ب / زانايێت مە دبێژن: ئەوێ خێر و گونەهێت وى هندى ئێك لێهاتن، نە گونەهان خێر داكێشان دا هەژى جەهنەمێ ببيت، و نە خێرێت وى گونەهێت وى داكێشان دا هەژى بەحەشتێ ببيت، ئەڤە دەمەكى دێ د ناڤبەرا بەحەشت و جەهنەمێدا مينن، نە دچنە بەحەشتێ و نە دچنە جەهنەمێ و دبێژنێ خەلكێ ئەعرافێ.. جهەكە د ناڤبەرا بەحەشت و جەهنەمێدا خودێ مەزن بەحسێ وان د قورئانا پيرۆزدا ئينايە، دبێژيت: ((وَبَيْنَهُمَا حِجَابٌ وَعَلَى الْأَعْرَافِ رِجَالٌ يَعْرِفُونَ كُلًّا بِسِيمَاهُمْ وَنَادَوْا أَصْحَابَ الْجَنَّةِ أَنْ سَلَامٌ عَلَيْكُمْ لَمْ يَدْخُلُوهَا وَهُمْ يَطْمَعُونَ))(( وَإِذَا صُرِفَتْ أَبْصَارُهُمْ تِلْقَاءَ أَصْحَابِ النَّارِ قَالُوا رَبَّنَا لَا تَجْعَلْنَا مَعَ الْقَوْمِ الظَّالِمِينَ))(( وَنَادَى أَصْحَابُ الْأَعْرَافِ رِجَالًا يَعْرِفُونَهُمْ بِسِيمَاهُمْ قَالُوا مَا أَغْنَى عَنْكُمْ جَمْعُكُمْ وَمَا كُنْتُمْ تَسْتَكْبِرُونَ))(( أَهَؤُلَاءِ الَّذِينَ أَقْسَمْتُمْ لَا يَنَالُهُمُ اللَّهُ بِرَحْمَةٍ ادْخُلُوا الْجَنَّةَ لَا خَوْفٌ عَلَيْكُمْ وَلَا أَنْتُمْ تَحْزَنُونَ)) ئانكو: و د ناڤبەرا هەردووكاندا جەهنەمى و بەحەشتيان ناڤبرەك هەيە، و ل سەر ناڤبرێ هندەك زەلام هەنە ئەون يێت خێر و گونەهێت وان هندى ئێك لێ هاتين، نە خێرێت وان پترن كو بچنە بەحەشتێ، و نە گونەهێت وان پترن كو بچنە جەهنەمێ، ل وێرێ يێت هاتينە راوەستاندن هەتا خودێ فەرمانێ د دەرهەقێ واندا ددەت، ئەو هەردووكان جەهنەمى و بەحەشتيان ب سيما و سەروچاڤێت وان دنياسن، گازى خەلكێ بەحەشتێ دكەن: سلاڤ ل هەوە بن، ئەو ب خۆ هێژ نەچۆينە بەحەشتێ بەلێ حەز دكەن و ل وێ هيڤيێنە. هەر وەختەكێ بەرێ وان بۆ رەخێ جەهنەميان هاتە وەرگێران، دبێژن: خودايێ مە تو مە نەبە دگەل مرۆڤێت ستەمكار. و خودانێت ناڤبرێ (ئەعرافيان) گازى هندەك زەلامان يێت جەهنەمى كر، ب سەروچاڤان دنياسين، گۆتن: كۆمكرنا مالى و خزمەتكاران و خۆمەزنكرنا هەوە چ مفا گەهاندە هەوە. ئەرێ ئەڤە بەحەشتى ئەون ئەوێت هەوە سويند دخوار خودێ دلۆڤانيێ ب وان نابەت و ناچنە بەحەشتێ؟ هەرنە بەحەشتێ، نە ترس بۆ هەوە هەيە و نە هوين ب خەم دكەڤن، و خودێ چێتر دزانيت.
