ب : زانایێت مه دبێژن: ئێك ژمافێت زه‌لامی ل سه‌ر ژنێ هه‌كه ل مال بیت و هه‌وجه‌یی خۆ و ژنا خۆ بیت نابیت ژن رۆژیێت سونه‌ت بێ دوستویری و ئاگه‌ھداری و رازیبوونا وی بگریت، به‌لێ ئه‌ڤه ھه‌که زه‌لامێ وێ ھه‌وجه‌ی وێ بیت (ئانکو ھه‌وجه‌ی نڤینا وێ بیت)، و ل مال بیت؛ چونكی حه‌دیس دبێژیت: هه‌كه ل مال بیت پێغه‌مبه‌ر سلاڤێت خودێ ل سه‌ربن دڤه‌گێرا بوخاری و موسلمیدا دبێژیت: (لا يَحلُّ لامْرَأَةٍ أَنْ تَصُومَ وَزَوْجُهَا شَاهِدٌ إِلا بِإِذْنِهِ) نه‌دورسته بۆ چو ژنان رۆژیا سونه‌ت بگریت و زەلامێ وێ یێ ئاماده و حازر بیت ب دەستویرا وی نه‌بیت، به‌لێ ھه‌که ل مال نه‌بیت و ل سه‌ر وه‌غه‌ره‌كێ بیت یان ھه‌وجه‌یی بۆ نڤینا وێ نه‌بیت دورسته ژن رۆژیا سونه‌ت بگریت، و ھه‌وجه‌ی ده‌ستویری و ئاگه‌ھداری و رازیبوونا زه‌لامی نینه، له‌وا ئه‌م دبێژینه زه‌لامان: ته‌قوا خودێ د راستا ژنێت خۆدا بکه‌ن، و ھه‌که ھه‌وه ھه‌وجه‌یی ب نڤینا خۆ نه‌بیت نه‌که‌ڤنه د رێکا ھه‌ڤسه‌رێت خۆدا کو رۆژیێت سونه‌ت بگرن، ژ ئاخفتنا زانایان دھێته زانین.. زه‌لامی ھه‌می ده‌مان ماف نینه نه‌ھێلیت ژنا وی بۆ خۆ رۆژیێت سونه‌ت بگریت ب وی مه‌رجی نه‌بیت یێ مه گۆتی، ھه‌وجه‌ی نڤینا خۆ ھه‌بیت، ھنگی دڤێت ژن ب ده‌ستویریا وی رۆژیا سونه‌ت بگریت، و ھه‌که ئه‌ڤه نه‌ما ھنگی زه‌لامی ماف نینه نه‌ھێلیت ژنا وی یا ب رۆژی بیت.
فه‌ره زه‌لام و ژن به‌رچیڤگرتنا ڤان تێبینیان دڤێ راستیدا بكه‌ن:
ئێك: زه‌لامی هنگی مافی هه‌ی ژنا وی رۆژیێت سونه‌ت نه‌گریت هه‌كه ل مال بیت و هه‌وجه‌ی نڤینا خۆ ببیت، به‌لێ هه‌كه ل مال نه‌بیت یان ل مال بیت هه‌وجه‌ی نڤینا خۆ نه‌بیت نه‌دورسته نه‌هێلیت ژنا وی رۆژیێت سونه‌ت بگریت، نه‌خاسمه رۆژیێت دوشه‌مب و پێنج شه‌مبان و شه‌شكان و رۆژێت سپی و تاسوعا و عاشورایێ و عه‌رفێ ڤان رۆژیا فه‌ره زه‌لام ژی یێ ب رۆژی بیت و ژ ژنا خۆ ژی بخوازیت یا ب رۆژی بیت.
دوو: زانا دبێژن هه‌ر سونه‌ته‌كا هه‌بیت نه به‌س رۆژیا سونه‌ت ب تنێ نابیت ژن بمینیته پێڤه و هه‌وجه‌ییا زه‌لامێ خۆ نه قه‌تینیت، بۆ نمونه هه‌كه ژن ل سه‌ر قورئان خواندنێ بیت یان نڤێژێت سونه‌ت دكه‌ت، هه‌كه زه‌لامی داخوازكره نڤینا خۆ باشه ژن نه‌مینیته ب سونه‌تانڤه و زه‌لامێ خۆ بهێلیت.
سێ: بۆ رۆژیا فه‌رز چ ره‌مه‌زان بیت یان قه‌زاكرنا وێ بێت ژ ئه‌گه‌را حه‌ملێ یان بچویك شیریێ یا ن ژ یچویك بوونێ یان ژ نه‌ساخیێ یان ژ ژڤانان خارین دشێت بۆ خۆ بگریت بلا زه‌لامێ وێ ب دلی ژی نه‌بیت، دیسا رۆژیێت نه‌زر و كه‌فاره‌تا سوندێ ژی ژن دشێت بگریت و هه‌وجه‌ی ده‌ستویریا زه‌لامی نینه.
