ب / بێ گۆمان هەردوو موسلمانن، خودێ وان و پێغەمبەرێ وان و قيبلا وان ئێكە، بەلێ جوداهيێت هەين د ناڤبەرا واندا، شەنگستێت ئيمانێ ل دەف سونەيان شەشن هەروەكى د حەديسا موسلميدا هاتين ژ عومەرێ كورێ خەتابى (خودێ ژێ رازی بیت) د حەديسا ئيسلامێ يا درێژدا دبێژيت: پسيار ژ پێغەمبەرى (سلاڤێت خودێ لێ بن) هاتەكرن، بێژە من كا ئيمان و باوەرى چيە؟ گۆت: (باوەرى ئەڤەيە) تو باوەريێ ب خودێ و ملياكەتێت وى و كتێبێت وى و پێغەمبەرێت وى و رۆژا قيامەتێ بينى، و تو باوەريێ ب قەدەرێ بينى يا (بۆ تە) باش و (بۆ تە) خراب. (ئانكو يا ب دلێ تە و يا نە ب دلێ تە)، و شەنگستێت باوەريێ ل دەف شيعەيان پێنجن ئەو ژى ئەڤەنە: (التوحيد، العدل، النبوە، الامامە، المعاد)، و شەنگستێت ئيسلامێ ل دەف سونەيان پێنجن ديسا هەروەكى د حەديسا موسلميدا هاتين ژ عومەرێ كورێ خەتابى(خودێ ژێ رازی بیت) د حەديسا ئيسلامێ يا درێژدا دبێژيت: پسيار ژ پێغەمبەرى (سلاڤێت خودێ لێ بن) هاتەكرن بێژە من كا ئيسلام چيە؟ (سلاڤێت خودێ لێ بن) گۆت: موسلمانەتى ئەڤەيە تو شەهدەيێ بدەى كو ب راستى چو خودێ و پەرستى راست و دورست نينن خودێ نەبيت، و ب راستى موحەممەد پێغەمبەر و قاسدێ خودێيە، و تو بەردەوام و ب رەنگێ پێدڤى نڤێژان بكەى، و زەكاتێ بدەى، و رەمەزانێ ب رۆژى بى، و بچيە حەجێ هەكە تە پێ چێ ببيت. و شەنگستێت ئيسلامێ ل دەف شيعەيان ديسا پێنجن بەلێ جوداهيەكا هەى، ئەو دبێژن: شەنگستێت ئيسلامێ پێنجن: نڤێژ و رۆژى و زەكات و حەج و ويلايەتە ئانكو: ئيمامەت، و ب راستى ئەڤ كورتيە ب تنێ بۆ مرۆڤێ ب ژير بەسە بزانيت چ جوداهي د ناڤبەرا شيعە و سونەياندا هەيە، و يێ بڤێت درێژتر بزانيت بلا بزڤريتە كتێبا (منهاج السنە النبويە) يا ئبن تەيميە (خودێ ژێ رازی بیت)، و كتێبا (الخطوط العريضة للاسس التي قام عليها دين الشيعە الاماميە الاثنى عشرية) يامحب الدين الخطيب، بەلێ نابيت بێنە كافركرن و زانايێت مە باراپتر ل سەر ڤێ چەندينە و هيڤيا من ئەوە نەلێكيا دناڤبەرا وان و سونەياندا رابيت و نەڤيان نە مينيت و خودێ چێتر دزانيت.
