ب / خواندنا كتێبا غێر ئايين، ڤێجا ئەڤ كتێبە ئەو بن ئەوێت ل دەف وان پيرۆز وەكى تەوراتێ و ئنجيلێ، يان ژى هەر كتێبەكا بيت ل سەر ئايينێ وان دورستە، بەلێ پشتى باش د كتێبا خۆدا كو قورئانا پيرۆزە شارەزا دبى و باش تێدگەهى و د ئيسلاما خۆدا شارەزا دبى و باش تێدگەهى، دا خواندنا وان كتێبان چو كارتێكرنا خراب د تەدا نەكەت و هزروبيرێت تە تێك نەچن، و هەر ژبەر هندێ ژى پێغەمبەرێ مە يێ خۆشتڤى (سلاڤێت خودێ لێ بن) دەمێ پەرەكێ تەوراتێ د دەستێ عومەرێ كورێ خەتابيدا (خودێ ژێ رازی بیت)، ديتى، گۆتێ: ((ئەو چيە)) و پشتى بەرسڤا پێغەمبەرێ خۆشتڤى (سلاڤێت خودێ لێ بن) داى، پێغەمبەرێ خۆشتڤى (سلاڤێت خودێ لێ بن) پێ نەخۆش بوو و گۆت: ((ئەز ب وى كەمە يێ روحا من د دەستيدا هەكە مووسا يێ ساخ با بۆ وى نەدبوو ژبلى ئەو گوهداريا من بكەت و دويف من بهێت)). هەلبەت ئەڤە ل وى دەمى بوو هێژ وەحى دهاتە خوارێ و تمام نەببوو، و پەيام ب دويماهى نەهاتبوو، و هەر ژبەر هندێ؛ دا وەحى پاقژ بمينيت و چو دگەل تێكەل نەبيت، پێغەمبەرێ خۆشتڤى (سلاڤێت خودێ لێ بن) دەستپێكێ هەتا نەهێلا حەديس ژى بێتە نڤێسين، و دگۆتە هەڤالێت خۆ: ((چو تشتان ژ من ژبلى قورئانێ نەنڤێسن، و هەر ئێكێ تشتەكێ دى ژبلى قورئانێ نڤێسى بيت بلا ژێ ببەت))، زانايێت مە دبێژن: مەخسەدا پێغەمبەرێ خۆشتڤى (سلاڤێت خودێ لێ بن) ئەو بوو دا قورئان و حەديس تێكەل نەبن، ڤێجا هەكە مرۆڤ د دينێ خۆدا يێ شارەزابيت قەيدى نينە د ئايينێت ديدا ژى شارەزا ببيت، بەلێ هەكە د دينێ خۆدا يێ نەزان بيت نەباشە وان كتێبان بخوينيت، و ئەڤە وەكى ياسايەكێ بوو د شارستانيەتا ئيسلامێدا دەمێ د تشتێ خۆماليدا شارەزا دبوون بەرێ خۆ ددانە رەوشەنبيريا غەيرى خۆ وەكى يا ئەغريقى و فارسى و يونانى و رۆمانى و هندى و ...هتد.
و ل سەر فرۆتن و كرينا ڤان پەرتۆكان ل سەر ئنيەتا مرۆڤى دمينيت، هەكە مرۆڤ بزانيت ئەوێت دكرن پێ ناهێنە خاپاندن و د دينێ خۆدا د شارەزانە و دڤێت تشتەكى ژ دينێ غەيرى خۆ ژى بزانن.. چو دكرين و فرۆتنا واندا نينە، و خودێ چێتر دزانيت.
