ب : حه‌ژێكرن مافێ پێغه‌مبه‌رێ خوشتڤییه و دڤێت ئه‌م حه‌ژێ بكه‌ین و خه‌ریبیێت وی به‌رده‌وام ل مه بده‌ن و بیریا وی بكه‌ین، و د هه‌می ده‌مێت سالێدا، درێژیا سێ سه‌د و شێست و شه‌ش رۆژاندا، و نه به‌س د رۆژا بوونا ویدا ب تنێ، قورمێ دارێ ئه‌وا خوتبه ل سه‌ر دخواندن بیریا وی دكر و بۆ دنالی، ما ئه‌م هه‌ژیتر نینین ئه‌م خه‌ریبیا وی بكه‌ین؟ هه‌روه‌كی حه‌سه‌نێ به‌صری خودێ ژێ رازی بیت دبێژیت: گه‌لی موسلمانان دار بیریا پێغه‌مبه‌ری دكه‌ن و و دخه‌ریبێت ویدا و دحژێكرنا ویدا دنالێت، ئه‌رێ ما ئه‌م هه‌ژیتر نینین بیریا پێغه‌مبه‌ری بكه‌ین و حه‌ژێ بكه‌ین، و حه‌ژێكرنا پێغه‌مبه‌ری سلاڤێت خودێ ل سه‌ربن یا ب باوه‌ریێڤه گرێدایه دڤه‌گێرا بوخاریدا دبێژیت: (لا يُؤْمِنُ أَحَدُكُمْ حَتَّى أَكُونَ أَحَبَّ إِلَيْهِ مِنْ وَالِدِهِ وَوَلَدِهِ وَالنَّاسِ أَجْمَعِينَ) ئێك ژ هه‌وه دورستی باوه‌ریێ نائینیت هه‌تا ئه‌ز خوشتڤیتر نه بم بۆ وی ژ وی و دیبابێت وی و زاروكێت وی و ژ خه‌لكی هه‌میێ، ئها دڤێت حه‌ژێكرنا مه بۆ پێغه‌مبه‌رێ خوشتڤی سلاڤێت خودێ ل سه‌ربن، ب ڤی ره‌نگی بیت، دا به‌رێ خۆ بده‌ینێ كا صه‌حابان چاوا حه‌ژ پێغه‌مبه‌رێ خوشتڤی سلاڤێت خودێ ل سه‌ربن، دكرن سه‌عدێ كورێ ره‌بیعێ خه‌لكێ مه‌دینه‌یێ شه‌رێ ئوحدێ گران بریندار دبیت و دكه‌ڤیت، پێغه‌مبه‌رێ خوشتڤی سلاڤێت خودێ ل سه‌ربن، زه‌یدێ كورێ سابتی هنارت به‌رێ خۆ بده‌ته سه‌عدی كا چ لێ هاتیه، زه‌ید دبێژیت: ئه‌ز دناڤ كوژتیان گه‌ریام من سه‌عد بریندار دیت و برینا وی یا گرانه، و من دیت یێ د سه‌كه‌راتێدا، و حه‌فتێ برینان د ناڤبه‌را دربێت شیری و رومێ و تیرێ یێ بریندار بووی، من گۆتێ ها سه‌عد پێغه‌مبه‌ری سلاڤێت خودێ ل سه‌ربن سلاڤێت ل ته‌كرین، و دبێژیت: ئه‌و چاوا خۆ دبینیت؟ ئینا گۆت: وعلی رسولنا السلام وعلیك السلام، بێژێ هه‌ی پێغه‌مبه‌رێ خودێ ئه‌ز خۆ دبینم بێهنا به‌حه‌شتێ دهێته من، و بێژه مله‌تێ من خه‌لكێ مه‌دینه‌یێ هه‌وه چ هجه‌ت ل ده‌ف خودێ نینن ئێك ب گه‌هیته پێغه‌مبه‌رێ خودێ و چاڤێ ئێك ژ هه‌وه یێت زل بن، و گۆت: پشتی ڤێ چو به‌ر دلوڤانیا خودێ و گیانێ خۆ ژ ده‌ستدا.
