ب / دەستپێكێ دڤێت بزانين بيدعە چيە، و نەدورستە ئەم گەلەك بازنێ وێ فرەكەين ب رەنگەكێ وەسا هەمى تشت و پرسێت جهێ جودابوونێ د ناڤبەرا زاناياندا بكەينە بيدعە، و نابيت ئەم گەلەك بەرتەنگ بكەين ژى ب رەنگەكێ وەسا چو تشتان بيدعە نەزانين و نەبينين، ئەڤ هەردوو بۆچۆن و ديتنە خەلەتن و نەدورستن. و ب راستى خودانێت ڤان هەردوو بۆچۆنان ستەم و نەهەقيەكا مەزن ل فقه و تێگەهشتنا بيدعێ دكەن، و مخابن باراپتر ژ خەلكى ل سەر ڤان هەردوو ديتنان د بەلاڤن ئەوێت بازنێ بيدعێ بەرفرەه دكەن و هەر تشتەكێ هەبيت د ئێخنە تێدا و د توندن بەرامبەر هەر تشتەكێ نوى و جوداهيێ د ناڤبەرا فەرمان (حوكم) و رێكاندا و ئالاڤاندا ناكەن و هەردووكان تێكەلى ئێك دكەن، ژبەر هندێ پەيڤا ژ هەميان نێزيكتر بۆ ئەزمانێ وان بيدعەيە، چونكى چو دەقێت ئاشكەرا و سۆر و سۆر ل سەر وى تشتێ بەرچاڤكرى نابينن، ئەڤە خواندنگەهەكە. و يا دى بازنێ بيدعێ زێدە بەرتەگ دكەن و چو تشتان بيدعە نابينن و فەرموودێت د ڤى واريدا گران ل سەر گوهێت خۆ دبينن، وەكى: ڤەگێرا بوخارى و موسلمى: (منْ أَحْدث في أَمْرنَا هَذا مَا لَيْسَ مِنْهُ فهُو رَدٌّ) هەركەسێ تشتەكێ نوى د ڤى دينێ مەدا بكەت و نە ژێ بيت ئەو يێ پويچە، ئانكو نەيێ قەبويلە، و د ڤەگێرا موسلميدا هاتيە: (مَنْ عَمِلَ عمَلاً لَيْسَ عَلَيْهِ أَمْرُنَا فَهُو ردٌّ) هەركەسێ كارەكى بكەت نە دگەل دينێ مە بيت، ئەو يێ پويچە، ئانكو نەيێ قەبويلە. و ديسا ڤەگێرا دى يا موسلمى: (فَإِنَّ خَيرَ الْحَديث كِتَابُ اللَّه، وخَيْرَ الْهَدْى هدْيُ مُحمِّد صَلّى اللهُ عَلَيْهِ وسَلَّم، وَشَرَّ الأُمُور مُحْدثاتُهَا وكُلَّ بِدْعَة ضلالَة) ب راستى چێترين ئاخفتن ئاخفتنا خودێيە، و باشترين رێك رێكا موحەممەديە(سلاڤێت خودێ لێ بن)، و خرابترين كاروبار ئەون ئەوێت نوى د دينيدا دئێنەكرن، و ب راستى هەر بيدعەكا هەبيت (بيدعە ئەو تشتە يێ نوى د شەريعەتيدا و چو بنيات و بەلگەيێ شەرعى بۆ نەبيت) يێ پويچە، و ب راستى وەكى دەستپێكێ مە گۆتى ئەڤ هەردوو خواندنگەه و رێباز و ديتنە د خەلەتن و نەدورستن، و هەكە ئەم پێناسا دورست يا بيدعێ نەزانين ئەم نەشێين حوكم و فەرمانا دورست ل سەر پرسان بكەين كا بيدعەنە ئان نە، و دڤێت ترازيا مە بۆ هەلسەنگاندن و كێشان و پيڤانا بيدعێ يا دورست و عادل