ب / نوينۆك برين سونەتە نەواجبە، بەلێ نابيت مرۆڤ سونەتا پێغەمبەرى (سلاڤێت خودێ لێ بن) پشت گوهێت خۆڤە باڤێت، چونكى هەر ئەو (سلاڤێت خودێ لێ بن) دبێژيت: هەركەسێ رێكا من بهێليت نە ژ منە. و نەكورتكرنا نوينۆكا و نەتراشينا نوينۆكا دبيت دێ قرێژ كەڤيتە بن و ئاڤ ناگەهيتە لەشێ وێ، هنگى نڤێژێت وێ نەدورستن و دبيت هەتا جەنابەتا وێ ژى ژ سەر نەرابيت، چونكى قرێژا كەتيە بن و ناهێليت ئاڤ بگەهيتە هەمى لەشێ وێ، و دبيت ژ ڤێ مەزنتر دەمێ خۆ دشۆت پيساتيا دەستنڤێژا وێ يا ستوير بمينيتە د بن نوينۆكێت وێڤە، هنگى ديسا نڤێژێت وێ دورست نابن، لەوا ياباشە ژن نەهێليت نوينۆكێت وێ درێژ ببن، و يا سونەت هەمى حەفتيا جارەكێ كورتكەت و بتراشيت، و ژ ڤێ وێڤەتر نوينۆك درێژكرن نەعەدەتێ ژنا موسلمانە، بەلكى رەوشتێ ژنا نەموسلمانە، و نەدورستە ژنا موسلمان چاڤ ل يا نەموسلمان بكەت، و ئەو د ڤێ چاڤلێكرنێدا يا گونەهكارە، پێغەمبەرێ خودێ (سلاڤێت خودێ لێ بن) دبێژيت: ((يێ خۆ وەكى هندەكان لێ بكەت ئەو ژ وانە، ئانكو: حسێبا وان ئێكە و ئەز نە ل وێ باوەرێمە ژنا موسلمان حەزكەت حسێبا وێ و يا نەموسلمان ئێك بيت، ديسا بۆياغ و سوبغا نوينۆكان ژى كارتێكرنێ ل دەستنڤێژ و سەرشويشتنا ژنێ دكەت، چونكى ناهێليت ئاڤ بگەهيتە جهێت پێدڤى ئاڤ بگەهيتێ، لەوا دڤێت كچا موسلمان ب سفكى بەرێ خۆ نەدەتە بۆياغێ و سوبغێ، و بێژيت: چو نينە، چونكى هەكە تو بۆياغ و سوبغا نوينۆكا ژێ نەبەى ئەڤە نە دەستنڤێژا تە يا دورستە و نە تو ژ عادێ دەركەفتى، و هەكە تو د كراسێ جەنابەتێدا بى دێ هەر مينيە تێدا و ژێ نادەركەڤى ژبەر بۆياغ و سوبغا نوينۆكان، و خودێ چێتر دزانيت.