نمونه‌یا دی ئه‌نه‌سێ كورێ مالكی خودێ ژێ رازی بیت، دبێژیت: رۆژا ئوحدێ خه‌لكێ مه‌دینه‌یێ تێك هاتن و تێك چون، گۆتن: پێغه‌مبه‌ر یێ هاتیه كۆژتن، هه‌تا ده‌نگێ گریا بلند ژ ره‌خێت مه‌دینه‌یێ زور بووی، ژنه‌ك ژ خه‌لكێ مه‌دینه‌یێ یا شیتكری ده‌ركه‌فت، پێشوازیا ته‌رمێ كورێ خۆ و بابێ خۆ و زه‌لامێ خۆ و برایێ خۆ كر، ئه‌ز نزانم كا به‌راهیكێ كیژ دیت، ده‌مێ ل به‌ر ئێك ژ وانرا بوری گۆت ئه‌ڤه كییه ؟ گۆتن بابێ ته و كورێ ته و برایێ ته و زه‌لامێ ته‌یه، گۆت: چ ل پێغه‌مبه‌ری هاتیه؟ وی چ كر؟ گۆتنێ: ئه‌و یێ ل به‌ر سینگێ ته، هه‌تا به‌رامبه‌ر پێغه‌مبه‌ری راوه‌ستیایی ره‌خێ عه‌بایێ وی گرت و گۆت: (بأبي أنت وأمي يا رسول الله لا أبالي إذ سلمت من عطب) باب دایكێت من گوری تی ببن، هه‌ی پێغه‌مبه‌رێ خودێ به‌س تو ژ نه‌خوشیێ یی ب سلامه‌ت بی من خه‌م نینه، ئها ب ڤی ره‌نگی حه‌ژ پێغه‌مبه‌رێ خوشتڤی دكرن سلاڤێت خودێ ل سه‌ربن.
نمونه‌یا دی زه‌یدێ كورێ دیثینه‌یه، بابكێ له‌حیان ژ هوزیلیان ئێخسیركر، و فروته خه‌لكێ مه‌كه‌هێ، صه‌فوانێ كورێ ئومه‌یه كری، و پێش بابێ خوڤه ئه‌وێ شه‌رێ به‌درێدا هاتیه كۆژتن، كوژت ده‌مێ سه‌رێ وی دانایه سه‌ر قنارێ؛ دا شیری ل سه‌رێ وی بده‌ن، ئه‌بو سوفیانی پسیاره‌كا عنتیكه لێ كر گۆتێ: ئه‌ز ته ب خودێ دده‌مه سویندێ، هه‌ی زه‌ید، ما ته ڤێ گاڤێ پێ خۆش نینه تو ل ناڤ مالا خۆ بای و مه‌حه‌ممه‌د جهێ ته‌با ئه‌م سه‌رێ وی ژێڤه‌كه‌ین، ئینا گۆت: ئه‌ز ب خودێ كه‌مه من پێ خۆش نینه موحه‌ممه‌د ل جهێ خۆ یێ نوكه لێ، ستریه‌ك بچیته بنێ پی ویرا، و ئه‌ز یێ رونشتیبم ناڤ مالا خۆ. ئها ئه‌ڤه‌یه حه‌ژێكرن، دڤێت یێ كوژتی بیت و ستری نه‌گه‌هیته پێغه‌مبه‌ری سلاڤێت خودێ ل سه‌ربن.
