ب / بەراهيێ دڤێت بزانين و مە باوەرى هەبيت، زانينا خودێ بەرى قەومين و رويدانێيە و دڤێت سالۆخەتێت خودێ د هۆسابن، چونكى ناكەڤيتە عەقلى، خودێ ئەم دابين و هوير و گران ژ مە نەزانيت، ڤێجا زانينا خودێ يا پێشاهيە، بەلێ بەرامبەر ڤێ پێدڤيە بزانين زانينا خودێ هندى دگەل كو يا پێشاهيە بەلێ مە پالنادەتە كارى و ئەم بەرپرسين ژ كارێ خۆ و ئەم هەلدبژێرين و حەزا مە بنياتە د كاروبار و كريارێت مەدا، بۆ نموونە: مامۆستا هێژ هەيڤا ئێكێ ژ سالا خواندنێ پشـى ئەزموونەك و ئمتيحانەكێ دشێت قوتابى هەلسەنگينيت و بێژتە سەميانێ وى: كورێ تە ئەڤە دێ دەرچيت و ئەڤ دێ مينيت و نادەرچيت دگەل كو هێژ هەشت هەيڤ بۆ تاقيكرنێت دويماهيێ يێت ماين، باشە هەكە سەرێ سالێ هات وەسا دەركەفت بۆ باب و كوران هەيە خۆ ژ ڤى مامۆستاى نەرازيكەن و بێژنێ: تە ئەم ئێخستين، چونكى تە ل سەرێ سالێ دزانى كى ژ مە دێ دەرچيت و كى دێ مينيت نادەرچيت، زانينا تە ئەڤە ب سەرێ مە ئينا و ئەم پالداينە ڤێ دويماهيێ؟!!، كەسێ خودانێ دندكەكا عەقلى بيت ڤى مافي نادەتە باب و كورێ كەفتى يان ڤەماى خۆ ژ مامۆستاي نەرازيكەن، چونكى سەرێ سالێ دزانى دێ كەڤيت. باشە هەكە ئەڤە مامۆستا بيت و زانينا وى يا تخويبداى بيت و يا بەرى وەختى بيت.. پا چاوا خودێ نوزانيت. يان گەلەك دێ دبێژن: خودێ ئەڤە يا بۆ من حەزكرى، ئەڤە دووجاركى يا خەلەتە و نەيا دورستە، جارا ئێكێ: خودێ حەژ گاورى و خرابيێ ناكەت و ب ئاشكرا ئەڤە يا د قورئانا خۆدا گۆتى، ڤێجا بۆ ڤێ درەوێ ب سەر خودێ ڤەدنيت و ئەو د كتێبا خۆدا دبێژيت: ((وَاللَّهُ لَا يُحِبُّ الْفَسَاد)) و((وَلَا يَرْضَى لِعِبَادِهِ الْكُفْرَ))، دوو: ئەرێ ما كێ دەفتەرا خودێ ڤەكريە؛ دا بزانيت كا چ خودێ بۆ نڤێسيە و چ نەنڤێسيە؟! كى دگەل ملياكەتان بوو؛ دا بزانيت چ بۆ نڤێسيە چ نەنڤێسە؟! دڤێت ئەم ڤێ حەديسێ دەسپێكا وێ وەرگرين و بزانين زانينا خودێ هەمى تشتان دگريت و يا مەزنە بەرى ئەم كارى بكەين ئەو دزانيت بەلێ ئەو زانين مە ناهاژۆتە وى كارى، و پشكا دويماهيێ ژ حەديسێ: ئێك ژ هەوە دێ كار و كريارێت خەلكێ بەحەشتێ كەت هەتا مابەينا وى و بەحەشتێ ژ گەزەكێ پێڤەتر نەمينيت، دێ كتێبا وى ب سەر وى كەڤيت، دێ كار و كريارێت خەلكێ جەهنەمێ كەت، دێ چيتە جەهنەمێ، ئێك ژ هەوە دێ كار و كريارێت خەلكێ جەهنەمێ كەت هەتا مابەينا وى و جەهنەمێ ژ گەزەكێ پێڤەتر نەمينيت، دێ كتێبا وى ب سەر وى كەڤيت، دێ كار و كريارێت خەلكێ بەحەشتێ كەت، دێ چيتە بەحەشتێ. باشە ژ ڤێ حەديسێ ناهێتە زانين ئەم د هاژۆتينە بۆ كارێ خۆ و مە حەز نينە و هێژ ئەم د زكێ دايكێت خۆدا جهێ مە يێ ئاشكرايە، و هەكە ئێك ژ مە كار و كريارێت بەحەشتێ ژ دەستپێكا ژيێ خۆ بكەت دويماهيێ دێ هەر زڤريتە كار و كريارێت خراب، چونكى هۆسا يا بۆ هاتيە نڤێسين، ئەرێ هوين چ دبێژن. زانايێ ناڤدار ئبن كەسير (خودێ ژێ رازی بیت)، د تەفسيرا خۆدا دبێژيت: ئەڤ حەديسە