ب : یێ موسلمان بیت دڤێت خه‌ما دینێ پێغه‌مبه‌رێ خوشتڤی سلاڤێت خودێ ل سه‌ربن، بخوت و به‌لاڤكه‌ت، و پشته‌ڤانی و پشتگریا دینێ خۆ بكه، و ب سه‌ر بێخی، و دڤێت ئه‌م بزانین به‌لاڤكرن و پشته‌ڤانیكرن و بانگه‌وازیا دینێ خودێ سه‌رفه‌رازی و په‌رستنه، و قه‌در و عیباده‌ته، و ئه‌رك و واجبه ل سه‌ر هه‌ر موسلمانه‌كێ، بێژیت ئه‌ز موسلمانم، و ئه‌ڤه ژ ژن مێران بێ فه‌رق و جوداھی دگریت، ب راستی ئێك ژ ئه‌ركێت زێده یێت مه‌زن ل سه‌ر مه ئه‌ڤه‌یه ئه‌م خه‌ما دینێ خودێ، بخوین ئه‌و دینێ پێغه‌مبه‌ری سلاڤێت خودێ ل سه‌ربن هنده ئه‌زیه‌ت و نه‌خوشی وی و هه‌ڤال و هوگرێت وی ل سه‌ر خارین، و ب پارێزین و به‌لاڤكه‌ین و هوكارێت هاریكاربین دا ئه‌ڤ دینه هه‌ر یێ سه‌رفه‌راز و عه‌زیز بیت، هه‌ر ئێك ژ مه كا چ پێ چێدبیت دڤێت وێ بكه‌ت، كتێبێت دیروكێ بۆ مه ناڤێ (120) سه‌د و بیست هزار هه‌ڤال و هوگرێت پێغه‌مبه‌ری یێت نڤیسینه، ژ ڤێ هژمارێ تو ژیانناما كێ بخوینی، چ ژن چ زه‌لام، هه‌میان خه‌مخوارن و به‌لاڤه‌كرن و پشته‌ڤانیكرن و پشتگیریكرن و سه‌ر ئێخستنا دینی ددیت ل سه‌ر ئه‌رك و واجبه، و پێدڤییه هه‌میان ددیت ل سه‌ر پێدڤیه خه‌ما دینێ خۆ بخوت، و ملێ خۆ ب جانێ خۆ و ب مالێ خۆ و ب هه‌ر تشتێ پێ چێببیت ب ده‌ته به‌ر، له‌وا ژ ڤێ هه‌ژمارێ سێكا وان ژی ل مه‌دینه‌یێ نه‌مرن، و گورێ هه‌رئێكێ ل جهه‌كێیه و گۆرێت وان ل جیهانێ هه‌میێ یێت به‌لاڤ بووین، و هه‌ر ئێك ل ولاته‌كێ شه‌هید بوو یان ل وه‌لاته‌كێ بۆ به‌لاڤكرنا دینێ خۆ چو به‌ر دلوڤانیا خودێ، سه‌عه‌ت و گاڤا ئێكێ تێدا موسلمان دبوون دزانین ئه‌ڤه ئه‌رك و واجبه ل سه‌ر وانا ئه‌و خه‌ما دینێ خۆ بخون و دینی بۆ خۆ بكه‌ن خه‌ما ئێكێ و بكه‌نه دوزا خۆ كا چاوا خه‌ما پێغه‌مبه‌ری بوو سلاڤێت خودێ ل سه‌ربن، دوو نمونه‌یان تنێ دێ بۆته ئینم دا بزانی كا یێ موسلمان دبوو چاوا هه‌ر گاڤا ئێكێ خه‌ما وی ئه‌ڤه بوو:
1 ـ ئه‌ڤه طوفه‌یلێ كورێ عه‌مرێ ده‌وسییه، دهێته مه‌كه‌هێ قوره‌یشی د چنه به‌راهیكا ویدا، و ژ پێغه‌مبه‌ری د ترسنن، و دبێژنێ، هشیار بی نێزیك نه‌بی، و گوهێ خۆ نه ده‌یێ، ئه‌گه‌ر دێ ته سه‌ردابه‌ت، دبێژیت چه‌ند رۆژه‌كان من په‌نبی كره دگۆهێت خۆرا؛ دا من گۆل پێغه‌مبه‌ری نه‌بیت، هه‌تا من بۆ خۆ گۆتی ئه‌ڤه چیه ئه‌ز دكه‌م؟!! ما ئه‌ز هندێ تێنه‌گه‌هشتیمه ئه‌ز ب ئاخفتنا نه هه‌ژی سه‌ردابچم؟!! ئه‌ز چومه ده‌ف پێغه‌مبه‌ری بۆ من سوره‌تا ئیخلاص خاند ئه‌ز موسلمان بووم، ئێكسه‌ر گۆتێ: هه‌ی پێغه‌مبه‌رێ خودێ ده‌ستویریی بده من ئه‌ز بچمه دناڤ عه‌شیره‌تا خۆدا دینێ ته به‌لاڤ بكه‌م.