نمونه‌یا دی ثه‌وبان خزمه‌تكارێ پێغه‌مبه‌ری سلاڤێت خودێ ل سه‌ربن زێده حه‌ژ پێغه‌مبه‌رێ خوشتڤی دكر سلاڤێت خودێ ل سه‌ربن و بێهنا وی بێی وی نه‌دهات، رۆژه‌كێ هاته ده‌ف پێغه‌مبه‌ری سلاڤێت خودێ ل سه‌ربن ره‌نگێ وی یێ گوهری، و یێ له‌وازبووی، و خه‌ما ل سه‌ر ئاشكرایه، پێغه‌مبه‌ری سلاڤێت خودێ ل سه‌ربن گۆتێ ئه‌ڤه چ ره‌نگێ ته گۆهرییه؟! گۆت: یا پێغه‌مبه‌ری خودێ نه من زیانه‌ك هه‌یه و نه من ئێشه‌ك هه‌یه، به‌لێ ده‌مێ ئه‌ز ته نه‌بینم ئه‌ز ژ ته خه‌ریب دبم خه‌ریبه‌كا زێده و ناشكێت هه‌تا ئه‌ز ته دبینم، پاشی من هزرا ئاخره‌تێ كر، و ئه‌ز دترسم ئه‌ز ته ل وێرێ نه‌بینم؛ چونكی ئه‌ز دزانم تو دێ ل گه‌ل پێغه‌مبه‌ران بلندبی، و ئه‌ز هه‌كه بێمه به‌حه‌شتێ ژی، دێ جهێ من كێمتر و ئه‌ز ته نا بینم، و ئه‌گه‌ر ئه‌ز نه هێمه به‌حه‌شتێ ئه‌ڤه ئه‌ز ته هه‌ر و هه‌ر نابینم، ئینا خودایێ مه‌زن ئه‌ڤ ئایه‌ته ئینا خوارێ (وَمَن يُطِعِ اللَّهَ وَالرَّسُولَ فَأُوْلائِكَ مَعَ الَّذِينَ أَنْعَمَ اللَّهُ عَلَيْهِم مِّنَ النَّبِيِّينَ وَالصِّدِّيقِينَ وَالشُّهَدَآءِ وَالصَّالِحِينَ وَحَسُنَ أُولائِكَ رَفِيقاً ذالِكَ الْفَضْلُ مِنَ اللَّهِ وَكَفَى بِاللَّهِ عَلِيماً) ھه‌ر که‌سێ گوھدارییا خودێ و پێغه‌مبه‌ری بکه‌ت، ڤێجا ئه‌و ھه‌ڤالێت وانن یێت خودێ قه‌نجی د گه‌ل کرین ژ پێغه‌مبه‌ر و ڕاستگۆ و شه‌ھید و قه‌نجیکاران، و ئه‌ڤه چ خۆش ھه‌ڤالن.
ژ نیشانێت حه‌ژێكرنا پێغه‌مبه‌رێ خوشتڤی سلاڤێت خودێ ل سه‌ربن:
1 ـ ته حه‌ژ ژێكرنا وی پتر ژ خۆ و مالێ خۆ و مالا خۆ و دایبابێت خۆ و ژ مرۆڤان هه‌میان هه‌بیت، خودایێ مه‌زن دبێژیت: (قُلْ إِن كَانَ آبَاؤُكُمْ وَأَبْنَآؤُكُمْ وَإِخْوَانُكُمْ وَأَزْوَاجُكُمْ وَعَشِيرَتُكُمْ وَأَمْوَالٌ اقْتَرَفْتُمُوهَا وَتِجَارَةٌ تَخْشَوْنَ كَسَادَهَا وَمَسَاكِنُ تَرْضَوْنَهَا أَحَبَّ إِلَيْكُم مِّنَ اللَّهِ وَرَسُولِهِ وَجِهَادٍ فِي سَبِيلِهِ فَتَرَبَّصُواْ حَتَّى يَأْتِيَ اللَّهُ بِأَمْرِهِ وَاللَّهُ لاَ يَهْدِي الْقَوْمَ الْفَاسِقِينَ) بێژه: ئه‌گه‌ر بابێت هه‌وه و زارۆكێت هه‌وه و برايێت هه‌وه و ژنێت هه‌وه، و عه‌شيره‌تا هه‌وه و مالێ هه‌وه ب ده‌ست خۆڤه ئينايى، و بازرگانييا هوين ژێ بترسن بشكێت و نه‌چيت، و خانييێت هه‌وه پێ خۆش، ل ده‌ڤ هه‌وه شرينتر و خۆشتڤيتر بن ژ خودێ و پێغه‌مبه‌رێ وى و ژ جيهادا د ڕێكا خودێدا، ڤێجا خۆ بگرن هه‌تا فه‌رمانا خودێ دئێت، و خودێ ب خۆ مله‌تێ ژ ڕێ ده‌ركه‌ڤتى ڕاستهڕێ ناكه‌ت، قاضی عه‌یاض خودێ ژێ رازی بیت دبێژیت: ئه‌ڤ ئایه‌ته تنێ به‌سه ببیته به‌لگه و نیشان ل سه‌ر پیدڤیا حه‌ژێكرنا پێغه‌مبه‌ری سلاڤێت خودێ ل سه‌ربن.