بيت هەتا پرسا بەرچاڤێت مە دبيت ئەم دورستى فەرمانێ ل سەر بدەين، چونكى گەلەك ژ وان پرسان ئەوێت هندەك ژ نەزانين بيدعە ددانن و ب بيدعە ددەنە نياسين ژ نەلێكيێت فقهينە، و جهێ جودابوونێنە د ناڤبەرا زانا و فقهزانادا، و هەكە هەر پرسەكا نەلێكى ل سەر ئەم ب بيدعە بدەينە نياسين هنگى دێ ستەمەكا مەزن ل دينێ خۆ كەين، دەستنڤێژ و نڤێژ بۆ نموونە چەند پرسێت نەلێكيێ تێدا هەنە، زانايێت ناڤدار تويژاندنكار د پێناسا بيدعێدا دبێژيت: رێكەكە د دينيدا، ياچێكريە، چاڤلێكرنا شەريعەتي دكەت، مەخسەد ژ سەر چۆنا سەر، زێدە عيبادەتكرنە. و ب راستى ئەڤ پێناسە يا پشت بەستە ل دەف پتريا فقهزاناندا، و ئەڤ پێناسە كۆمەكا شەنگستە و بنەمايان بەرچاڤ دكەت بۆ نياسينا بيدعێ:
شەنگستێ ئێكێ: رێكەكە د دينيدا و رامانا وێ ئەڤەيە: كارێ نە د دينيدا وەكى كاروبارێت دنيايێ و عەدەت و رێز و سەر و بەران و پيشەكاران پەيوەندى ب بيدعێڤە نينە و نابيت ب بيدعە بێنە دانانان.
شەنگستێ دووێ: يا چێكريە، ئانكو يا بێ بنەما و بنياتە و چو بەلگە بۆ نينن نە ژ قورئانێ و نە ژ حەديسێ و نە ژ بەلگەيێت دى يێت شەريعەتى وەكى قياسێ و ئيجماعێ و بەلگەيێت دى يێت شەريعەتى و نەدكەڤيتە بن چو شەنگست و بنەما و قەواعدێت فقهيڤە، هەكە بەلگەيەك ژ بەلگەيێت شەرعي هەبيت يان بكەڤيتە بن شەنگستەكێ شەريعەتيڤە بيدعە ناهێتە دانان، بەلكى دهێتە هەژمارتن ژ پرسێت جهێ نەلێكى و ئختيلافێ، بۆ نموونە وەكى: خواندنا دوعا وەسيلێ پشتى قامەتێ و خواندنا قنوتێ د نڤێژا سپێدێدا و دەنگ بلندكرنا ئيمامى ب بەسمەلێ د نڤێژاندا و خواندنا قنوتێ ل سەر گۆران و خواندنا فاتحێ يان قورئانێ ل سەر گۆران) ئەڤە هەمى پرسێت نەلێكن د ناڤبەرا فقهزاناندا، و ب رێككەكا زانستى و ب دان و ستاندن دڤێت گەنگەشە ل سەر بێتەكرن دا ژ بۆچۆنا لاواز دەركەڤن بۆ يا ب هێزتر و ژ يا دورست بۆ يا دورستتر.
شەنگستێ سيێ: مەخسەد پێ دانا فەرمانان بيت وەكى فەرمانێت شەريعەتى، كا مەبەست ب دانانا فەرمانێت شەريعەتى چيە هەر ئەو مەبەستە خودانێ وێ پرسا چێكرى.
شەنگستێ چارێ: مەبەست و مەخسەد ژ كرن و دانا وى تشتى زێدەكرنا عيبادەتيە و نە چو تشتێت دى، هەكە مەبەست ئەڤە نەبيت ناكەڤيتە بن بيدعێڤە، وەكى ئێك ل سەر نڤێژێ بزاڤەكێ نە ژ مەخسەدا عيبادەتى بكەت ئەڤە نابيتە بيدعە.
