ب/ بۆ وى يێ قورئانێ ژبەر دكەت يان قورئان خواندن بۆ بوويە سروشت و عەدەت و بەردەوام قورئانێ دخوينيت.. هەتا ئەو زانايێت شويشتنا دەستنڤێژێ بۆ هەلگرتنا قورئانێ واجب دبينن، ئەڤە يێت ژێ دەرێخستين، و ئەڤ واجبە ژ ڤان ناگريت، چونكى ئەڤێ بەردەوام ب خواندنا قورئانێڤە نەشێت بەردەوام يێ ب دەستنڤێژ بيت، و هەرگاڤا دەستنڤێژا وى كەفت بشۆتەڤە، و هەكە بشۆت ب زەحمەتە و هەكە نەشۆت ئەڤە قورئان ژ بيرا وى چۆ.
د موغنى موحتاجێدا هاتيە: يێ بەردەوام قورئانێ بخوينيت بۆ ژبەركرنێ ل سەر وى نەواجبە بەردەوام دەستنڤێژا خۆ بۆ خواندن و هەلگرتنا قورئانێ بشۆت. وەكى دى، گشتى كا دەستنڤێژ بۆ خواندن و هەلگرتن و دەستكرنا قورئانێ واجبە يان سوننەتە، ئەڤە جهێ نەلێكى و ژێكجودابوونا زانايانە، ئبن عەباس (خودێ ژێ رازی بیت) دبێژيت: نەواجبە، و ديسا شەعبى و زەحاك و ئبن حەزم ژي خودێ ژ وان رازى بيت هەر ڤێ دبێژن، سەعيدێ كورێ جوبەيرى (خودێ ژێ رازی بیت) دبێژيت: ئبن عەباسى و ئبن عومەري هەردووكان قورئان بێ دەستنڤێژ دخواند، عەبدولرەزاق د موسەننەفيدا ژ سەلمان فارسى (خودێ ژێ رازی بیت) ڤەدگوهێزيت: وى قورئان بێ دەستنڤێژ دخواند، پشتى پسيار ژێ هاتيەكرن چاوا بێ دەستنڤێژ قورئانێ دخوينيت؟! گۆت: من پێغەمبەرێ خودێ (سلاڤێت خودێ لێ بن) ديتيە پشتى ژ دەستئاڤێ زڤرى قورئان خوانديە، بەرى دەستنڤێژا خۆ بشۆت. و ئيمام مالك (خودێ ژێ رازی بیت) بابەتەك د (موطئ)ێدا ئينايە ل بن ڤێ نيشانێ: (باب الرخصة في قراءة القرآن على غير وضوء). و ئيمامێ (طحاوي) و نەسائى و ترمزى حەديسەكێ ڤەدگێرن كو پێغەمبەرى (سلاڤێت خودێ لێ بن) د هەمى كراساندا قورئان دخواند د جەنابەتێدا نەبيت.
ژ ئەڤا بۆرى دهێتە زانين ئەڤ خويشكە دشێت قورئانێ بخوينيت و مەرج نينە يا ب دەستنڤێژ بيت، خۆ هەكە د عادێدا ژى بيت ئەو دشێت قورئانێ بخوينيت و وەختێ خۆ ژ خۆ نەبەت، و خودێ چێتر دزانيت.