ناهێتە راڤە و شلۆڤەكرن دوير ژ حەديسێت دى د ڤى بابەتى و رامانێدا هاتين، و رامانا وێ ئەو نينە جەهنەمى چەند كارێت باش بكەت بڤێت و نەڤێت دێ هەر زڤريتە خرابيێ دا بگەهيتە دويماهيا خۆ، يان يێ بەحەشتى چەند كارێت خراب و گاوريێ بكەت بڤێت و نەڤێت و ب خورتى دێ زڤريتە باشيێ دا بگەهيتە دويماهيا خۆ، نەخێر.. خودێ د قورئانا خۆدا دبێژيت: ((وَهَدَيْنَاهُ النَّجْدَيْنِ)) مە هەردوو رێك يا قەنج و يا خراب يێت بۆ ئاشكەراكرين و نيشا داين. و دبێژيت: ((إِنَّا هَدَيْنَاهُ السَّبِيلَ إِمَّا شَاكِرًا وَإِمَّا كَفُورًا)) بێ گۆمان مە رێك يا بۆ رۆنكرى، ڤێجا يان دێ يێ شوكوردار بيت و نيعمەت و كەرەمێت خودێ دگەل كرين ژبير ناكەت، يان دێ ژ رێ دەركەڤيت و دێ يێ بێ نان و خوێ بيت، و رێكا خرابيێ دێ گريت. ڤێجا خودێ هەردوو رێك ل بەر مە يێت رۆنكرين.. مە كيژ بڤێت دێ وێ بۆ خۆ گرين، و د بوخاريێدا هاتيە: (إِنَّ الرَّجُلَ ليعْمَلُ بِعَمَلِ أَهْلِ الْجَنَّە فِيمَا يبْدُو لِلنَّاسِ وَإِنَّهُ من أَهْلِ النَّار وَيعْمَلُ بِعَمَلِ أَهْلِ النَّار فِيمَا يبْدُو لِلنَّاسِ وهو من أَهْلِ الْجَنَّە) ئێك ژ هەوە دێ كارێ خەلكێ بەحەشتێ كەت هەروەكى بۆ خەلكى يا ديار، بەلێ دويماهيا خۆ دێ وى كارى كەت يێ بۆ خەلكى ديار ببيت كارێ وى نەيێ بەحەشتيان بوو و ئەو نە ژ وان بوو يێت ب دورستي كارێ بەحەشتيان دكر، و ديسا وەسا ئێك ژ هەوە دێ كارێ خەلكێ جەهنەمێ كەت وەكى بۆ خەلكى ديار بەلێ ئنيەتا وى ئەو نينە و باشيە بەلێ خەلك وەسا دبينيت دويماهيا خۆ دێ زڤريت وى كارى كەت يێ بۆ خەلكى ديار ببيت ئەو نەكارێ جەهنەميان دكەت بەلكى كارێ بەحەشتيان دكەت. دويماهيێ دڤێت ئەم ڤى مفايى ژ ڤێ حەديسێ وەرگرين:
ئێك: زانينا خودێ يا بێ تخويبە، و زانينا وى هەمى تشتان دگريت و يا پێشاهيە بەلێ نەيا پالدەر.
دوو: مە باوەرى ب قەدەرا خودێ هەبيت كو ئێكە ژ شەنگستێت باوەريێ، هەروەكى پێغەمبەرێ خۆشتڤى (سلاڤێت خودێ لێ بن) دەمێ پسيار ژ جبريلى لێ هاتيەكرن، بێژە من كا ئيمان و باوەرى چيە؟ گۆت: (( ـ باوەرى ئەڤەيە ـ تو باوەريێ ب خودێ و ملياكەتێت وى و كتێبێت وى و پێغەمبەرێت وى و رۆژا قيامەتێ بينى، و تو باوەريێ ب قەدەرێ بينى يا (بۆ تە) باش و يا (بۆ تە) خراب)). (ئانكو يا ب دلێ تە و يا نە ب دلێ تە)، بەلێ ئەڤ قەدەرە يا بەرزەيە كەس نزانيت، و كەسێ حەق نينە خرابيێ بكەت و بێژيت خودێ بۆ من ئەڤە يا ڤيايى، وەكى مە گۆتى ئەڤە دووجاركى خەلەتە، چونكى خودێ حەژ خرابيێ ناكەت، و يا دووێ قەدەر يا ڤەشارتيە كەس نزانيت.
سێ: دڤێت بەردوام ب باشيێڤە يێت گرێداى بين ول سەر يێت بەردوام بين و دويماهيا خۆ بترسين چونكى كار و كريار ب دويماهيكێت خۆڤەنە.
چار: كەس خۆ بزانينا علمێ غەيبێ نە ئينيتە دەر خودێ تنێ زانينا غەيبێ دزانيت وكەس نەبێژيت فلان جەهنەمى يە وفلان بەحەشتى يە، دبيت دويماهيا خۆ كارەكێ دى بكەت، و خودێ چێتر دزانيت.