پشتى ڤێ رۆنكرنێ.. من پێخۆشە هندە پێناسان ژ زانايێت ناڤدار و ب سەنگ بەرچاڤكەم دا پێناسا بيدعێ باش بۆ مە ئاشكرا ببيت:
ئبن رەجەبێ حەنبەلى (خودێ ژێ رازی بیت) دبێژيت: (والمراد بالبدعة: ما أحدِث مما لا أصل له في الشريعة يدلّ عليه، وأما ما كان له أصل من الشرع يدلّ عليه فليس ببدعة شرعًا وإن كان بدعة لغة)
سيوتى (خودێ ژێ رازی بیت) دبێژيت: (البدعة: عبارة عن فعلة تصادم الشريعة بالمخالفة أو توجب التعاطي عليها بزيادە أو نقصان).
و ئبن تەيميە (خودێ ژێ رازی بیت) دبێژيت: (البدعة في الدين هي ما لم يشرعه الله ورسوله، وهو ما لم يأمر به أمر إيجاب ولا استحباب، فأما ما أمر به أمر إيجاب أو استحباب وعلم الأمر به بالأدلە الشرعيە فهو من الدين الذي شرعه الله، وإن تنازع أولو الأمر في بعض ذلك، وسواء كان هذا مفعولاً على عهد النبي صلى الله عليه وسلم أو لم يكن).
و ئبن حەجەرێ عەسقەلانى (خودێ ژێ رازی بیت) دبێژيت: (ما أحدث ولا دليل له من الشرع بطريق خاص ولا عام مقارنە بين المعنى اللغوي والمعنى الشرعي للبدعة المعنى اللغوي أعمّ من المعنى الشرعي، فالعلاقە بينهما العموم والخصوص المطلق؛ إذ كل بدعە في الشرع يطلق عليها لغە أنها بدعە، وليس كل ما يطلق عليه في اللغة أنه بدعة بدعة في الشرع والبدعة في الشرع ملازمە لصفة الضلالة؛ للحديث الوارد: ((كل بدعةضلالة))، وأما البدعە بمعناها اللغوي فليست كلها ملازمة لوصف الضلالة).
دويف پێناسا ڤان زانايێت تويژاندنكار و ب پشتەڤانيا بەلگەيان ئەم دشێين ڤێ پێناسێ بدەينە بيدعێ.. بيدعە: ئەو رێك و كارە يێت د دينيدا رويداي و چو بەلگەيێت شەرعى بۆ نە و نەكەڤيتە بن چو شەنگستێت شەرعى، و هەكە بەلگەيەك بۆ هەبيت يان بكەڤيتە بن شەنگستەكى ژ شەنگستێت شەرعى نابيت بيدعە بێتە زانين، و ئەڤە پيڤەرێ ئێكانە و سەرەكى و راست و دورستە بۆ نياسينا بيدعێ. و يێ بڤێت پتر زانينا د ڤى بواريدا وەرگريت بلا بزڤريتە كتێبا (الاعتصام) يا شاتبى، ب راستى كەسێ وەكى وى هوير ڤەكۆلين ل سەر نەكريە، و هەكە هۆسا نەبيت هەمى جوداهيێت د ناڤبەرا زاناياندا دبيت بكەڤنە د بازنێ بيدعێدا، و ئەڤە تشتەكێ مەترسيدارە. و هەكە بيدعە يا حەقيقى بيت دڤێت بەرهنگاريا وێ بێتەكرن و خودانێ وێ بهێتە پاشڤەبرن، و پرسێت دى يێت زانا تێدا جودا و نەئيك بۆچۆن، نابيت بەرهنگاريا وان بێتەكرن؛ چونكى هەمى زانا يێت ل سەر هندێ پرسا زانا تێدا ژێك جودا نابيت ئينكار و پاشڤەبرن ل سەر هەبيت، بەلێ هەكە ب رێكەكا نەرم و جوان و نەيا توند و تيژ شيرەت بێتەكرن دا ژ جوداهيێ دەركەڤن باشە و چونينە، و خودێ چێتر دزانيت.
