ب : دڤێت ئه‌م به‌رده‌وام و هه‌می ده‌ماندا ب رێز و رویمه‌ت به‌رێ خۆ بده‌ینه پێغه‌مبه‌رێ خوشتڤی سلاڤێت خودێ ل سه‌ربن، و پێغه‌مبه‌ر ل ده‌ف مه یێ مه‌زن بیت، چاوا ئه‌و سه‌ردارێ هه‌می پێغه‌مبه‌رانه و دوماهیكێ وانه و پێغه‌مبه‌رێ مرۆڤ و ئه‌جه‌نه‌یانه و یێ ره‌ش و سپیانه و هه‌می جیهانێ بێ جوداهی، و ژ نیشانێت رێزگرتنێ ئه‌ڤه‌یه:
ئه‌م ب هه‌می تور و ره‌وشت گوهدانا فه‌رمان و فه‌رموده‌یا وی بكه‌ین، و نه‌زڤرینین، و كار پێ بكه‌ین، و ب فه‌رمانا وی پێگیر بین، و گۆهدانا ب رێز و حورمه‌ت بۆ حه‌دیسێت وی و گۆتنێت وی بكه‌ین، و فه‌رمانا وی ب دله‌كێ رازی وه‌رگرین، و دلته‌نگی بۆ مه به‌رامبه‌ر فه‌رمانا وی دورست نه‌بیت، و ئه‌ڤه تنێ به‌س نینه دڤێت دیفرا فه‌رمان و بریارا وی ب جھـ بینین، و ژ رێزگرتنێیه ناڤێ وی ساده نه ئینم، و ده‌مێ ناڤێ وی دهێت، سلاڤ و سه‌له‌واتێت هه‌ژی ب ده‌مه سه‌ر، كورت كرمانج به‌رزراگرتن ئه‌ڤه‌یه فه‌رمانێت وی ب جهـ بینم و نه زڤرینم و نه ده‌مه سه‌ر.
به‌رێ خۆ بدێ كا صه‌حابان ب چ ره‌نگ و ب چ چاڤ به‌ری خۆ ددانه پێغه‌مبه‌رێ خوشتڤی سلاڤێت خودێ ل سه‌ربن.
ـ ئه‌ڤه عه‌روه‌یێ كه‌رێ مه‌سعودێ سه‌قه‌فییه، سالا حوده‌یبییێ هاته ده‌ف پێغه‌مبه‌ری پشتی ئه‌و هه‌ڤالێت وی دیتن كا چاوا رێزگرتنێ و حورمه‌تێ دده‌نێ، پشتی زڤرییه‌ڤه ده‌ف قوره‌یشیان گۆت: گه‌لو ب سویند ئه‌ز یێ چویمه ده‌ف شاھ و میر و خویندكار و مه‌لكان، قه‌یصه‌ری و كیسرا و نه‌جاشی، ئه‌ز ب خودێ كه‌م من چۆ خویندكار نه‌دیتینه هاڤالێت وی، وی هند ب رێز و ریمه‌ت ب دانن، وه‌كی هه‌ڤالێت مه‌حه‌ممه‌دی موحه‌ممه‌دی مه‌زن ددانن، ئه‌ز ب خودێكه‌م هه‌كه تفكر، تفا وی نا كه‌ڤیته عه‌ردی، و دكه‌ڤیته ده‌ستێت ئێك ژ زاندا له‌شێ خۆ دده‌ن، و ئه‌گه‌ر فه‌رمانا وان كر ب له‌ز دویف فه‌رمانا وی دهێن، و ئه‌گه‌ر ده‌ستنڤێژا خۆ شویشت شه‌ری ل سه‌ر ئاڤا وی دكه‌ن، و هه‌كه ئاخفت هه‌می خۆ بێ ده‌نگ دكه‌ن، وراست راست كه‌س ژ وان به‌رێ خۆ نا ده‌نێ هندی هند د چاڤێت واندا یێ مه‌زنه.
عومه‌رێ كورێ مه‌یمونی دبێژیت ساله‌كێ ئه‌ز مامه ده‌ف عه‌بدوللاهێ كورێ مه‌سعودی، رۆژه‌كێ ژی من گۆلێ نه‌بوو ئاخفتنه‌كا پێغه‌مبه‌ری سلاڤێت خودێ ل سه‌ربن گۆتبا هه‌كه خوھ تێدا نه‌هاتیا خوارێ و رهێت ستویێ وی سورنه‌ببان و چاڤێت وی تژی روندك نه‌ببان، ئها ب ڤی ره‌نگی پێغه‌مبه‌ر سلاڤێت خودێ ل سه‌ربن د چاڤاندا یێ مه‌زن بوو.