2 ـ پێغه‌مبه‌ر سلاڤێت خودێ ل سه‌ربن بۆ وی ژ وی و دیبابێت وی و زاروكێت وی و ژ خه‌لكی هه‌میێ خوشتڤیتربیت، پێغه‌مبه‌ر سلاڤێت خودێ ل سه‌ربن دبێژیت: (لا يُؤْمِنُ أَحَدُكُمْ حَتَّى أَكُونَ أَحَبَّ إِلَيْهِ مِنْ وَالِدِهِ وَوَلَدِهِ وَالنَّاسِ أَجْمَعِينَ) ئێك ژ هه‌وه دورستی باوه‌ریێ نائینیت هه‌تا ئه‌ز خوشتڤیتر نه بم بۆ وی ژ وی و دیبابێت وی و زاروكێت وی و ژ خه‌لكی هه‌میێ.
3 ـ تو حه‌ژێكرنا خۆ بێخیه دگه‌ل حه‌ژێكرنا پێغه‌مبه‌ری سلاڤێت خودێ ل سه‌ربن و حه‌ژێكرنا پێغه‌مبه‌رێ خوشتڤی سلاڤێت خودێ ل سه‌ربن، ب وی ره‌نگی بیت یێ پێغه‌مبه‌ر سلاڤێت خودێ ل سه‌ربن پێ هاتی، پێغه‌مبه‌ر سلاڤێت خودێ ل سه‌ربن دبێژیت: (لا يؤمن أحدكم حتى يكون هواه تبعا لما جئت به) كه‌س ژ هه‌وه باوره‌ریێ نا ئینیت هه‌تا حه‌زا وی (دلێ وی و دلخازیا وی) ل دویف وێ نه‌بیت یا ئه‌ز پێ هاتیم هه‌لبه‌ت زانا نه‌وه‌وی خودێ ژێ رازی بیت ڤێ حه‌دیسێ د ئه‌ربه‌عینیا خۆدا دورست ددانیت.
4 ـ ژ نیشانێت حه‌ژێكرنێ ئه‌ڤه یه هه‌روه‌كی ئبن ره‌جه‌بێ حه‌نبه‌لی خودێ ژێ رازی بیت دبێژیت: هه‌رتشتێ پێغه‌مبه‌ر سلاڤێت خودێ ل سه‌ربن پێ هاتی وه‌رگری، و پێ رازی ببی، و كارپێ بكه‌ی، و ب جهـ بینی، و ژبلی رێكا وی چو رێكێت دی نه‌گری، و به‌رێ خۆ نه ده‌یه چ رێكێت دی، پاشی باش ل دویف رێكا وی بچی، و به‌ر فه‌رمانێت ویڤه یێ راوه‌ستیایبی، و تشتێ ئه‌م ژێ داینه پاش تو خۆ ژێ بده‌یه پاش، و پشته‌ڤانیا دینێ وی بكه‌ی، و ئه‌ڤه یا پێدڤییه؛ چونكی بێی ڤێ باوه‌ری دورستنابیت، و پاشی مرۆڤ باش و باش چاڤ ل پێغه‌مبه‌ری سلاڤێت خودێ ل سه‌ربن بكه‌ت، دهه‌می كاروبارێت ویدا، خۆ د خوارن و ڤه‌خوارنا ویدا ژی.
