ب / نەخێر، جانێ موسلمان و نەموسلمانى وەكى ئێك ناهێتە كێشان، و ئەو هەردوو وەكى ئێك نينن و وەكى ئێك نابن ژى، خودێ مەزن نموونەيا وان ب ڤى رەنگى رەوشكريە: ((مَثَلُ الْفَرِيقَيْنِ كَالْأَعْمَى وَالْأَصَمِّ وَالْبَصِيرِ وَالسَّمِيعِ هَلْ يَسْتَوِيَانِ مَثَلًا أَفَلَا تَذَكَّرُونَ)) مەتەلا هەردوو جوين و دەستەكان، موسلمان و نەموسلمانان، وەكى يێ كۆرە و يێ كەرە، و يێ ب چاڤ و يێ ب گوهە، ئەرێ ما ئەڤە وەكى ئێكن؟ ئەرێ ما هوين هزرا خۆ ناكەن؟! ڤێجا يێ نەموسلمان و گونەهكار ب ئيزا و نەخۆشى جانێ وى دهێتە كێشان و ل سەمتا چاڤێت وى قەترە دكەن، ملياكەت دگەل ملياكەتێ جانكێش دێ مزگينيێ ب ئيزا و نەخۆشيێ دەنێ، و ئەو دێ بەر ب قۆناغەكا نەخۆشتر چيت، و ژ ترساندا دآ كاركەت جانێ خۆ ئاسێ بكەت و ب دەست ملياكەتێ جانكێشڤە نەبەردەت، و ب ڤى رەنگى ملياكەت دێ جانێ وى ب هێز و توند كێشن، و هۆسا هەمى لەشێ وى دێ هێتە ئێشاندن و ئازاردان. زانا ڤى كارى نموونە دكەن ب هەژەكێ پر چەق و سترى ژ ناف كۆمەكا هريێ بكێشى دێ چاوا هێتە كێشان و چەند هرى دێ پێڤە مينيت، هۆسا جانێ يێ نەموسلمان و گونەهكار دهێتە كێشان، بەلێ يێ موسلمان و خودێناس و خودێپارێز ملياكەت دێ مزگينيێ ب خۆشيێ دەنێ و دێ هێتە ڤەگوهاستن بۆ قۆناغەكا خۆشتر، و بلا پەشێمان نەبيت ل سەر هێلانا دنيايێ پشتى ڤێ مزگينيێ ژ ملياكەتان وەردگريت، بەرى ملياكەتێت تايبەت ب جان كێشانێ جانێ وى بكێشن ئەڤە دێ دلرەحەتى و ڤەهەسيانەكێ دەتێ و دێ جانێ خۆ ب دەست ملياكەتێ جانكێشڤە بەردەت و جانێ وى ب نەرمى و ب ساناهى و بێ ئەزيەت دێ هێتە كێشان، و گەلەك حەديسێت پيرۆز ل سەر ڤێ چەندێ و ب ڤێ رامانێ هاتينە، و قورئانا پيرۆز ڤێ رامانێ نيشان دكەت دەمێ دبێژيت: ((وَالنَّازِعَاتِ غَرْقًا))(( وَالنَّاشِطَاتِ نَشْطًا))سويند ب وان ملياكەتێت ب دژوارى جانێ گاوران دكێشن. هەر ل دەستپێكا كێشانا روحێ دێ كەڤنە بەر ئيزا و نەخۆشيان، و ب توند و دژوارى و بێ رەحم ملياكەت جانێ وى دكێشن، دا هەمى گەه و بارێت وى بەر ئيزا ببن. و سويند ب وان ملياكەتێت ب نەرمى جانێ خودان باوەران دكێشن دەمێ مرۆڤێ چاك و باوەردار دكەفتە د سەكەراتێدا، ملياكەت رەحمێ پێ دبەن و نەرم و رەحەت جانێ وى دكێشن، دا نەئێشيت، و دا بزانيت ئەو يێ ل سەر وەغەرەكا خۆش، و دێ بەر ب ژينەكا خۆشتر چيت. دوعا ژ خودێ مەزن دكەم ئەم ژ وان بين، يێت جانێ وان ب نەرمى و ب خۆشى دهێنە كێشان، و خودێ چێتر دزانيت.
