ئه‌م ژى وێ ده‌هۆلێ لێ بده‌ين يا ئه‌و لێ دده‌ن، و وێ ته‌ويكێ لێ بده‌ين يا ئه‌و لێ دده‌ن، ب راستى ئه‌ڤه هه‌ژيه مرۆڤ بۆ ب خه‌م بكه‌ڤيت، موسلمانێ خۆ دیندار دزانیت هۆسا ب ساناهى بێته خاپاندن و سه‌ردابرن، و ژ هاريكاري و پشته‌ڤانيا ئيسلامخواز و موسلمانان بێته دويرئێخستن ب هێجه‌تا ئه‌و حزبن، يان سياسه‌تێ دكه‌ن، يان سياسه‌ت و ئيسلامێ تێكه‌ل دكه‌ن و دویماهیك دوعایا مه حه‌مد و په‌سن هه‌ر بۆ خودێ بن خودایێ هه‌می جیهانان.