عه‌مرێ كورێ عاصی خودێ ژێ رازی بیت دبێژیت: كه‌س ژ پێغه‌مبه‌رێ خودێ بۆ من خوشتڤیتر نه بوو و د چاڤێت مندا مه‌زنتر نه بوو، ئه‌ز نه‌دشیام چاڤێت خۆ ژبه‌ر مه‌زناتیا وی ژ دیتنا وی تێركه‌م، و ئه‌گه‌ر پسیارا من بێته‌كرن ئه‌ز سالوخه‌تا وی بكه‌م، ئه‌ز نه‌شێم؛ چونكی من چاڤێت خۆ ژ وی تێرنه‌دكرن.
زانایێت مه‌ژی هه‌ر دهوسا بوون، ئه‌ڤه عه‌بدولره‌حمانێ كورێ قاسمیه هه‌رده‌مێ به‌حسێ پێغه‌مبه‌رێ خوشتڤی سلاڤێت خودێ ل سه‌ربن، ل ده‌ف هاتبا كرن، ره‌نگێ وی دگۆهری، دا تو بێژی خوین د له‌شێ ویدا نه‌ما و ئه‌زمانێ وی د ده‌ڤێ ویدا هشك دبوو ژ به‌ر مه‌زناتیا پێغه‌مبه‌ری سلاڤێت خودێ ل سه‌ربن.
ئه‌ڤه ئیمام مالكه پسیار ژێ هاته‌كرن كه‌نگی ته گۆهدانا ئه‌یوبێ سه‌ختیانی كر و حه‌دیس ژێ وه‌رگرتن گۆت: دوو حه‌جان من دیت، من ژ دیر به‌رێ خۆ دایێ، من ژێ وه‌رنه‌دگرتن، به‌لێ هه‌رده‌مێ ناڤێ پێغه‌مبه‌ری سلاڤێت خودێ ل سه‌ربن دهات هند دكره گری هه‌تا دلێ من ما دپێڤه و دلێ من پێ دسۆت، ڤێجا ده‌می من ئه‌ڤه ژێ دیتی یا من ژێ دیتی، و مه‌زن راگرتنا وی بۆ پێغه‌مبه‌ری، من گۆهدانا وی كر و حه‌دیس ژێ وه‌رگرتن.
ئه‌ڤه موصعه‌بێ كورێ عه‌بدولایه خودێ ژێ رازی بیت دبێژیت: ده‌مێ ئیمام مالك ناڤێ پێغه‌مبه‌ری سلاڤێت خودێ ل سه‌ربن دئینا ره‌نگی وی دگهۆری و خار دبوو هه‌تا ئه‌ڤه ل سه‌ر هه‌ڤالێت وی گران دبوو، روژه‌كێ گۆتنێ ئه‌ڤه چ ل ته دهێت؟! گۆت: هه‌كه ئه‌ڤا من دیتی هه‌وه دیتبا هه‌وه ئه‌ڤه نه‌دورست ژ من نه ددانا، ب خودێ من موحه‌مه‌دێ كورێ مونكه‌دری دیت و ئه‌و سه‌رپشكێ قورئان خوینان بوو، و مه پسیارا چ حه‌دیسان چ جارا ژێ نه‌دكر هه‌كه هند نه‌كربا گری دلێ مه ما با پێڤه، و من جه‌عفه‌رێ كورێ موحه‌ممه‌دێ ددیت گه‌له‌كێ ب گرنژین و ترانه‌كه‌ر، به‌لێ ده‌مێ ناڤێ پیغه‌مبه‌ری سلاڤێت خودێ ل سه‌ربن د هاته ئینان، ره‌نگێ وی زه‌ر دبوو و چ جاران بێ ده‌ستنڤێژ حه‌دیسێت پێغه‌مبه‌ری سلاڤێت خودێ ل سه‌ربن نه دگۆتن، و ب سویند عه‌بدولره‌حمانێ كورێ قاسمی به‌حسێ پێغه‌مبه‌ری سلاڤێت خودێ ل سه‌ربن دكر، دا به‌رێ خۆ ده‌یه ره‌نگێ وی سور دبووهه‌ر وه‌كی خوین یا ژێ ده‌ردكه‌ڤیت، و ئه‌زمانێ وی د ده‌ڤێ ویدا هشك دبوو، و ئه‌ز دهاتمه ده‌ف عامرێ كورێ عه‌بدوللاهێ كورێ زوبه‌یری هه‌كه ناڤێ پێغه‌مبه‌ری سلاڤێت خودێ ل سه‌ربن ل ده‌ف هاتبا هند دكره گری هه‌تا رۆندك د چاڤندا هشك ببان، و ب سویند من زوهری دیت و ژ هه‌میان ڤه‌كری و نیزیكرتر بوو و هه‌كه ناڤێ پێغه‌مبه‌ری سلاڤێت خودێ ل سه‌ربن ل ده‌ف هاتبا وه‌لێ دهات هه‌روه‌كی تو نه‌نیاسییه و ته نه نیاسییه، و ب سویند ئه‌ز د هاتمه ده‌ف صه‌فوانێ كورێ سه‌لیمی و ژ مروڤیت عیباده‌تكر و دیندار بوو، و هه‌كه ناڤێ پێغه‌مبه‌ری سلاڤێت خودێ ل سه‌ربن ل ده‌ف هاتبا، دگری و گریا خۆ درێژ دكر، هه‌تا ئه‌و خه‌لكی ل ده‌ف روینشتی رادبوون و دهێلان .