2 ـ ئه‌ڤه مرۆڤه‌كێ دییه، هند دوژمنێ پێغه‌مبه‌رییه، دبێژنێ شه‌یتانێ قوره‌یشی، ئه‌و ژی عومه‌یرێ كورێ وه‌هبییه، وی و صه‌فوانێ كورێ ئومه‌ی نه‌خشه‌ك گێرا كو بێته مه‌دینه‌یێ و و كه‌سێ های ژێ نه پێغه‌مبه‌ری ب كۆژیت، به‌لێ نه‌زانی ئێكسه‌ر روینشتنا وان ل وێرێ بۆ پێغه‌مبه‌رێ خوشتڤی سلاڤێت خودێ ل سه‌ربن، هاته ڤه‌گوهازتن، پشتی هاتیه مه‌دینه‌یێ، موسلمان لێ ب گومان كه‌فتن، ئینا گرت و گرێدا، پێغه‌مبه‌ر سلاڤێت خودێ ل سه‌ربن هات، پسیار ژێ كر كا هاتیه چ؟ چ ل سه‌ر خۆ ئاشكرا نه‌كر كو بو خرابیه‌كێ یێ هاتی، ئینا پێغه‌مبه‌ری سلاڤێت خودێ ل سه‌ربن گۆتێ ئه‌ز دێ بۆ ته بێژم، كا تو بۆ چ هاتی، و كا چ د ناڤبه‌را ته و صه‌فوانی رویدایه، سه‌رهاتی هه‌می بۆ ڤه‌گێرا، و پێغه‌مبیری ژێ خوازت موسلمان ببیت، گۆت: ئه‌ز موسلمان نابم، به‌لێ ل گه‌ل هندێ ژی پێغه‌مبه‌ری سلاڤێت خودێ ل سه‌ربن ڤه‌كر و ئازادكر، ده‌مه‌كێ چو و پاشی زڤریڤه و گۆت: ( اشهد ان لا اله الا الله واشهد ان محمدا عبده ورسوله) ئینا پێغه‌مبه‌ری سلاڤێت خودێ ل سه‌ربن گۆتێ: باشه بوچی تو بۆ جارا ئێكێ موسلمان نه دبووی؟ ئینا گۆت: ئه‌ز هنگی ئێخسیر بووم، و هه‌كه ئه‌ز هنگی موسلمان ببام؛ دا بێژن د ترساندا یێ موسلمان بوی، پشتی موسلمان بووی ئێكسه‌ر گۆته پێغه‌مبه‌ری، هه‌ی پێغه‌مبه‌رێ خودێ ده‌ستویریا من بده ئه‌ز ب زڤرمه‌ڤه مه‌كه‌هێ و بانگه‌وازیا ده‌ینێ ته بكه‌م، و گازیا ته به‌لاڤ بكه‌م كه‌س دناڤ واندا نه مایه بانگه‌وازیا دینێ ته بكه‌ت، به‌رێ خۆ بدێ گاڤا ئه‌و موسلمان بووی زانی پێدڤیه ئه‌و ملێت خۆ بده‌ته به‌ر ڤی دینی، و دینێ پێغه‌مبه‌رێ خوشتڤی سلاڤێت خودێ ل سه‌ربن، ب سه‌ربێخیت و جهه‌كێ ب ترسی هه‌لبژارت، بێته د ناڤ قوره‌یشیاندا بانگوازیا دینێ خودێ بكه‌ت، و چ بێته سه‌ری خه‌م نینه، خودایێ مه‌زن دبێژیت: (إِنَّآ أَرْسَلْنَاكَ شَاهِداً وَمُبَشِّراً وَنَذِيراً لِّتُؤْمِنُواْ بِاللَّهِ وَرَسُولِهِ وَتُعَزِّرُوهُ وَتُوَقِّرُوهُ وَتُسَبِّحُوهُ بُكْرَةً وَأَصِيلاً) ب ڕاستی مه تو یێ ھنارتی، ببییه شاھد و مزگینئین و ئاگه‌ھدارکه‌ر، دا ھوین [گه‌لی مرۆڤان] باوه‌رییێ ب خودێ و پێغه‌مبه‌رێ وی بینن، و دا ھوین ھاریکارییا پێغه‌مبه‌رێ وی بکه‌ن و دا ب ڕێز و ڕویمه‌ت به‌رێ خۆ بده‌نێ، و دا سپێده و ئێڤاران [ئانکو ھه‌می ده‌مان ب په‌رستنا خۆ] خودێ ژ کێماسییان پاقژ بکه‌ن، ڤیجا پێدڤیه ئه‌م بۆ پێغه‌مبه‌رێ خوشتڤی سلاڤێت خودێ ل سه‌ربن میراتگرێت باش بین بۆ و دینێ وی ئه‌مه‌نات وه‌رگرین و بزانین، و ب جوانی ب ده‌ینه ناڤ ده‌ستێت دویف خۆرا و یێت دویف مه‌را دهێن، كا چاوا مه ژ یێت به‌ری خۆ وه‌رگرتییه.