5 ـ ژ نیشانێت حه‌ژێكرنا پێغه‌مبه‌رێ خوشتڤی سلاڤێت خودێ ل سه‌ربن، ئه‌ڤه یه، كه‌سێت پێغه‌مبه‌ر حه‌ژێ بكه‌ت، ئه‌م حه‌ژ وان بكه‌ین، و هه‌كه راسته ئه‌م حه‌ژ پێغه‌مبه‌ری بكه‌ین سلاڤێت خودێ ل سه‌ربن دێ حه‌ژ وان كه‌ین یێت رێكا خودێ گرتین، و یێ حه‌ژ ئێكێ بكه‌ت حه‌ژ حه‌ژێكریێت وی ژی دكه‌ت؛ چونكی پێغه‌مبه‌ری سلاڤێت خودێ ل سه‌ربن حه‌ژ خه‌دیجایێ دكر خودێ ژێ رازی بیت، هه‌ر جارا تشته‌ك بۆ پێغه‌مبه‌ری سلاڤێت خودێ ل سه‌ربن هاتبا، دابێژیت: بۆ هه‌ڤالێت خه‌دیجایێ بهنێرن، ئبن ته‌یمیه خودێ ژێ رازی بیت دبێژیت: واجبه ل سه‌ر ھه‌ر موسلمانه‌کی ڤیانا وی و نه‌ڤیانا وی و پشته‌ڤانیا وی دویف فه‌رمانا خودێ و پێغه‌مبه‌رێ وی بیت، حه‌ژ وی بکه‌ت یێ خودێ و پێغه‌مبه‌ر حه‌ژێ دکه‌ن، و ئه‌و نه‌ڤێت یێ خودێ و پێغه‌مبه‌رێ وی نه‌ڤێت، و پشته‌ڤانیا وی بکه‌ت یێ پشته‌ڤانیا خودێ و پێغه‌مبه‌رێ وی دکه‌ن، و دژمنیا وی بکه‌ن یێ دژمنیا خودێ و پێغه‌مبه‌رێ وی دکه‌ن.
6 ـ ژ نیشانێت حه‌ژێكرنا پێغه‌مبه‌رێ خوشتڤی سلاڤێت خودێ ل سه‌ربن، ئه‌ڤه یه، نه‌ڤیانا وان كه‌سان بكه‌ی ئه‌وێت نه‌ڤیانا پێغه‌مبه‌ری هه‌ی سلاڤێت خودێ ل سه‌ربن یان یا موسلمانان خۆ چه‌ندێت نێزیكی ته بن ژی، خودایێ مه‌زن دڤێ چه‌ندێدا دبێژیت: (لاَّ تَجِدُ قَوْماً يُؤْمِنُونَ بِاللَّهِ وَالْيَوْمِ الاٌّ خِرِ يُوَآدُّونَ مَنْ حَآدَّ اللَّهَ وَرَسُولَهُ وَلَوْ كَانُواْ ءَابَآءَهُمْ أَوْ أَبْنَآءَهُمْ أَوْ إِخْوَانَهُمْ أَوْ عَشِيرَتَهُمْ أُوْلائِكَ كَتَبَ فِى قُلُوبِهِمُ الإِيمَانَ وَأَيَّدَهُمْ بِرُوحٍ مِّنْهُ وَيُدْخِلُهُمْ جَنَّاتٍ تَجْرِى مِن تَحْتِهَا الأنْهَارُ خَالِدِينَ فِيهَا رَضِىَ اللَّهُ عَنْهُمْ وَرَضُواْ عَنْهُ أُوْلائِكَ حِزْبُ اللَّهِ أَلاَ إِنَّ حِزْبَ اللَّهِ هُمُ الْمُفْلِحُونَ) نینه ھنده‌ک باوه‌ریێ ب خودێ و رۆژا قیامه‌تێ بینن، و حه‌ژ وان بکه‌ن ئه‌وێت نه‌یاره‌تی و دژمناتیا خودێ و پێغه‌مبه‌رێ وی دکه‌ن، خۆ ئه‌گه‌ر ئه‌و باب و باپیرێت وان بن، یان زاڕۆکێت وان بن، یان برایێت وان بن، یان عه‌شیره‌تا وان بیت، ئه‌ڤان خودێ باوه‌ریا د دلێت واندا نڤێسی و بنه‌جھکری، و ب ھاریکاری و پشته‌ڤانی و سه‌رکه‌فتنا خۆ ئه‌و یێت ب ھێز ئێخستین، و دێ وان به‌ته به‌حه‌شتێت رویبار د بنڕا دچن و ھه‌روھه‌ر دێ تێدا بن، خودێ ژ وان رازی بوو و ئه‌و ژی ژ خه‌لاتێ خودایێ خۆ رازی بوون، و ئه‌ڤه کۆما خودێنه و باش بزانن یێت سه‌رفه‌راز ھه‌ر کۆما خودێنه.