یا ئاشكرابوو ل ده‌ف زانایان به‌رزراگرتنا پێغه‌مبه‌ری سلاڤێت خودێ ل سه‌ربن هه‌تا پشتی مرنا وی ژی وه‌كی به‌رزراگرتنا ویه دساخیا ویدا، ده‌نگێ خۆ ل مزگه‌فتا وی بلند نه‌دكرن ژ رێزگرتن و مه‌زن راگرتنێ به‌لكی هنده حه‌دیس زانا ژ تابعینان ده‌نگ بلندیا د جڤاتا حه‌دیسیدا وه‌كی ده‌نگ بلندیا به‌رامبه‌ری وی ددیت؛ چونكی ئاخفتن ئاخفتنا وییه، حه‌ممادێ كورێ زه‌یدی دبێژیت: ئه‌م ل ده‌ف ئه‌یوبێ سه‌ختیانی بووین، گۆل ده‌نگ بلندیه‌كێ بوو گۆت: ئه‌ڤه چ ده‌نگ بلندییه؟ ئه‌رێ ما نه گه‌هشتیه وان ده‌نگی بلندی ل گه‌ل ئاخفتنا پێغه‌مبه‌ری سلاڤێت خودێ ل سه‌ربن وه‌كی ده‌نگ بلندكرنێیه ل سه‌ر وی دژیانا ویدا، ئه‌بو سه‌له‌مه‌یێ خوزاعی دبێژیت هه‌كه ئیمام مالك ڤیابا بۆ حه‌دیس گۆتنێ ب رونیته خارێ، دا باش كارێ خۆ كه‌ت و ده‌ستنڤێژا خۆ شوت و جلكی ژ هه‌میان جانتر كه‌ته به‌رخۆ و رهێت خۆ شه‌كه‌ت و بهێن خوشیێ ل خۆ كه‌ت و كولاڤێ خۆ كه‌ته سه‌رێ خۆ، پسیار ژ ڤێ ژێ هاته كرن گۆت: ئه‌ز حورمه‌تی دده‌مه حه‌دیسا پێغه‌مبه‌ری، هه‌تا جاره‌كێ به‌ر جڤاتگه‌ها ئه‌بی حازمیرا بوری و وی حه‌دیس دگۆتن، ئیمام مالك لێ بوری، پسیار ژێ هاته كرن بوچی ته گۆهدانا حه‌دیسێ نه دكر؟! گۆت من چ جهێت روینشتنێ نه دیتن، و من نه دڤیا ئه‌ز حه‌دیسێ شپیانڤه وه‌رگرم، و موحه‌ممه‌دێ كورێ سیرینی دكره كه‌نه ده‌مێ دئاخفت، به‌لێ هه‌كه حه‌دیسا پێغه‌مبه‌ری سلاڤێت خودێ ل سه‌ربن هاتبا، دترسیا و بێ ده‌نگ دبوو، و ژ سه‌عیدێ كورێ موسیه‌بی هاتیه ڤه‌گوهازتن یێ نه خوش بوو و یێ درێژكری بوو، پسیارا حه‌دیسه‌كێ لێ هاته كرن، رابوڤه و گۆت، یێ پسیار كری گۆتێ: من حه‌زدكر تو نه راببای تو یێ نه‌ساخی، گۆت: من نه‌دڤیا ئه‌ز ئاخفتنا پێغه‌مبه‌ری بێژم و ئه‌ز یێ درێژكری، و ژ ریزگرتن و حورمه‌تگرتنا پێغه‌مبه‌رێ خوشتڤی سلاڤێت خودێ ل سه‌ربن، ئمام مالك ل مه‌دینه‌یێ ب ده‌وارا نه دهات و دچو؛ چونكی پێغه‌مبه‌ر سلاڤێت خودێ ل سه‌ربن پیان ل رێكیت مه‌دینه‌یێ یێ هاتی و چوی، و نه دڤیا سمێت ده‌وارێ وی ب كه‌ڤنه جهێ پێت پێغه‌مبه‌ری سلاڤێت خودێ ل سه‌ربن.
