ب / راستە دەرمانكرن و وەرگرتنا دەرمانا شەنگستەكێ سەرەكيە د ئيسلامێدا، و ئيسلامێ بەرێ مە يێ دايە وەرگرتنا دەرمانا و چارەسەركرنا ئێشان، بەلێ پێدڤيە مرۆڤ وان رێكان بگريت ئەوێت شەرعى و دورست و زانستى، و رێكا نڤشتۆكان ئەبەد نەيا شەرعيە و نەيا دورستە، و يێ ب دورستى موسلمان بيت و باوەريەكا راست و دورست ب پێغەمبەرێ خۆشتڤى (سلاڤێت خودێ لێ بن) هەبيت باوەريا خۆ ب نڤشتۆكان نائينيت و بەرێ كەسێ ژى نادەتێ، چونكى پێغەمبەرێ خۆشتڤى (سلاڤێت خودێ لێ بن) د راستا وى يێ نڤشتۆك هەلدگردا دبێژيت: (من عَلَّقَ تَمِيمَة فَقَدْ اشرك)، هەركەسێ نڤشتۆكەكێ هەلگريت وى شريك بۆ خودێ چێكر، كۆمەكا مرۆڤان هاتنە دەف پێغەمبەرێ خۆشتڤى (سلاڤێت خودێ لێ بن) دا سۆز و پەيمانان بدەنێ و ئيسلاما خۆ ئاشكراكەن، پێغەمبەرێ خۆشتڤى (سلاڤێت خودێ لێ بن) چۆ دەستێ هەميان ئێك تێ نەبيت ئەو ژى چونكى نڤشتۆكەك ب زەندكا ويڤە بوو، و پێغەمبەرێ خۆشتڤى (سلاڤێت خودێ لێ بن) نەچۆ دەستێ وى هەتا نڤشتۆك ژ دەستێ خۆ نەڤەكرى، عەبدوللايێ كورێ مەسعودى (خودێ ژێ رازی بیت)، نڤشتيەك ب ستۆيێ كابانيا خۆڤە ديت ب خورتى كێشا و ژێڤەكر و گۆت: ئبن مەسعود و خەلكێ مالا وى منەت ب نڤشتيا نينە.
و هنديكە مانا خدر پێغەمبەرى ژى (سلاڤێت خودێ لێ بن) ب راستى چو بەلگە و نيشانێت دورست بۆ نينن، و هەر حەديسەكا ل سەر مانا وى هاتبيت درەون و چو بنيات بۆ نينن، هەروەكى مەنناوى و ئبن حەجەر و سەخاوى و حاكم و دارەقوتنى ڤێ دبێژن. و هەكە مابا ژى ڤيابا هاتبا دەف پێغەمبەرێ مە يێ خۆشتڤى (سلاڤێت خودێ لێ بن) و باوەرى پێ ئينابايە و جيهاد دگەل كربايە و ئەڤە نەچێ بوويە، ئەڤە رامانا وێ ئەوە نەيێ ساخە، و خودێ مەزن د راستا هەمى پێغەمبەراندا بێى ئێكى ڤەدەركەت دبێژيت: ((وَإِذْ أَخَذَ اللَّهُ مِيثَاقَ النَّبِيِّينَ لَمَا آتَيْتُكُمْ مِنْ كِتَابٍ وَحِكْمَةٍ ثُمَّ جَاءَكُمْ رَسُولٌ مُصَدِّقٌ لِمَا مَعَكُمْ لَتُؤْمِنُنَّ بِهِ وَلَتَنْصُرُنَّهُ قَالَ أَأَقْرَرْتُمْ وَأَخَذْتُمْ عَلَى ذَلِكُمْ إِصْرِي قَالُوا أَقْرَرْنَا قَالَ فَاشْهَدُوا وَأَنَا مَعَكُمْ مِنَ الشَّاهِدِينَ)) ئانكو: بيننە بيرا خۆ هەى خودانێت كتێبان (مەخسەد جوهى و فەلە)، دەمێ خودێ پەيمانا موكومكرى ژ پێغەمبەران ستاندى، ئەگەر من كتێب و پێغەمبەراتيەك دا هەوە، پاشى پێغەمبەرەك بۆ هەوە هات، ئەو تشتێ من دايە هەوە راست دەرئێخست، هوين دێ باوەريێ پێ ئينن، و پشتەڤانيا وى كەن. خودێ گۆتە وان: هەوە پەسند كر ئەڤا من گۆتى و هەوە ل سەر هندێ پەيمانا من قەبوولە؟ گۆتن: بەلێ مە پەسند كر، خودێ گۆت: پا شاهد بن ئەز ژى دگەل هەوە ل سەر پەسندكرن و قايلبوونا هەوە و شادەييا هەوە ژ شاهدانم.
ڤێجا هەچيێ پاشى رويێ خۆ ژ ڤێ پەيمانێ وەرگێريت و پەيمانێ بشكێنيت و باوەريێ ب تە نەئينيت، ب راستى ئەو ژ رێدەركەفتى و پشتەرێيانە. و ب راستى نەهاتيە زانين هاتبيتە دەف پێغەمبەرى(سلاڤێت خودێ لێ بن) يان جيهاد دگەل كربيت، و هەكە هاتبا دا پێغەمبەرێ خۆشتڤى (سلاڤێت خودێ لێ بن) ژێ خەبەردەت، و خۆ هەكە ل سەردەمێ پێغەمبەرێ مە (سلاڤێت خودێ لێ بن) يێ ساخ ژى بيت نوكە هەر نەمايە، چونكى پێغەمبەرێ خۆشتڤى (سلاڤێت خودێ لێ بن) پشتى نڤێژەكا عەيشا كرى زڤرى بەرێ خۆ دا سەحابان (خودێ ژ وان هەميان رازى بيت) و گۆت: پشتى سەد سالێت دى كەسەكێ ئەڤرۆ يێ ساخ ل سەر رويێ عەردى نامينيت، ڤێجا هەر ئاخفتنەكا ل سەر مان و ژيانا خدر پێغەمبەرى(سلاڤێت خودێ لێ بن) هەبيت گۆتگۆتكن و چو بنيات بۆ نينە، ژ بەر ئەڤا بۆرى هەميێ ئەم دبێژينە ڤێ خويشكێ: وێ نڤشتۆكێ بسۆژە و نەهێلە، و خدر پێغەمبەر (سلاڤێت خودێ لێ بن) چو گرێدان و پەيوەندى پێڤە نينە و نەدەيەف كەسێ و نەدانيە بالگەهێ كەسێ، و خودێ چێتر دزانيت.
