ب / دەستنڤێژ كا ب دەستكرنا ناڤبەرا ژن و زەلاماندا دكەڤيت يان نە، جهێ نەلێكيێيە: د مەزهەبێ شافعيدا (خودێ ژێ رازی بیت) ب دەستى يان بێ دەستى بيت مادەم ژن و مێرێت ئێكن يان بۆ ئێكدو دورستن و د بيانينە دەستنڤێژ دكەڤيت.
د مەزهەبێ مالكيدا (خودێ ژێ رازی بیت) چەند مەرجان ددانيت، هەكە ئەڤ مەرجە پەيدابوون ئەڤە دەستنڤێژ كەفت، و هەكە نە، ناكەڤيت:
ـ ئەڤێ دەستكرنێ دكەت دڤێت يێ بالغ بيت.
ـ ئەڤێ دەست ڤێ كەفتى دڤێت ژ وان بيت ئەوێت شەهوەت پێ چێدبيت، ڤێجا چ يێ بالغ بيت يان نە، چ دەست ب نوينۆكێ يان پرچێ بكەڤيت يان ئەڤ دەستكرنە د سەر تشتەكيرا بيت، و چ ب دەستى بيت يان ب تشتەكێ دى.
ـ هەكە مەخسەدا وى يێ دەستكرنێ دكەت شەهوەت بيت، دەستنڤێژا وى دكەڤيت.. چ شەهوەت بۆ چێببيت و چ نەچێبيت، بەلێ هەكە ئنيەتا وى ل دەستپێكا دەستكرنێ شەهوەت نەبيت، بەلێ پشتى دەستكرنێ شەهوەت بۆ چێبوو، دەستنڤێژا وى دكەڤيت، بەلێ هەكە چو ئنيەت نەبوون و شەهوەت بۆ چێنەبوو دەستنڤێژا وى ناكەڤيت.
د مەزهەبێ حەنبەليدا: هەكە دەستكرن ب ئنيەتا شەهوەتێ بيت دكەڤيت، و هەكە ب ئنيەتا شەهوەتێ نەبيت ناكەڤيت، چونكى گەلەك جاران دەستكرن د ناڤبەرا پێغەمبەرى (سلاڤێت خودێ لێ بن) و ژنێت ويدا يا چێبووى و دەستنڤێژا خۆ نەشويشتيە، بەلكى د نڤێژێدا پێغەمبەرى(سلاڤێت خودێ لێ بن) دەستكرە هەڤسەرا خۆ، و وێ دەستكرێ، و هەكە دەستنڤێژ ب دەستكرنێ كەتبا وەنەدكر.
و مەزهەبێ حەنەفى دبێژيت: دەستكرن د ناڤبەرا زەلام و ژناندا چ ب شەهوەت بيت يان بێ شەهوەت بيت ناكەڤيت، چونكى يا هاتيە زانين ژ پێغەمبەرى (سلاڤێت خودێ لێ بن) هندە هەڤسەرێت خۆ ماچى دكرن پاشى نڤێژ دكر و دەستنڤێژا خۆ نەدگرتەڤە.
و رەئيا دوستتر مەزهەبێ ئيمام ئەحمەديە، هەكە دەستكرنێ ئنيەتا شەهوەتێ تێدا بيت دەستنڤێژ دكەڤيت، و هەكە يا بێ ئنيەت بيت يان بێ دەستى بيت ناكەڤيت، و گەلەك حەديس پشتەڤانيا ڤێ رەئيێ دكەن، و خودێ چێتر دزانيت.
